ጋዜጣዊ መግለጺ

ማእከላይ መሪሕነት ኤዲኪ

ማእከላይ መሪሕነት ኤርትራዊ ዲሞክራስያዊ ኪዳን ብፖሎቲካዊ ውድባት ክካየድ ዝሓገየ ምምክኻር መድረኽ ብድሕሪ ምውድኡ፡ ብ19 የካቲት 2014 ዝተጸወዐ ህጹጽ ኣኼብኡ ብዓወት ዘዚሙ። ኣጀንዳ ናይዚ ኣኼባ’ዚ ኣብ ውጽኢትን ውሳኔታትን መድረኽ ምምክኻር ፖሎቲካዊ ውድባት ዘተኮረ’ዩ ነይሩ።

ኣብዚ ኣኼባ’ዚ ማእከላይ መሪሕነት ዓሚቕን ጠቓምን ልዝብ ብድሕሪ ምክያዱ፡ ብውጽኢት ናይቲ መድረኽ ምስምምዑ ኣረጋጊጹ። ንመላእ ፖሎቲካዊ ውድባት ዝጥርንፍ ሓደ ሓባራዊ ጽላል ክምስርት ኣብ ስምምዕ ምብጽሑ፡ እዚ ሓይልታት’ዚ ይኹን ህዝብና ዲክታቶርያዊ ስርዓት ህግደፍ ብምውጋድ፡ ፍትሓዊ ትጽቢታቱ ንምርግጋጽ ንዘካይዶ ዘሎ መስርሕ ቃልሲ ተወሳኺ ሓይሊ ምዃኑ ኣሚቱ። ካብዚ እምነት’ዚ ብምብጋስ ከኣ፡ ማእከላይ መሪሕነት ኤዲኪ፡ ብመሰረት እቲ ዝተወሰነ መደብ ሓደ ሓባራዊ ፖሎቲካዊ ጽላል ብቅልጡፍ ንምምስራት ዓቕምታቱ ዘይበቕቕ ምዃኑ ኣረጋጊጹ። ኣኼባ ፖሎቲካዊ ውድባት ኤዲኪ ናብዚ ኣገዳሲ ስምምዕ’ዚ ንምብጻሕ ምስ ካልኦት ኣቦ-መንበራት ውድባት ዘካየድዎ ኣውንታዊ ልዝብን ዝተጻወትዎ ዓቢ እጃምን ናእድኡ ኣቕሪቡ።

ስርሓት ኣሰናዳኢት ሽማግለ 2^ይ ጉባኤ ሃገራዊ ባይቶ ንዲሞክራስያዊ ለውጢ ከም ዝብገስ ምግባር፡ ኣገዳሲ ስጉምቲ’ዩ። ሃገራዊ ባይቶ ከም መድረኻዊ ተደላይነት ገድሊ ዘምጸኦ ኣካል ጥራይ ዘይኮነስ፡ ድሕሪ ውድቀት ዲክታቶርያዊ ስርዓት ህግደፍ’ውን እንተኾነ ናይ ጽኑዕ ህዝብና ድልየት መሰረታዊ ለውጢ ዘውሕስ ከም ምዃኑ መጠን፡ ኤርትራዊ  ዲሞክራስያዊ ኪዳን ኣብ ምህናጽ’ዚ ተሞኩሮ’ዚ ካብ ዝነበሮ ታሪኻዊ ውርሻኡ ብምብጋስን፡ ብህልዊ ተጋድሎኡ ምምእዛዝን፡ ምእንቲ መስርሕ ምስንዳእ ብስሉጥ ንቕድሚት ምድፋእን፡ ተዓዋትነት 2^ይ ጉባኤ ሃገራዊ ባይቶ ንዲሞክራስያዊ ለውጢ ምውሓስን፡ ብኩሉ ዓቕምታቱ ብዘይተጕላባነት ከዓዪ ወሲኑ። እዚ ኣብ ሃገርናን ወጻኢን ዝኽሰት ዘሎ ዘቤታውን ዞባውን ኣህጉራውን ዝተቐላጠፈ ምዕባለታት’ዚ፡ ንተዓዋትነት ጉብኤ ምውሓስ፡ ኩሎም መሰረታዊ ኣካላት ሃገራዊ ባይቶ ኣብ ሞንጎኣቶም ዘሎ ህልው ጸገማቶም ክሰግሩን፡ ኣሰራርሓኦም ከመሓይሹን፡ ምሕዝነታዊ ሓላፍነታዊ ግደኦም ክስከሙን፡ ግድነት ይገብሮ።

ማእከላይ መሪሕነት ኤርትራዊ ዲሞክራስያዊ ኪዳን ቀሪቡ ንዝነበረ ኣጀንዳታት ብዕምቀት ድሕሪ ምምይያጥ፡ ኣብ ውድባውን ሃገራውን ዞባውን ኣህጉራውን መዳያት ዘቐረበ ገምጋማት ኣጽዲቑ። ተጋዳላይ እድሪስ ዓሊ ስዒድ (ኣቦ ሃማም) ኣቦ መንበር ፖለቲካዊ ቤት ጽሕፈት ኤዲኪ ዘቕረቦ ስንብታ ኣጽዲቕዎ። ንገድላዊ  ግደኡ ከኣ፡ ኣሞጕሱ። ብመሰረት ዘሎ ሓጺር ናይ ምስገጋር እዋን ኣብ ጸብጻብ ብምእታው ፖለቲካዊ ቤት ጽሕፈት ኤዲኪ ከምዘሎ ክቅጽል ምግባሩ። ምክትል ኣቦ መንበር ክሳብ 2^ይ ስሩዕ ኣኼባ ማእከላይ መሪሕነት ብውክልና ቦታ ኣቦ መንበር ተኪኡ ክሰርሕ ወሲኑ። ከምኡ’ውን ቁጽሪ ኣባላት ፖለቲካዊ ቤት ጽሕፈት ክማላእ ገይሩ።

ማእከላይ መሪሕነት ኤዲኪ

22 ለካቲት 2014