ኣብ ዓዲ ጥልያን ዝመደበሩ ኣብ ቃልሲ ንናጽነት ልዑል ኣበርክቶ ካብ ዝገበሩ ገዳይም ተቓለስቲ ዶር ተወልደ ተስፋማርያም (ወዲ ቫካሮ)፣ ትማሊ 9 ሕዳር ኣብ ኦክላንድ፣ ካሊፎርንያ (ሰሜን ኣመሪካ) ኣብ ዘካየዶ ፈላሚ ዕዉት ኣኼባ፣ ድሕነት ሃገር ብምውሓስ፣ ኣብ ኤርትራ ዲሞክራስያዊ ለውጥን ፍትሕን ንምርግጋጽ መታን ክከኣል፣ ብዘይ ወዓል ሕደር ንኹሉ ኤርትራዊ ዝጥርንፍ ሰፊሕ ሃገራዊ ምትእኽኻብ ክግበር ከምዘለዎ ጸዊዑ።

“ይኣክል፣ ኢሳይያስ ካብ ስልጣን ክወርድ ኣለዎ” ‘ውን ኢሉ።

ኣብቲ ኣብ ኦክላንድ ዝተኻየደ፣ ብብዝሒ ተሳተፍቱ ፍሉይ ዝነበረ ኣኼባ፣ ምስ ታሪኽ ቃልሲ ህዝቢ ኤርትራ ንናጽነትን፣ ኣቦታት ቃልስን ኣተኣሳሲሩ ኣድላይነት ሓድነት ንለውጢ ወሳኒ ምዃኑ ኣስሚሩሉ።

ነቲ ኣብ ዝሓለፈ ወርሒ ኣብ ገማግም ባሕሪ ላምፐዱዛ ዘጋጠመ ልዕሊ 350 ኤርትራውያን ብሓደ እዋን ዘህለቐ ዘሕዝን ፍጻመ ብምዝካር ከኣኣ፣ እዚ ንህዝቢ ኤርትራ ዘጕሃየ ከቢድ ጥፍኣት’ዚ ንኢሳይያስ ከምዘይዓጀቦ ኣገንዚቡ። “ናይ ህዝብናን ሃገርናን ሓልዮት ዘለና ኤርትራውያን፣ ንኢሳይያስ ካብ ስልጣን ክእለ ሓቢርና ክንጽውዕ ሓላፍነት ኣለና” ‘ውን ኢሉ።

ኣስዒቡ፣ ነዚ ግዜ ዝጠልቦ ህጹጽ ለውጢ ንምርግጋጽ፣ ፍልልያት ብምውጋድ ኩሉ ኤርትራዊ በብኸተማኡ ተወዲቡ ክዓዪ ኣተሓሳሲቡ።

ብኻልእ ወገን፣ ኣብ ስደት ዘለው ኤርትራውያን ምሁራት ሃገራዊ ሓላፍነቶም ብምዝካር ኣበርክቶኦም ከዕዝዙ ‘ውን ጸዊዑ።

ኣብ መወዳእታ ናይቲ ኣኼባ፣ ዶር ተወልደ ተስፋማርያም ካብ ኣኼበኛታት ዝቐረበሉ ሕቶታት መሊሱ።

ወዲ ቫካሮ፣ ኣብዚ ንሃገራዊ ምትእኽኻብ ብዝምልከት ኣብ ኦክላንድ ዝጀመሮ ናይ ሰሜን ኣመሪካ ዑደት፣ ኣብ ላስ ቬጋስ፣ ኣትላንታን ዋሺንግተን ዲሲን ብተኻታታሊ ክቕጽሎ ምዃኑ ይፍለጥ።

ክቡራት ተኸታተልትና፣ ዶር ተወልደ ተስፋማርያም (ወዲ ቫካሮ) ናይ ኣመሪካ ዑደቱ ምስ ፈጸመ፣ ትሕዝቶ ናይቲ ዘቕረቦ መልእኽቲ ብምሉኡ ከነቕርበልኩም ኢና።