ኣብ ሚኒስትሪ ዜና ን14 ዓመት ዝገልገለ ጋዜጠኛ ሰናይ ገብረመድህን ንስርዓት ህግደፍ ብርሕራሕ ናብ ኢትዮጵያ ከምዝኣተወ ካብ ቴለቪዥን ኢትዮጵያ ዝረኸብናዮ ሓበሬታ ኣረዲኡ።

ጋዜጠኛ ሰናይ ኣብ 1998 ኣብ መንጎ ኤርትራን ኢትዮጵያን ኵናት ምስ ተባርዐ ካብቶም ፈለማ ናብ ኤርትራ ዝተሰጎጉ ኤርትራውያን ግዳያት እዩ። እንሆ ድማ ሕጂ፡ ብሰንኪ ዕመጸጻ ዲክታተርያዊ ስርዓት ህግደፍ ናብታ ዝተሰጎጎላ ሃገር ተመሊሱ።

ንሱ ኣብ ቴለቭዥን ኢትዮጵያ ኣብ ዝሃቦ ቃል፡ ማዕከናት ዜና ስርዓት ህግደፍ፡ ኣብ ኤርትራ ንዘሎ መከራን ዕንወትን ከዊሉ ናይ ዓለም ከክፉኡ ዜናታት ኣራርዩ ብምውራይ፡ ኤርትራ ካብ ዓለም ዝበለጸት ኣምሲሉ ንህዝቢ ኤርትራ ንምድንጋር ካብ ክዉንነት ርሒቑ ክልፍልፍ ከምዝነብር ኣገንዚቡ።

ባህርያት ዲክታተርያዊ ስርዓት ህግደፍ ናጽነት ምግላጽ ሓሳብን ፕረስን ከምዘየፍቅድ ብምምልካት ድማ፡ ስርዓት ህግደፍ፡ ንኹሎም’ቶም ኣንፈት ኤርትራ ንምቅናዕ ዝመኸሩዎን ዝነቀፉዎን መሳርሒ ወጻኢ ሃገራት ኢሉ ብማእሰርቲ የሳቕዮም ምህላዉ ኣረዲኡ።

ኣቐድም ኣቢሉ፡ ንስርዓት ህግደፍ ዝራሕረሐ ጋዜጠኛ ኣማኑኤል ማህደረ ‘ውን ብተመሳሳሊ፡ ንፍሽለት ማዕከናት ዜና ህግደፍን እቲ ስርዓት ብቐንዱን ከምዘቃለዐ ይፍለጥ።

ቪድዮ ንምርኣይ ኣብዚ ጠውቑ።