ወዲ ዓሊ ሓደ ካብ’ቶም ኣብ’ታ ብዕለት 21 ጥሪ 2013 ኤርትራውያን ጀጋኑ ንሚኒስትሪ ዜና ስርዓት ህግደፍ ተቖጻጺሮም ቅዋም ክትግበርን እሱራት ፖለቲካ ክፍትሑን ዝብል መልእኽቲ ብተለቪዥን’ቲ ስርዓት ዘመሓላለፉላ ታሪኻዊት ዕለት ዝተሰወአ ሓርበኛ ተጋዳለይን ናይ ለውጢ ተቓላሳይን ኢዩ። ወዲ ዓሊ ይኹን እቶም ምስኡ ዝነበሩ ብጾቱ ነቲ ንስርዓት ኢሰያስ ኣንጉዑ ዘምከኾ ናይ ሓበን ስርሒት ኣብ ዝፍጽሙሉ ዝነበሩ ግዜ ኣብ ገጾም ብዘይካ ትብዓትን ርግኣትን ካልእ ከምዘይተንጸባረቐ ክፍለጥ ይግባእ።

ሓርበኛ ወዲ ዓሊ “ናትና ዕላማ ነዚኣ (ሚኒስትሪ ዜና) ምቁጽጻር ኢዩ። ካልኦት ከኣ ኩሉ ኣገዳሲ ዝብሃል ክሕዝዎ ኢዮም። ዋላ ነቲ ዕቡድ ሰብኣይ (ንውልቀ መላኺ ኢሰያስ ኣፍወርቂ) ክቆጻጸሩዎ ኢዮም። ኤርትራ ኣብ ቁጽጽር ሓይልታት ምክልኻል ኤርትራ ኣትያ ኢያ” ከምዝበለ፡ ኣብቲ ሰዓት’ቲ ኣብ ፎርቶ ዝነበሩ፡ ቃሉ ብቐጥታ ዝሰምዑ ሓቢሮምኒ።

ወዲ ዓሊ ምስ ብጾቱ ጠለብ ህዝቢ ዘንጎድጎዱ ጀጋኑ ኮይኖም ኣብ ታሪኽ ሰፊሮም ኣለዉ። ንሱ ሕድሪ ሰማእታት ክትግብር ናይ ህይወት መስዋእቲ ከፊሎ ኣሎ። ናቱ ሕድሪ ድማ ባርዕ’ቲ ምስ ብጾቱ ዝወልዖ ናይ ደሞክራስያዊ ለውጢ ሽግ በርቲዑ ውልቀ ምልኪ ቦርቒቑ ህዝብን ሃገርን ኤርትራ ሓራ ምስ ዝኸውን ኢዩ ዝትግበር።

ኣብ ኤርትራ እንርከብ ሓቀኛ ስእሊ ናይቲ ስርሒት ጸኒሑ ዝተረደኣና መንእሰያት ተበራቢርና ኣለና። ዕላልና ብወዲ ዓልን፡ ብጾቱን ኮይኑ ‘ሎ። ነዚ ናይ ጅግና ወዲ ዓልን ብጾቱን ተባዕ ስጉምቲ መሊእና ኣብ ዓወት ከንብጽሖ ምዃና ድማ ዘጠራጥር የልቦን።

መድነቒ ወዲ ዓሊ ካብ ኣስመራ