ማእሰርቲ ኣብ ጋራጅ መንግስቲ

ኣብ ኣስመራ ጥቓ በትጽሕፈት ፕረዚደንት ኣብ ዝርከብ  መንግስታዊ ጋራጅ ሓላፊ ናእሽቱ መካይንን ጋዝን ዝነበረ ወዲ-ረድኢ ዝተባህለ ሓላፊ መበል 13 ርእሱ ብምልካዊ  ስርዓት ኢሳይያስ ኣብ ፈለማ ናይዚ ወርሒ ‘ዚ ተኣሲሩ።

ምኽንያት ማእሰርቲ ናይቶም ግዳያት ብንጹር ኣይተፈልጠን።

ጽኑዕ ሓለዋ ኣብ ኣስመራ

ካብ ትማሊ ረቡዕ 11 ሕዳር ንጉሆ ጀሚሩ ኣብ ኣስመራ ጽዑቕ ሓለዋ ኣሎ።  

ውልቀምላኺ ኢሳይያስ ናብ ወጻኢ ኣብ ዝኸደሉ ኣጋጣሚ ብተደጋጋሚ ከምዚ ዝኣመሰለ ጽኑዕ ሓለዋ ምውፋር ልሙድ እዩ።  ምኽንያት ናይዚ ካብ ትማሊ ኣትሒዙ ዝርአ ዘሎ ጽኑዕ ሓለዋ ምስ ሕቡእ መገሻ ውልቀመላኺ ኢሳይያስ ናብ ዱባይ ዝተኣሳሰረ ክኸውን ይኽእል ዝብል ግምት ኣሎ።  

ኢሳይያስ ዝሓለፈ ሰንበት ብዘይወግዓዊ መግለጺ መሊቑ ናብ ዱባይ ምኻዱ ምስ ኩነታት ጥዕናኡ ተኣሳሰረ ክኸውን ከምዝኽእል ይንገር።  

ምቕያር ባጤራ ናቕፋን ካርድ ቴለፎንን

እዚ ከምዚ ኢሉ ኸሎ ህዝቢ ብምኽንያት ምቕያር ባጤራ ናቕፋ ኣትዩዎ ዘሎ ሸግርግር ዛጊት ኣይሃድአን። ኣብ ባንክታት `ውን ፍጹም እምነት ኣጥፊኡ `ሎ።

እቲ ስርዓት ካብ 20 ሽሕ ናቕፋ ንላዕሊ ምውጻእ ከምዘይፍቀድ ኣቐዲሙ ዘመሓላለፎ ትእዛዝ ህዝቢ ጥረ ገንዘብ ኣብ ኢዱ ክሕዝ ኣገዲዱዎ ክንሱ፡ ሕጂ ተመሊሱ እቲ ስርዓት ካብ 20 ሽሕ ንዘቐይር ሰብ ይኹን ትካል ክጸባጸብ ምፍካሩ ንህዝቢ ኣብ ዕግርግር የእትዩዎ ኣሎ።

ህዝቢ ልክዕ ከምቲ ገንዝቡ ናብ ገዛ፡ መኪና፡ ወወርቅን ክልውጦ ዝቐነየ፡ ናብ ናይ ቴለፎን ካርድ ምቕያር `ውን ምስ ቀጸለ፡ ካርድ ቴለፎን ተሳኢኑ ህዝቢ ሪጋ ክስራዕ ጀሚሩ። እታ ናይ 100 ካርድ ድማ ኣብ ጎደና ክሳብ 250 ናቕፋ በጺሓ።

ነዚ ዝፈለጠ ቤትጽሕፈት ኤሪተል (ቴለኮሙኒኬሽንስ ኤርትራ) ክሳብ 18 ሕዳር፡ እቲ ናቕፋ ምቕያር ዝጅምረሉ ዕለት ማለት `ዩ ኣብ ስራሕ ዘይወዓለ ካርድ ውዱቕ ከምዝኸውን ኣፍሊጡ ኣሎ።  ብኹሉ መልክዑ ክርአ ኸሎ፡ እቲ ስርዓት ምስቲ ህዝቢ ጭርጭር ዓበደ ዝጻወት ዘሎ እዩ ዝመስል።

ኣመሓዳሪ ባንክ ኤርትራ ንምቕያር ባጤራ ብዝምልከት ኣብ ዝሃቦ ሓበሬታ እቲ ንኽቅየር ናብ ባንክ ዝቐርብ ካብ 5 ሚልዮን ናቕፋ ንላዕሊ ኣብ ሳንዱቕ ተዓጽዩ ንዘይተወሰነ ጊዜ ክጸንሕ’ዩ ብምባል ምግላጹ ምስ ዝሓለፈ ጋሕማጥ ኣሰራርሓ ባንክ ብምትእስሳር ንተገልገልቲ ውሕስነት ዘይህብን ሕጋውነት ዝጎደሎን’ዩ  ብምባል ተገልገልቲ  ዘለዎም ስግኣት ይገልጹ ኣለዉ፡፡

ህግደፍ ባጤራ ናቕፋ ንምቕያር ዝዘርግሖ መግለጺ፡ ነቲ ኣብ ኤርትራ  ዘሎ ቁጠባውን ፖለቲካውን ዘይርጉእነት ተወሳኺ ዘራጊቶ ፈንዩሉ ‘ሎ፡፡

ባንክታት ኤርትራ ብፍላይ ባንክ ንግዲ ነቲ ጠሚሩ ካብ ዓሰርተ ሽሕ ንላዕሊ ንዓማዊል ዝህቦ ናቕፋ ኣጉዲሉ ከም ዝህብ ህዝቢ ኣስተውዒሉሉ ዝጸንሐ ጉዳይ እዩ።