ግፋ ባኒ

ምልካዊ ስርዓት ኢሳይያስ፣ ኣብ ኣስመራ፣ ሹቕ፣ ከባቢ እንዳደርሁ፣ ወተሃደራት ከተማ ብምውፋር፣ ኣብ ጽርግያ ንዝሽየጥ ዝነበረ ባኒ፣ ክገፍፍ ውዒሉ። ምልካዊ ስርዓት ኢሳይያስ፣ ባኒ ብመቝነን ከም ዝሽየጥ ስለዝገብሮ፣ ስድራቤታት ከኣ እቲ ብዓቐን ዝወሃበን ባኒ ስለዘይኣኽለን እየን ካብቲ ናይ ጽርግያ ክገዝኣ ዝግደዳ ዘለዋ። ኣብዚ እዋን’ዚ ንሓደ ኩንታል ፊኖ 3400 ናቕፋ በጺሑ ከምዘሎ ይፍለጥ። ነዚ ወተሃደራት ከተማ ህግደፍ፣ ክልተ ኣይስዙ ዝዓይነተን መካይን ኣኸቲሎም፣ ምስ ደኻታት ኣብ ጽርግያ ዝገብሩዎ ዝነበሩ ምጕያይ ዝረኣየ ህዝቢ፣ “ ንደምሒት ክኾኖም እዮም ዝወስዱዎ ዘለዉ” እናበለ ከባጭወሎም ውዒሉ።

ብጃምላዊ ሞት ተማሃሮ ቁጠዐ ህዝቢ ኣይዘሓለን

ምልካዊ ስርዓት ኢሳይያስ፣ ነቲ 30 በጺሑ ዘሎ ሞት ናይቶም ንሳዋ እናኸዱ ኣብ ጥንቁልሓስ ከባቢ ከረን ጸዲፎም ብጃምላ ዝተቐዝፉ ዕሸላት መንእሰያት ተገዳስነት ዘይምርኣዩን ኣዛራቢ ኮይኑ ‘ሎ። ህግደፍ ነቶም ብሰንኪ ሸለልትነቱ ዝጠፍኡ ተመሃሮ ስነስርዓት ቀብሪ ክገብረሎም ዝተጸበየ ሰብ ‘ኳ እንተዘየለ፣ ነቲ ጉዳይ ንዕቀት ህዝቢ ብዘርኢ ብድዐ ምሓዙን ግን ንህዝቢ ኣቖጢዑዎ ኣሎ።

ኣበሳታት ክረምታዊ ማእቶት

ብስርዓት ኢሳይያስ ኣብ ክረምታዊ ማእቶት ተዋፊሮም ዘለዉ ተማሃሮ ካልኣይ ደረጃ፣ ክትገልጾ ብዘሕንኽ መንገዲ ይበላሸዉ ኣለዉ። ስኽራን ደቀንስትዮን እቶም ኮተቴን ኣብ ከከባቢኡ መዛረቢ ኣርእስቲ ኮይኑ፣ ህዝቢ ኣንታ እዚ ስርዓት ‘ዚ እንታይ እዩ ከርእየና ኢሉ የማርር ኣሎ። እቶም ኣብ ዘይበሰለ ዕድሚኦም ካብ ስድራኦም ተኸዊሎም ወፊሮም ዝውዕሉ ተማሃሮ፣ ዓበይቲ ኣሕዋቶም ‘ውን ኣብ ከባቢኦም ስለዘየለዉ፣ ሰኺሮም ክምለሱ ምርኣይ ልሙድ ኮይኑ ኣሎ። ከምቲ ስርዓት ደርግ ተተሓሒዙዎ ዝነበረ ሜላ፣ እቶም ተማሃሮ ኣብ ፖለቲካዊ ሕቶታት መታን ከየድህቡ ‘ሞ መመላእታ መናውሒ ስልጣን ክኾኖ ነቲ ጉዳይ ብሸለልትነት ይርእዮ ምህላዉ ብምጥቃስ ‘ውን ዘስቆርቍሩ ሰባት ኣለዉ።

ኢንጂነር ፕረዚደንት

ከምቲ ቀደም ዘግብሮ ዝነበረ ናብ ካልእ ዞባታት ካብ ምምልላስ እግሩ ኣሕጺሩ ዘሎ ኢሳይያስ፣ ናብቲ ኣብ ዓዲ ሓሎ ዝብሃል ከባቢ ዝስራሕ ዘሎ ዲጋ ክመላለስ ይረአ ‘ሎ። ንኣረጊት ሽጣራ ኢሳይያስ ዝተገንዘቦ ህዝቢ ግን፣ ኢሳይያስ ኢንጂነራት ሰጒጉ ምስ ስድራቤቱ ዝመላለስ ዘሎ፣ በይኑ እንድዩ ዝሰርሕ ዘሎ፣ ሓጋዚ ስኢኑ እምበር ተባሂሉ ሓላዪ ሃገር ተመሲሉ ከደናግር ዝገብሮ ፈተነ ምዃኑ እናበለ የዕልል ኣሎ።