ደምዳሚ ኣዋጅ

ማእከላይ ሽማግለ ሰልፊ ደሞክራሲ ኤርትራ ሳልሳይ ምዱብ  ኣኼባ ኣብ ታሕሳስ 21፤ 22፤ 28 2013 ዓ.ም  ኣካይዱ።  ሰልፋዊ ስርሓትን፤ ህሉው ኩነታት ህዝቢ ኤርትራን ስርዓት ህግደፍን፤ ተራና፡ አብ ምቅልጣፍን ምውዳቕን ስርዓት ህግደፍ፤ ኩነታት ደንበ ተቓውሞን ኣተሃላልውኡን ገምጋምን ኣካይዱ። ኣብ ኩሉ ዝግበር ዘሎ ጸረ ህግደፍ ምልዕዓላትን ቃልስታትን ብዕምቆት ርእዩ፡ ሃገርና ኣብዚ እዋን’ዚ ኣብ ከቢድ ተሃዋሲን ተኣፋፊን ኩነት ከም ዘላ ገምጊሙ።

1. ህግደፍ ኣብ ህውከት እምበር አብ ሰላም ክነብር ዘይክእል ስርዓት ምዃኑ ማእከላይ ሽማግለ ዳግማይ አረጋጊጹ። ስርዓት ህግደፍ ድሕሪ ምንቅስቓስ 21 ጥሪ (ስርሒት ፎርቶ) ኣብ ሓድሕዱ ዘይተኣማመነሉ ደረጃ በጺሑ። ናይ ውደባውን ጸጥታውን ጉዳያት ሓለፍቲ ህግደፍ ዝርከብዎም ሓያሎ ሓለፍትን ካድራትን ስለ ዝኣሰረ፡ ፖለቲካዊ ሰረቱ ኣዝዩ ጸቢቡ ኢዩ። ስለዚ እቲ ኣብ ስልጣን ዘሎ ጉጂለ፡ ነቲ ጉጂለኡ እንተዘይኮይኑ፡ ኣብዚ ሰዓት’ዚ ዝውክሎ ክፍሊ ህዝቢ ኤርትራ የብሉን። ከምኡውን ቁጠባዊ ሰረቱ ተሓሚሱ ኢዩ። ናይ ወጻኢ ሸርፊ ከምዘይብሉ ኢዩ ዝንገር፡ እቲ ብሰንኪ ቁጠባዊ ፖሊስኡ ተፈጢሩ ዘሎ ቁጠባዊ ቅልውላው በቲ ሓደ መዳይ፡ እቲ ኣብ ሓድሕዱ ምብልላዕ ፈጢርዎ ዘሎ ጽበት፡ ፖለቲካዊ ሰረት ናይቲ ስርዓት ኣብ ግምት ምስነእቱ፡ ብቐሊሉ ኣብ ቅልውላው ክኣቱ ይኽእል ኢዩ ዝብል ግምት ኣሎና።
2. ቅድሚ ሕጂ ኣብ ደንበ ተቛውሞ ዝግበር ዝነበረ ምትእኽኻባት ማለት፡ ኣብ ኤርትራዊ ዲሞክራሲያዊ ኪዳን ይኹን ብድሕሪኡ ኣብ ኤርትራዊ ሃገራዊ ባይቶ ንዲሞክራሲያዊ ለውጢ ዝማእከሉ ምትእኽኻባት ብመትከል ቁኑዕ ኢዩ። ኤርትራዊ ሃገራዊ ባይቶ ንዲሞክራሲያዊ ለውጢ ቡዙሓት ሓሊኾሞ ዘሎዉ ሮቛሒታት እኳ ይሃልዉ፡ እቲ ዝሓሸ ምትእኽኻብን ነጸብራቕ  ሕብረተ-ሰብ ኤርትራ ምዃኑ ሰልፍና ይኣምን። ኣብ ዝመጽእ ዘሎ ጉባኤ፡ ነቶም ዘሎዉ ሽግራት ኣብ ምፍታሕ ብዕቱብ ክስራሕ ምዃኑ ድማ ገምጊሙ።
3. መንእሰያት ኣብ ዝተፈላለየ ኩርንዓት ዓለም ድምጾም ከስምዑ ምጅማሮም ኣዎንታዊ ኣበርክቶ ነዚ ዝካየድ ዘሎ ቃልሲ ንዲሞክራሲያዊ ለውጢ ኢዩ። እንተኾነ ኣብ ሓድሕዶም ንዝገብርዎ ምክሳሳት ስክፍታና ንገልጽ። ብስሩ እውን ውድባት ኣብ ኣተሓሳስባ ተሞርኪሶም ክፍጠሩ ኣሎዎም ደኣምበር፡ ኣብ ዕድመን ግድምናን ተሞርኪሶም ዝፍጠሩ ውድባት ጸገም ከየጋጥሞም ንስከፍ። ምኽንያቱ ድማ ኣብዚ ዝካየድ ቃልሲ ተወፍዮም ክሕዝዎን፡ መስዋእቲ ክኸፍሉሉን ኣሎዎም ዝብል ጽኑዕ እምነት ስለ ዘሎና ኢዩ።
4. ማእከላይ ሽማግለ ሰልፊ ዲሞክራሲ ኤርትራ፡ ሽግር ደንበ ተቓውሞ ብመሰረቱ ናይ ዲያስፖራ ተቓውሞ ብምኻኑ ኢሉ ይኣምን። ኣብ ዲያስፖራ ዝግበር ምንቅስቓስ ኣድማዕነቱ ውሱን ምዃኑ ናይ ቀረባ 10 ዓመት ተሞክሮና ዓቢ ምስክር ኢዩ። ስለዚ እጃምና መታን ከነበርክትን ኣድማዕነት መታን ክህልዎ፡ ኣበየ ቦትኡ ዝተፈላለየ ኩርናዓት ዝቀላቐሉ ናይ ዲያስፖራ ምንቅስቓሳት መእሰሪ ዘይብሉ ማእዶ መታን ኮይኑ ከይተርፍ፡ ምትእኽኻብ ናይ ኩሎም ዝንቀሳቐሱ ኣካላት ማለት ሓደሽቲ ይኹኑ ነባራት፡ ብግሉጽን ንኹሉ ዝሓቁፍን ምትእኽኻብ ከድሊ ኢዩ፡ ነዚ እማመ ድማ ኣብ ግብሪ ንምውዓል ሰልፊ ዲሞክራሲ ኤርትራ ዓቕሙ ከበርክት ከምዘሎዎ ማእከላይ ሽማግለ ወሲኑ።

ዓወት ንህዝቢ!

ሰልፊ ደሞክራሲ ኤርትራ

31/12/2013