እዞም ኣብ ዝተፈላለየ ሃገራት እንርከብ ኤርትራውያን ነዚ ኣብ ሃገርና ዘሎ ዓማጺ ስርዓት ንምቅዋም ብተፈላለየ መገዲ ሃገራዊ ጉቡእና ክንፍጽም ጸኒሕና ኣሎናን:: ሎሚ መቐጸልታ ናይቲ ንኣስታት ሓደ ዓመት ከነካይዶ ዝጸናሕና ኩሉንትናዊ ቃልሲ ካብ ዕለት 01|01|2014 ጀሚርና ብወግዒ ንእዉጅ ምህላውና ንኹልኹም ደለይቲ ለዉጢ ክንሕብር ንፈቱ:: ኣብቲ ዝሓለፍናዮ ነዉሕን ኣህላኽን ናይ ሓደ ዓመት ጉዕዞ ኪኖ ንሓድሕድና ምፍላጥን ምትእምማን ን : ስልኳታት ስርዓት ህግደፍ : ሃጓፋት ደንበ ተቓዉሞ : ከነተኣታትዎም ዝግብኣና ናይ ቃልሲ ኣገባባትን ክንግምግም ሓጊዙና እዩ::

ስምና ከምዝሕብሮ : ኤርትራዊ ምንቅስቓስ ንለውጢ (EMC) ኮይኑ ኩሉንትናዊ ኣገባብ ቃልሲ ዘፍቅድ :ብንጹር ራእን ዕላማን ምስ ዝቃለሱ ዉልቀሰባት ኮነ ማሕበራት ድማ ኣብ ሓደ ኣርዑት ክጽመድ ዝፈቅድ እዩ:: ዘመኑ— ዘመን ትኸል ንቐል ምኳኑ ካብ ማንም ዝተሰወረ ኣይኮነን:: ከምኡ’ዉን ካብ ካልእ እዋን ንላዕሊ ንሓድነት ዝጽዓረሉ ዘሎ ወቕቲ ዩ:: ነዚ ድማ’ና ንዝሓለፍናዮ ጉዕዞ ገምጊምና : ብዝሓሸን ኣሳታፊ መንገድን ጉዕዞ ፈሊምና ዘሎና::

ኣብዚ ከይተጠቕሰ ክሕለፍ ዘይብሉ : ምብዛሕ በርጌሳውያን ማሕበራት ኮነ ፖሎቲካውያን ዉድባት ከም መንቅብ ኣብ ዝቑጸረሉ ዘሎ እዋን ኢና ሓድሽ ምንቅስቓስ ንምስርት ዘሎና:: ስክፍታኹም ስክፍታ ኩላህና ምኻኑ’ዉን ክንሓብእ ኣይንደፍርን:: ይኹን ድኣምበር ኪኖ ስክፍታ ብዉድዓውነትን ብኽውንነትን ክንርእዮ’ዩ ዝግባእ:: ልዕሊኩሉ ድማ ሰብ ኣብ ዝመረጾ ክጥርነፍ መሰሉ ምኻኑ ዘይምዝንጋዕ ኣድላይ ይመስለና::

ከም ትዕዝብትና ናይ ግዜ ፍልልይ እንተዘይኮይኑ ብስርዓት ህግድፍ ዘይተገፍዔን ዘይተገርፈን ዜጋ የልቦን:: ከምቲ ካብ መግዛእቲ ሓራ ንምውጻእ ኩለን ብሄራት : ኣውራጃታት : እምነታት : ጾታ … ኮታ መላእ ሕብረተሰብና ከቢድ ዋጋ ዝኸፈለ : ሕጂ’ውን ብኣልማማ ብስርዓት ህግድፍ ይግፍዕ ኣሎ:: ጥሉልን—ንቑጽን : ዝኸሰበን–ዝኸሰረን ኢልና ክንፈላልዮ ኣይንኽእልን ኢና:: እቶም ዝኸሰርና ኩላህና ኮይና : እቶም ዝኸሰቡ ድማ እቶም ብኣጻብዕ ዝቑጸሩ መዳኸርቲ ኢሰያስ ጥራሕ እዮም::

ብተወሳኺ ከም ኤርትራውያን ኣብዞም ዝሓለፉ ናይ ስደት ዓመታት ነናትና ዝኾነ ናይ ቃልሲ ተመኩሮ ኣጥሪና ኢና:: ኩለን ፖሎቲካውያን ዉድባት ኮነ በርጌሳውያን ማሕበራት ሃገራዊ ግቡአን ይፍጽማ’ካ እንተለዋ : ገሊአን ንራኢ መንእሰያት ዘየስተናግዳ ( ዘየአንግዳ ) : መንእሰያት ኮይኖም’ዉን ንምኽርን ተግሳጽን ዓበይቲ ስፍራ ዘይህቡ : ገለ ድማ ብጸቢብነት ዝተጠራነፋ እዮም::

ኣባላት ናይ’ዚ ምንቅስቓስ (ኤርትራዊ ምንቅስቓስ ንለውጢ) ካብ ዝተፈላለየ ድሕረ ባይታን ተመኩሮን ዝተኣኻኸብና ኢና:: ነዚ ድማ ከም ጸጋ ንሪኦ። ምትእኽኻብና ንምስሊ ኤርትራ ዘንጸባርቕ : ካብ ኩለን ኣውራጃታት : ካብ ገለ ብሄራት : ጾታ : ካብ ኩሉ እምነታትን ኮይኑ ንኹሉ ብማዕረ ዝርኢ : ሰብኣዉን ዴሞክራስያዉን መሰል ዜጋታት ድማ ዘወሕስ አዮ:: ብኣውርኡ ኪኖ’ቲ ካብዝተፈላለየ ድሕሪ ባይታን ናይ ቃልሲ ተመኩሮን ምምጻእና ኣብዝሓለፉ 16 ኣዋርሕ ኣሳታፊ ናይ መንእሰያት ማሕበር ኣብ ምምስራት ግዴና ጌይርና ኢና:: ሎሚ ብዝሓሸን ሓቓፊ

ብዝኾነን መንገዲ ንምቅላስ መቐጸልታ ናይቲ ከነካይዶ ዝጸናሕና ኩለንተናዊ ቃልሲ በዚ ኣብ ላዕሊ ዝተጠቕሰ ስም ፈሊምና ኣሎና:: ኣብ ገምጋምና ስርዓት ህግደፍ ቅርስና ዘብረሰ : ታሪኽና ዝደምሰሰ : ራኢና’ዉን ዘጸልመተ እንኮ ተጻይ ህዝቢ ኤርትራ ምኻኑ ኣስሚርናሉ ኣሎና:: ኢሰያስን መሰልቱን ንህዝቢ ኤርትራ ኣይሰብ ለይቱን እዮም:: ኣብ ኤርትራ ካብ ማንም ህዝብታት ዓለም ንላዕሊ ሰብኣዉን ዴሞክራስያውን መሰላት ተረጊኦጹ ኤርትራ ዜጋታታ ብቓጻ ዝስወሩላ ምድራዊት ገሃነም ኮይና ኣላ::

ኣባላት ናይዚ ምንቅስቓስ (EMC) ኣብ ሃገርና መሰረታዊ ለውጢ ንምምጻእ ሰላምን ዴሞክራስን ዘለዋ ሃገር ንምህናጽ ምስ ብመትከልን ራእን ዝሳነዩና ዉልቀ ሰባት ኮኑ ትካላት ክንሰርሕ ኢና:: ኣብዚ ዝሓለፈ ሓደ ዓመት ዓቕሚ ሰብና ንምኽዕባት : ኣብ ሓደ መረዳእታ ንምምጻእ : ንቕየደሉ ቅዋምን ዉሽጣዊ መምርሒ ሕግን ኣብ ምንዳፍን ኢና ጸኒሕና:: ራኢና ብቕዋምን ስርዓተ ሕግን ዝምራሕ ህዝባዊ መንግስቲ ምምስራት እዩ። እቲ ዝምስረት ህዝባዊ መንግስቲ ንኽውንነትን አቃውማን ህዝቢ ኤርትራ አብ ግምት ዘእተወ : ንምስሊ ኤርትራ ዘንጸባርቕ : ፍልልያት ዘጽብብ : ሕድሪ ሰማእታት ዝፍጽም : ንህዝብና ካብ ድንቁርናን ዓዘቕቲ ድኽነትን ዘውጽእ : ምስ ጎረባብትናን ዓለምን ኣብ ዞባውን ኣህጉራውን ውዕላት ምርኩስ ዝገበረ ኣብ እንካን–ሃባን ዝተመስረተ ዝምድና ክህሉ ንቃለስ። ብተወሳኺ ኤርትራ ንዜጋታታን ንመጻእተኛታትን ደሴት ሰላም ንኽትከውን ኣበርቲዕና ንጽዕር።

ብምቕጻል ክሳብ ሕጂ ንፋስ ዓዶም ተሓሪምዎም : ሰለም ከየበሉ ኣብ ቃልሲ ተጸሚዶም ንዘለዉ ገዳይም ተቓለስቲ ንሞይኦም ንሙጉስ። ኣበርቲዖም ክጽዕሩን : ተመኩረኦም ከውርሱን ድማ ንምሕጸን። ብተወሳኺ ነዚ መተካእታ ክኸዉን ዝቃለስ ዘሎ ሓድሽ ወለዶ ብሓድሽ ኣተሓሳስባን ግልጹነትን : ተሓታትነት ብዘለዎ መገዲ ኣሳታፊ ተራ ክጻውት ለበዋና ነሕልፍ።

ምንቅስቓስና ነቲ ዝተጠቕሰ ራኢ ኣብ ሽትኡ ንምብጻሕ ዝምእክልዎ መራሕቲ ብዲሞክራስያዊ መንገዲ መሪጹ ይርከብ። ንዝያዳ ሓበሬታ : ቅዋም ኮነ ፎርም ኣባልነት ንምርካብ ኣብ’ዚ ዝስዕብ መርበብ ሓበሬታ ተወከሱ። ናይ ኢመይል ኣድራሻናን ፈይስ ቡክን እዚ ዝስዕብ እዩ። ርእይቶ :ሕቶ ከምኡ ዉን ሓበሬታ ኮነ ሃናጺ ጽሑፋትኩም ንኽንቅበል ማዕጾና ኩፉት እዩ።

ኣብዚ ዝሓለፍናዮ ናይ ሓደ ዓመት ጉዕዞ ብምኽሪ : ብሓበሬታ ኮነ ካልእ ደገፋት ንዝለገስኩምልና ምስጋናና ዓቢ እዩ። ደጊምና ምትሕብባርኩም ኣይፈለየና ንብል።

Website:http://www.emcnews.org

Email:eritreaemc@gmail.com

Facebook:eritreaemc@gmail.com

ዓወት ንህዝቢ ኤርትራ

ውድቀት ንስርዓት ህግድፍ

ኤርትራዊ ምንቅስቓስ ንለውጢ ….

01|01|2014