ኣዛዚ ሓይልታት ምክልኻል ኮይኑ ዘሎ ጀነራል ፍሊጶስ ወልደየውሃንስ፣ ነቶም ጀነራል ስብሓት ኤፍሬም ሚኒስተር ምክልኻል ከሎ ኣብ ኩሉ ምስኡ ዝገብሩዎ ምልውዋጥ መልእኽቲ ቅዳሕ ደብዳበ ናብ ፕረዚደንት ምልኣኽ ከም ኣሰራርሓ ለሚዶም ዝጸንሑ ላዕለዎት ኣዘዝቲ ሰራዊት ኣኪቡ፣ ” ካብ ሕጂ ንደሓር ናባይ መልእኽቲ ክትሰዱ ከለኹም፣ ቅዳሕ ናብ ፕረዚደንት ምስዳድ ኣየድልየኩምን እዩ። ደው ኣብሉዎ” ክብል ኣዚዝዎም።

ቅድሚ ሎሚ ብደረጃ ሚኒስተር ንሚኒስትሪ ምክልኻል ዝእዝዙ ዝነበሩ ሓለፍቲ፣ ናይ ሓይሊ ኣየርን ሓይሊ ባሕርን መዝነት ኣይነበሮምን። እዞም ክልተ ፍሉያት ሓይልታት፣ ብቐጥታ ምስ ኢሳይያስ እዮም ዝራኸቡ ነይሮም። እቲ ድሕሪ ሞት ውጩ መዓርጉ ናብ ጀነራል ክብ ኢሉ ኣዛዚ ምክልኻል ክኸውን ብኢሳይያስ ዝተሾመ ፍሊጶስ ግን ንኹሉ ሓይልታት ምክልኻል ኣጠቓሊሉ ካብ ምምሕዳር ሓሊፉ ኣብ ሲቪላዊ ጉዳያት ከይተረፈ ኢዱ የእቱ ‘ሎ።

ኢሳይያስ ቤትጽሕፈቱ ዓጽዩ ኣብ ዲጋ ዓዲ ሓሎ ክውዕል ዝርኣዮ ዘሎ ህዝቢ “እምበር ዶ እዚ ሰብኣይ ኣይተጸለለን” እናበለ ክሓምዮ ከሎ፣ ሰብ ኣብ ምእሳርን ምፍታሕን ተጸሚዱ ዝርከብ ፍሊጶስ እዩ።