ደሃይ ካብ ኤርትራ
ኣባላት ሚኒስትሪ ዜና ክሳብ’ዚ እዋን ‘ዚ መንቀሳቐሲ ወረቐት ብሓለፍቶም ክወሃቦም ድሕሪ ምጽንሑ፣ ካብ ሕጂ ንደሓር ግን እቶም ናይ ህዝባዊ ሰራዊት ሓለፍቶም ‘ውን ኣብቲ ዝወሃቦም መንቀሳቐሲ ኢድ ክህልዎም ኣለዎ ተባሂሉ መምርሒ ስለዝተዋህበ፣ ነዚ ብዝምልክት ጽባሕ ሓሙስ ኣኼባ ክገብሩ እዮም።
ስርዓት ኢሳይያስ ኣብ ውሽጥን ወጻእን ብህዝቢ ተፈንፊኑ፣ ነቲ ስርዓት ከገልግሉ ዝጸንሑ ከም ብዓል ልኡል ገብርኣብ ዝኣምሰሉ እሙናት ኣብ ምድስካልን ምቕያርን ኣብ ዝርከበሉ እዋን፣ ነቲ ተኣፋፊ ዝብሎም ናይ ሓላፍነት ቦታታት ብዘይመተካእታ የካይዶም ኣሎ።
በዚ መሰረት፣ ሚኒስስተር ምክልኻል ነበር ጀነራል ስብሓት ኤፍሬም ካብ ሚኒስትሪ ምክልኻል ድሕሪ ምቕያሩ ፣ ሚኒስትሪ ምክልኻል ሚኒስተር ክሳብ ሕጂ ሚኒስተር የብሉን። ዓሊ ዓብዱ ንስርዓት ኢሳያስ ገዲፉዎ ኣብ ኣውስትራልያ ዑቕባ ምስ ሓተተ ‘ውን ሚኒስትሪ ዜና ብዘይ ሚኒስተር እዩ ክኸይድ ጸኒሑ። ሚኒስተር ጉዳያት ወጻኢ ነበር ዓሊ ሰይድ ዓብደላ ምስ ዓረፈ ብተመሳሳሊ እቲ ሚኒስትሪ ንዓመታት ብዘይሚኒስተር ከምዝተኻየደ ይፍለጥ።
ምትእምማን ኣጥፊኡ ምዓልቲ ውድቀቱ ዝጽብጽብ ዘሎ ምልካዊ ስርዓት ኢሳይያስ ኣብዚ እዋን’ዚ ንሰራዊት ደምሒት ኣብ ከተማታት ኣዋፊሩ ስልጣኑ ንምሕላው ይፍትን ኣሎ። ኣብዚ ኤርትውያን ብምረት መነባብሮ ዝደሃኹሉ ዘለዉ እዋን፣ ብዶላራት ግብጺ ፊዕፊዕ ዝብሉ ዘለዉ ደምሒት ሃገራዊ ስምዒት ኤርትራዊ መንእሰይ ኣብ ምድኻም ንህግደፍ ቀንዲ መጋበርያ ኮይኖሞ ኣለዉ።