ነፍሲ  ወከፍ  ሕብረ-ተሰብ  ዓለምና  ዝልለየሉን  ዝፈልዮን  ባህልታትን፡  ልምድታትን፡  ታሪኽን  ኣለዎ። እዚ መለለዪ’ዚ  ድማ  መግለጺ መንነቱ  ኮይኑ  ኣብ  ሕብረ-ተሰብና  እከለ ከም’ዚ ዓይነት  ተግባር  ኣኽብሮት  የውህቦ ፡ ከም’ዚ  ዓይነት  ጠባይ  ከኣ ዉጉዝ’ዩ  ተባሂሉ  ይፍለጥ።  ህዝቢ ኤርትራ  እውን  ፍሉይን  ሃብታምን  ዝኾነ  መለለዪ  ባህልን  ክብርን  ከምዘለዎ  መጠን፡ ኣብ መዓልታዊ  ህይወቱ  ዘሰላስሎም  ባህልታትን  ልምድታትን  ኣለዎ።  ኣብ  ግዜ  ሓዘን  ንሓዘንተኛታት  የጸናንዕ፡ ኣብ  ግዜ  ሓጎስ  ከኣ  ተኻፋሊ  ሓጎሶም  ይኽውን። ከም  ዝፍለጥ  ድማ  ኣብ  ዝሓለፈ  ወርሒ  ኣብ ላምፓዱዛ  ኢጣልያ  ዝተፈጸመ  ( ዝወረደ ) ዓቢ  ሃገራዊ  ህልቂት  መሰረት  ብምግባር፡ ኣብ ኩሉ  ኩርናዓት  ዓለም   ዝርከብ  ህዝብና   ዓቢ  ናይ  ሃገራዊ  ሓዘን  ኣዊጁ፡ ብሓባር  ሓዚኑን  መረረኡ  ገሊጹን ። በቲ  ኩቡር  ባህሉ  ድማ ንሓዘንተኛታት  ኣደዓዒሱ። ከም  መቀጸልታኡ  ድማ፡ “ ድሕሪ ደጊም ይኣክል !“  ብምባል ተቢዑ  ክቃለስ ወሲኑ። ከም  መቐጸልታ ኣብ ኩሉ ኩርናዓት ዓለም ብፍላይ ከኣ ኣብ ሰሜን ኣመሪካ  ዝገበሮ ኣኼባታቱ  ድማ  ትማሊ  መዓልቲ  ማለት  ሕዳር 24, 2013፡  ኣብ  ስያትልን  ከባቢኣን  ዝተገብረ  መኣዲ  ዘተ  ደቂ  ሃገር  ኣብ  ትሕቲ  “ ሓድነትና  ናይ ዲሞክራሲ መፈትሕ’ዩ  !”  ዝብል  ቴማ። ቁዱስ  ቅንኢ  ዘሓደሮ  ኤርትራዊ  ደላዪ  ፍትሒ  ዝተኣከቦ  መድረኽ፡ ብኣድላዊት  ሽማግለ  ስያትልን  ከባቢኡን  ብዝተዳለወ  ኣካታዒ  ሓሳብን፡ መድረኽ፡ ተደራቢ ዓወትን  ብሩህ  መንፈስን  ብዘርኢ  ኣጋጣሚ  ተኸፊቱ።  ኣብ’ቲ  ዝተራእየ  ህሞት፡ ኩሉ  ደላዪ  ፍትሒ  ዝኾነ  ነባሪ  ከተማ  ስያትልን  ከባቢኣን ፡  ብዘይ ዝኾነ  ኣፈላላይ፡ ሃይማኖት፡ ኣውራጃ፡ ዓሌትን  ኣከባብን  ከይተጸልወ፡ ኣብ’ዚ  ዘሎ  ኩነታት  ሃገርና፡ ኣዝዩ  ተተንኪፉን  ሓሚሙን  ከምዘሎን፡ ልዕሊ  ኩሉ  ደማ  መንደዓት  ኮይኑዎ  ዘሎ  ውልቀ  መላኺ  ኢሳይያስ  ኣፍወርቅን  ሰዓብቱን  ካብ  ስሮም  ምሕዩ  ንምጥፋእ፡ ንቃልሲ  ድሉው  ከምዘሎን  ኣስሚሩሉ። ካብቲ  ቀንዲ  ኣርእስቲ  ኮይኑ  ዝወዓለን፡ ናይ ኩሉ  ተሳታፊ  ርኢቶን  ዝነበረ  ከኣ፡ ኩሉ  ኤርትራዊ  ንሓድነት  ሃረር  ይብላ  ከም ዘሎን፡ ሓቢሩ ከድምዕን፡ ከልምዕን  ከምዝኽእል  ዘመስከረ መድረኽን’ዩ  ኔሩ። ኣብ’ዚ ኣካታዒ  ህሞት እዚ፡ ኩሉ ሃገራዊ ብዘለዎ  ዓቕሚ  ክሰርሕን፡ ልዕሊ ኩሉ ድማ ሃገራዊ ዕማም ኣቕዲሙን፡ መሰረታዊ  ዝኾነ  ጠለባት  ማለት  ምድሓን ህዝብን፡ ሃገርን፡  ኣበርቲዑ ክሰርሕን ምዃኑ ኣረጋጊጹ።

ቀጺሉ  እቲ  ናይ  ሓድነት  ኣርእስቲ  ኮይኑ  ቀንዩ  ዘሎ  ኣቦናን  ሓውናን  ዶክቶር  ተወልደ  ተስፋማርያም ( ወዲ ቫካሮ )፡ ከም መቐጸልታ  ናይ ሰሜን ኣመሪካ ዑደቱ፡  ኣብ  ስያትል’ዩ  እግሪ  ኣንቢሩ።  ንህዝቢ ከም ልሙድ ቃናኡ “ ሓድነት “ ብምስማዕ ህዝቢ ሓቢሩ  ክሰርሕን፡  ቅድሚ  ኩሉ  ድማ  ድሕነት  ህዝብን  ሃገርን፡ ከሓስብን  ከምዘለዎ  ብምልባው፡  “ ማሕላ  ሓድነት  ተመሓሒልና ክንወጽእን ፡ ከም’ቲ  ቅድሚ  ሕጂ  ንሕና  ኤርትራውያን  ከይንሰማማዕ  ተሰማሚዕና  ኢና  ዝበሃል  ዝነበረ  ዘይኮነስ፡  በዛ  ሎሚ  ዕለት  ኤርትራውያን  ተሰማሚዕና  ኢና  ንበል !”   ክብል  ኣድህቦ  ተሳታፊ  ዝረኸበ  ለበዋ ሓዘል  ዝኾነ  ምኽርን  ኣስተምህሮን  ኣቕሪቡ።  ኣብ መደረኡ  ብምቕጻል  ክቡር  ኣቦናን  ሓውናን  ዶክቶር  ተወልደ፡ ኣብ  መስርሕ  ገድልና  ዓቢ  ዝኾነ  ጌጋታት እንዳተፈጸመ  ከምዝመጸን፡ ያዕ  ዝብሎ’ውን  ከምዘይነበረን  ኣስሚሩሉ። ሎሚ ኢሰይያስ ከምቶም ዘሓለፉ ባዕዳውያን ገዛእቲ አትዮጵያውያን  “ ኤርትራ መሬታ’ምበር ህዝባ ኣየድልየንን’ዩ “ ብዘስምዕ ንህዝቢ ኤርትራ ባልማማ የጽንት ከምዘሎን  ኩሉ ወዲ  ሃገር ዓይኑ ከፊቱ  ከስተብህልን  ብድሆ  ንዓመጻ፡ ብድሆ  ንዳግማይ መግዛእቲ  ክብልን  አጅገኡ  ሰብሲቡ  ክቃለስን  ተላብዩ ።  እቲ ዝተገብረ  ሕማቕ ኣጋጣሚ ድማ ናይ’ዚ ሕጂ ወዲቕናዮ ዘለና ህሞት ጠንቂ ከም ዝኾነ  ኣለሊና  ሽግራትና  ኣጽቢብና  ክንሰርሕን  ንቕድሚት  ክንምርሽን  ከም  ዝግበኣና  ተላብዩ።  እቲ ዘሓለፈ ታሪኽ  ከይድገም  ድማ  ዓቲብና  ክንለዓልን፡ ንመሰልናን  ፍትሒ ኩሉ ኤርትራውን  ደው ክንብልን፡ ንስለ ፍትሒ ክንቃለስን  ተላብዩ።  እቲ  ናይ  ትማሊ  ዝተገብረ  ታሪኽ  ድማ፡  ታሪኽ  ህዝቢ  ኤርትራን  ታሪኽ ጀጋኑን  ሙዑታትን  ደቂ  ህዝቢ  ኤርትራ  ደኣ’ምበር፡ ታሪኽ  ኢሰይያስን  መጋብርቱን  ከምዘይኮነ  ደጊሙ  ኣስሚሩሉ።

ዶክቶር  ተወልደ  ኣስዒቡ ኣብ መደረኡ፡  ንሕና  ከም ኤርትራውያን  ብመንነትና  ኩሩዓትን  ሕቡናትን  ከም ምዃና  መጠን፡  በቲ እንሕበነሉ  ባህልን  ታሪኽን  ክነብር  ከምዘለና  ተላብዩ። ከም መቐጸልታ መደረኡ፡ ብመበቆል  ዓዱን፡ ብኣውራጃኡን፡  ብሃገሩን ዘይሕበን  ታሪኽን  መንነትን  የብሉን።  ንሕና  ኤርትራውያን  ድማ   ሃብታም  ዝኾነ  ታሪኽን  ባህልን፡ ካብ ኣቦታትናን ኣቦሓጎታትናን  ዝወረስናዮ  ባህልን፡ ልምድን  ከምዘለናን፡ እኳ ደማ ክንሕበነሉን ኽንጽወዓሉን ከም ዝግበኣና ደጊሙ ኣስሚሩሉ።  ኣነ  ተወላዲ  ኣውራጃ  ኣከለን-ጉዛይን፡  ኣውራጃ ሓማሴን፡  ኣውራጃ ሰራየ፡ ወዲ-ሰንሒት፡  ወዲ ጋሽ ባርካ፡ ወዲ  ቀይሕ-ባሕሪ፡  ወይ ድማ  ወዲ  ደንከል’ያ  ወዘተ  ምባል  ዝነበረን  ዘሎን  ዝህሉን  ታሪኽና   ምዃኑ’ዩ  ገሊጹ።  ደቂ  ሃገር  ዘይምዃኖም  ከፍልጡ  ግን  ንሕና ኤርትራውያን  ባይቶ  ዓድን፡  ሕጊ  እንዳባን  ከምዘይብልና  ብስምና  ከይንጽዋዕ  ኣጊዶሙና።  እዚ  ከኣ  ንእከይ  ተግባራቶም ንክጥዕሞም  ዝገበሩዎን፡  መንነቶም   ንከይቅላዕ ዝኣለምዎ  ተንኮል  ከምዝኾነን  ደጊሙ  ኣስሚሩሉ።  ስለ’ዚ ድማ  ንሕና  ኤርትራውያን  እዚ  ሃብታም  ዝኾነ  መለለይናን  ባህልናን  ባህሊ  ዓደቦናን  ዓቂብና፡  ብኽብርን  ፍቕርን  ክንነብር  ከም  ንኽእልን  ኣሚንና  ክንኮርዓሉ  ይግበኣና  ብምባል  ለበዋኡ  ኣመሓላሊፉ።  በዚ መስረት ድማ ኣብ ስያትል ዝርከብ ህዝብና ምስ ኣብ ከባቢኡ ንዘለዉ ደለይቲ  ፍትሒ ኮይኑ ናይ ሓባራዊ  ዕማም  ክሰርሕን፡  ኪነኡ’ውን  ዝኸደ  መድረኽን፡ ግዜን  ብዝጠልቦ  ሓቢሩ  ከም  ዝሰርሕ ኣስሚሩሉ ይርከብ።

ነዚ ምዕርይን ሰፊሕን ክፉት ኣኼባ ናይ ህዝቢ ካብ ምሉእ ሰሜናዊ ምዕራብ ኣሜሪካ ማለት ካብ ከተማታት ቫንኮቨር ዋሺንግቶን፡ ቫንኮቨር ካናዳ፡ ፖርትላንድ ኦሮጎን፡ ተሳቲፈሞ ዝወዓሉ ክቡር ኣኼባ ኢዩ ተኻይዱ።

ዝኽሪ ነቶም ስሌና ዘሓለፉ ኩቡራት ስወኣትና

ዓወት ንዝህቢ ኤርትራ

ፍትሒ ይንገስ

ሰላም ይንፈስ

ኣዳላዊት  ኮሚቴ  ሽማግለ  ስያትልን  ከባቢኣን

24 ሕዳር 2013