ዳይረክተር ሓልዮት ሰብኣዊ መሰላት ኤርትራ ኤልሳ ጭሩም፣ ኣብ ቤትማእሰርቲ ጅቡቲ ኣብ ሕማቕ ኩነታት ዝርከቡ ኤርትራውያን ፍታሕ ክረኽቡ፣ ኣብ ቀጽሪ ቤትጽሕፈት ውድብ ሕቡራት ሃገራት ኤምባሲ ጅቡቲ፣ መግቢ ናይ ምሕሳም ተቓውሞ ተካይድ ከምዘላ ካብ ራድዮ አረና ዝረኸብናዮ ሓበሬታ ኣረዲኡ። ኣብ ኩሉ ኩርናዓት ዓለም ዝርከቡ ኤርትራውያን ኣብ ቀጽሪ ኤምባሲታት ጅቡቲ ተቓውሞታቶም ከስምዑ ጸዊዓ ከምዘላ ‘ውን ይጠቅስ።

ካብ 2008 ኣትሒዞም ንኣስታት ሽዱሽተ ዓመታት ኣብ ቤት ማእሰርቲ ነገድ ዝሳቐዩ ዘለዉ ኤርትራውያን፣ መንግስቲ ጅቡቲ ዝኾነ ቆላሕታ ክህቦም ኣብ ርእሲ ዘይምኽኣሉ፣ ነዞም ካብ ምልካዊ መንግስቲ ኤርትራ ሃዲሞም ዑቕባ ዝሓተቱ መንእሰያት ኣህጉራዊ ማሕበረሰብ’ውን ጸምማም እዝኒ ሂቡዎም እዩ።

መንግስቲ ጅቡቲ፣ ነቶም ዶቡ ሰጊሮም ዑቕባ ዝሓቱ ከም ምሩዃት ኵናት ዝሓዞም ኤርትራውያን፣ ግቡእ ሕክምና፣ ጽሬትን ዝተመጣጠነ መግብን ስለዘየቕርበሎም ግዳያት ዝተፈላለየ ሕማማት ኮይኖም ይሳቐዩን ይሞቱን ከምዘለዉን ይፍለጥ።

ኣብ ዝሓለፈ ወርሒ ብሰንኪ ሕማቕ ኣተሓሕዛ፣ ሓደ ኤርትራዊ ዓሪፉ እዩ። ኣብ ጅቡቲ ኣብ ቤት ምእሰርቲ ነገድ ተታሒዞም ካብ ዘለዉ 16 ኤርትራውያን ምሩኻት ኵናትን ኣስታት 240 ስደተኛታትን ሰኣን ግቡእ ሕክምናን ክንክንን ዛጊት ሰለስተ ሞይቶሞም ከምዘለዉ’ውን በብእዋኑ ዝተቓልሑ ጸብጻባት የመልክቱ።

ምልካዊ ስርዓት ኢሳይያስ ምስ ጅቡቲ ኣብ ዶባት ኣብ ዘካየዶ ውግእ ንዝተማረኹ ዜጋታት ጅቡቲ ሃለዋቶም ኣጥፊኡዎ ስለዘሎ፣ ኣሰሮም ከይረኸበ ኣብ ልዕሊ’ቶም ኤርትራውያን ምሩኻት ይኹን ዑቕባ ንምሕታት ናብ ጅቡቲ ኣትዮም ዘለዉ ኤርትራውያን ቆላሕታ ከምዘይገብር ብተደጋጋሚ ይጠቅስ።

መንግስቲ ጅቡቲ፣ ኣብ ልዕሊ ‘ቲ መጻብእቱ ዝኾነ ምልካዊ ስርዓት ኢሳይያስ ሕነ ንምፍዳይ፣ ነቶም ግዳይ ናይቲ ስርዓት ኮይኖም ዝተማረኹን ዝተሰደዱን ኤርትራውያን ክቐጽዕ ግቡእ ኣይኮነን።