ደሃይ ካብ ኤርትራ

ድኳን ሕድሪ

ኣብ ዱካናት ሕድሪ ክሽየጥ ዝጸንሐ ኣስቤዛ ካብ ዝሓለፈ ወርሒ ታሕሳስ ጀሚሩ ደው ኢሉ ቀንዩ ኣሎ።

እቲ ምኽንያት ድማ ኣስቤዛ ተወዲኡ እተን ደዃኩን ጥርሐን በረውረው ይብላ ስለዘለዋ ዩ። ንኣብነት ኣብ ኣስመራ፣ ገዛውትና ትርከብ ዱካን ሕድሪ ጥርሓ ተሪፋ ምህላዋ ዝሓለፈ ሰሙን ክሽምት ኣብ ዝኸድክሉ ተዓዚበ። ንካልኦት ኣባላት ስድራቤትና  ኣብ ዝሓተትክሉ እቲ ተርእዮ ኣብ ምሉእ ኣስመራ  ምዃኑ ተሓቢረ።  ስለዚ ኸኣ ህዝቢ ብኽቡር ዋጋታት ካብ ዕዳጋ ክሽምት ተገዲዱ ኣሎ።

ብወረ ከም ዝንገር ኣስቤዛ ኣብ ወደብ ባጽዕ ተራጊፉ ናብ ኣስመራ መምጺኢኡ መጓዓዝያ ከምዝተሳእነ ‘ዩ ።

ብዕለት 6 ኣብ ዓዲ ኣበይቶ ኣብ ዝርከብ ዱኳን ሕድሪ ዘይቲ መጺኡ ተባሂሉ ህዝቢ ክሽምት ክጸቓቐጥ ውዒሉ።

ኣብ ዝሓለፈ ዓመታት መንግስቲ ንዕዳጋ ኮነ ኢሉ ቀቲሉ ህዝቢ ንመሰረታውያን ሃለኽቲ ኣብ ኩፖናዊ ስርዓት ምሉእ ብምሉእ ከምዝምርኮስ ንምግባር እዩ ሰሪሑ። እንተኾነ፣ ነቲ ድኳን ሕድሪ ኢሉ ባዕሉ ዝፈጠሮ ዘይንቡር መሸጣ ሃለኽቲ ‘ውን ከካይድ ከምዘይክእል ብግብሪ ይረአ ‘ሎ።

እሱራት ስግረዶብ

ስርዓት ህግደፍ ብምኽንያት ምስግጋር ዶብን ምስ መሸጣ ኤርትራውያን ኣብ ሲናይ ዝተኣሳሰር ጉዳይን ተኣሲሮም ዝነበሩ 19 ሰባት ነጻ ለቒቑ።

ሽዱሽተ ካብቶም ካብ ቤትምእሰርቲ ዝተለቁ እሱራት፣ ካብ ወጻኢ ናብ ኤርትራ ኣትየን ዝነበራ ደቀንስትዮ ምዃነን ተፈሊጡ።

ዝበዝሑ ካብዞም ነጻ ዝተፈትሑ ምስ ሰበስልጣን ናይቲ ስርዓት ርክብን ዝምድናን ዘለዎም እዮም። ሓደ ካብቶም ነጻ ወጺኦም ዘለዉ ብስግረዶም ዝተኸሱ ሰባት ናይ ቀረባ ቤተሰቡ ንሓጎስ ክሻ ከምዝኾነ ይንገረሉ።

ኣብ ኣስመራ ዝርከቡ ነዚ ኩነታት ብኣንክሮ ዝተዓዘቡ ግዱሳት ኤርትራውያን፣ እቶም ፖለቲካዊ መኣዝን ኤርትራን ጥፍኣት ህዝብን ኣሻቒሉዎም ነቲ ስርዓት ስለዝነቐፉን ዝወቐሱን ብፖለቲካዊ ምኽንያት ተኣሲሮም ዘለዉ ንሓያለ ዓመታት ደሃኦም ጠፊኡ ከሎ ፣ ነቶም መንእሰያት ካብ ኤርትራ ኣብ ምውጻእ ተሓባቢሮም ኢሉ ሒዙዎም ዝጸንሐ ኣብ ሓጺር ግዜ ነጻ ምልቃቑ ፣ ስርዓት ኢሳይያስ ጥፍኣት ህዝቢ ኤርትራ ዘይግድሶ ንባዕሉ ተሓባባሪ ናይቲ ንኤርትራ ናይ ምጽንቃቕ ተግባር ምዃኑ ዘንጸባርቕ እዩ ክብሉ ይስምዑ ኣለዉ።