ውልቀ መላኺ ኢሳያስ ፡ ከም መቀጸልታ ናይቲ ብሒም ዝበለ ይተሓጎም ዝብል ጨፍላቂ ፖሊሲታቱ፡ ምስ ምቅያር ባጤራ ናቅፋ ብዝተኣሳሰር ጉዳያት ምስ ሓለፍቲ ንግዳዊ ባንኪ ኤርትራ፡ ሚኒስትሪ ፋይናንስ፡ ሚኒስትሪ ንግድን ኢንዱስትሪን ቁጠባዊ ጉዳያት ህግደፍን ኣብ ምፍጣጥ ኣትዩ ከምዘሎ ምንጭታት ካብ ኣስመራ ሓቢሮም።

እቶም ምንጭታት ከምዝኣመትዎ፡ ንትግባረ ምቅያር ባጤራ ናቅፋ ዝምልከት ገደብ ግዜን ቅጥዕታትን ብኣዋጅ ተገሊጹ’ኳ እንተኾነ፡ ኣብ ትግባሬኡ ግን ፕረሲደንት ኢሳያስ ምስ ሓላፊ ንግዳዊ ባንኪ ኤርትራ  ኣቶ የማነ ተስፋይ፡ ምስ ሓላፊ ቁጠባዊ ጉዳያት ህግደፍ  ኣቶ ሓጎስ ገብሪሂወት፡ ምስ ሚኒስተር ፋይናንስ  ኣቶ ብርሃነ ሃብተማርያምን ምስ ሚኒስተር ንግድን ኢንዱስትርን ኣቶ ነስረዲን ዓሊ በኺትን ኣብ ምውጣጥ ኣትዩ ከምዘሎ ይሕበር።

እዚ ኣብ መንጎ ኢሳያስን ክብ ኢሎም ዝተጠቅሱ ሓለፍትን ዘሎ ወጥሪ ከይተጋፍሐ እንተዘይተወጊዱ ድማ፡ የማነ ተስፋይ ዝያዳ ግዳይ ማእሰርቲ ከምዝኸውን ዕድሉ እንተኣጸቢቁሉ ግን ክድስክል ምዃኑ ይእመት። ጠንቂ ናይቲ ምስሕሓብ ዛጊት ብንጹር’ኳ እንተዘይተፈልጠ፡ ኢሳያስ ከምኣመሉ ደረት ስልጣኑ ከይሓለወን ብዘይ እኹል ሞያዊ ኣፍልጦን ኣብ መስርሕ ምቅያር ባጤራ ናቅፋ ኢዱ ብምእታዉ  ተገራጫዊ መምርሒታት ይህብ ብምህላዉ’ዩ።

ሓደ ካብቲ ዘፋጥጥ ዘሎ ጉዳያት ድማ፡ እሙናት ጀነራላት፡ ላዕለዎት ሓለፍቲ ጸጥታ፡ ካድራት ህግደፍን ገለ ኣብ ቁጠባዊ ጉዳያት ህግደፍ ዝነጥፉ ነጋዶን፡ እቲ ኣብ መተርኣሶምን ምስጢራዊ ቦታታትን ሓቢኦሞ ዘለዉ ብዘይ ሕጊ ዘጥረይዎ ሚልዮናት ባጤራ ናቅፋ፡ ‘’ክንድዚ ዝኣክል ገንዘብ ካበይ ኣምጺኽሞ’’ ኣበይ ጸኒሑ” ዝብል ሕቶ ከይቀረበሎም ብዕበጦ ዓባብጦን ናብ ባንክ ከእትውዎ ወይ ድማ ጥረ ገንዘቦም ናብ ዓይነት ክቀይርዎ ማለት ኣባይቲ ይኹን ካልእ ንብረት ንኽገዝእዎ ተወሳኺ ግዜ  ክወሃቦም ዝብል ርእይቶ ስለዝቀረበ’ዩ። ኣቶ የማነ ተስፋይ ኣብ ዕላማ ኢሳያስ ኣትዩ ዘሎ ድማ ነዚ ሓሳብዝን ንገለ መምርሒታት ኢሳያስ ስለዘይርዓሞን ምዃኑ እቶም ምንጭታት ይገልጹ።

ኣብ ምቅያር ባጤራ ናቅፋ ብቀጥታ ምትእሰሳር ዘለዎም ኣቶ ሓጎስ ገብሪሂወት፡ ኣቶ ብርሃነ ሃብተማርያም ከምኡ’ውን ኣቶ ነስረዲን ዓሊ በኺትን’ውን መምርሒ ውልቀ መላኺ ኢሳያስ ከመዘለዎ እንተዘይተቀቢሎም ድማ ዕጫ ማእሰርትን ምድስካልን ከምዝኾኑ እሙናት ምንጭታት ካብ ኣስመራ ገሊጾም።

ብወረጃን ምስሉይነትን ኣገላልጻ ስርዓት ህግደፍ፡ ሓደ ካብ ምቅያር ባጤራ ናቅፋ ጽፉፍን ዘመናውን ገንዘባዊ ኣሰራርሓ ንምትእትታውን ቁጠባ ኤርትራ ንምሕያልን’ዩ። ይኹን እምበር፡ እቲ ብብልሽውና፡ ዘይሕጋዊ ንብረት ምስግጋር፡ ፡ጸሊም ዕዳጋን ተቛማጢዑን ተበኪሉን ዘሎ ህግደፍ ግሉጽነት ዘይብሉ ኣሰራርሓ ክሳብ ዘየቛረጸ፡ ምቅያር ባጤራ ናቅፋ ንበይኑ፡ እቲ ባይታ ዘቢጡ ዘሎ ቁጠባ ኤርትራ ክትስእን ክፍወስን ዘበት’ዩ።

27 ሕዳር 2015