ብቐረባ ክንከታተሎ ከም ዝጸናሕና ብዕለት 17 ጥሪ 2012 ሓሙሽተ ኤውሮጳውያን አብ መሬት ዓፋር ፤  ግዝኣት ኢትዮጵያ ድሕሪ ምቕታሎም ኣብ መንጎ ኤርትራን ኢትዮጵያን ዘይ ህዱእ ሃዋሁው እናሰፈነ ኢዩ። ነዚ ናይ ብዙሓት ሞት ዘኸተለ ኣሕዛኒ ተረኽቦ ብምጥቃም፡ መንግስታት ኢትዮጵያን ኤርትራን ኣብ ሸሸነኾም ኣጸጊዖሞም ዘለዉ ዕጡቓት ደቂ ዓፋር ብምውሳኽ ኣብ ሓድሓዶም ክጠቓቐኑን ክካሰሱን ኣናተዓዘብና ኢና።

ኣወሃሃዲ ሽማግለ ሃገራዊ ደሞክራስያዊ ሓይልታት ኤርትራ ከም ደሞክራስያዊ ምትእስሳር መጠን፡ ንሰብኣዊ መሰላትን ደሞክራስን ይጣበቕ ከምኡ ድማ ንሽግራት ብሰላማዊ ኣገባብ ክፍትሑ ከምዝግባኦም ይኣምን። ከምኡ ስለ ዝኾነ ክኣ፡ ነዚ ኣብ ከባቢና ዘሎ አሸቓሊ ኩነታት አመልኪቱ ነዚ ዝስዕብ መግለጽን ምሕጽንታን የቕርብ።

1. አብ ተረኽቦ 17 ጥሪ ብዝሞቱ ሓሙሽተ ኤውሮጳውያን ዝርከብዎም ንጹሃት ዜጋታት ዓሚቕ ሓዘን ይስማዓና። ንስድራ ቤታትነ ፈተውትን መወትቲ ድማ ጽንዓት ክረኽቡ ንምነየሎም። ንኩሎም ወገናት ነዚ ኣሕዛኒ ተረኽቦዚ ፖለቲካውን ዲፕሎማስያውን መኽሰባት ንምርካብ ኢሎም ካብ ምንብድባዱን ምስዋሩን  ክቑጠቡ ንጽውዕ። ንተጻባእን ኣዕገርጋርን ጠባያት ስርዓት ኤርትራ እናተገንዘብና፤ ኣብ መንጎ ኤርትራን ኢትዮጵያን ዝውላዕ ኵናት ንጠቕሚ ናይ ክልቲኡ ህዝብታት ክኸውን ከምዘይክእል ንኣምን። እዚ ክልተ ሃገራትዚ ደጊሙ ናብ ደማዊ ተጻብኦ ኣትዩ ክንርኢ ፈጺምና ኣይንደልን።
2. ኣብ ክንዲዚ ናብ ውግእ ከምርሕ ዝኽእል ዝኸይድ ዘሎ ቆየቛታትን ምክሳሳትን፡ ክለቲኦም መንገሰታት ህድእ ኢሎም ብትዕግስትን ልቦናን ነቲ ጉዳይ ክሕዝዎ ንጽውዕ። ናይቶም ዝሞቱ ኤውሮጳውያን ዜጋታት መንግስታት ድማ፡ ብወገኖም ነቲ ኩነታት ዘጻሪ ኮሚሽን ኣውጺኦም፡ ኣብቲ ተረኽቦ ንዝጠፍአ ክቡር ህይወት ሓላፍነት ዝወስደሉ ኣካል መን ከምዝኾነ ክፈልጡ ንጽውዕ።
3. ኣብ ዶባት ክልቲኡ ሃገራት ዘሎ ዘይህዱእ ኩነታት ናብ ዝኸፍአ መልክዑ ከይሰጋገር፡ ንክልቲኡ መንግስታት ኢትዮጵያን ኤርትራን በቢሸነኾም ንዝሕግዝዎም ተቓወምቲ ሓይሊታት ብናይ ውግእ ኣጽዋር ከየዕጥቑን ናብ ዓመጻዊ ስጉምቲ ከይደፋፍኡን ንምሕጸን።
4. ከምኡ ውን፡ ንክለቲኦም መንግስታት ንተደላይነት ናይ ንቡር ዝምድና ጎረባብቲ ሃገራት ተረዲኦም ክዓዩ ንጽውዖም። ንስለ ሰላምን ህድኣትን ኣብ ከባቢና፡ ኣብ መንጎ ክልቲአን ሃገራት ዘሎ መወዳእታ ዘይረኸበ ናይ ዶብ ሽግር በቲ ተበይንዎ ዘሎ ክዛዘም ንምሕጸን። ክልቲኡ ህዝብታት ኢትዮጵያን ኤርትራን ንቀንዲ ጸላእቶም ዝኾኑ፤ ድኽነትን ድሕረትን ጥሜትን ሕማምን ንምሽናፍ ክረባረቡ ዝግባኦም ኢዩ። እዚ ግን አብ ዘይህልውና ሰላምን ህድኣትን ክረጋገጽ ስለዘይክእል፡ ኣብ መንጎ ክልቲኡ ሃገራት ዘሎ ኣይሰላም- ኣይውግእ ኩነታት ወይ ውን ጸጸኒሑ ዝቕልቀል ናይ ውግእ ታህዲዳት ኣብቂዑ ንሓባራዊ ጠቕሚ ክሕሰብ ንጽውዕ።

ኣወሃሃዲ ሽማግለ

ሃገራዊ ደሞክራስያዊ ሓይሊታት ኤርትራ

15 የካቲት 2013

CCENDF@gmail.com