‘እንቋዕ ጥራይ ብሂወት ሃለወ’ምበር ንሕናስ ከምዘይተበደልና ጌርና ኢና ንሪኦ! ነዚ ንዓመታት ዝተቓለስናሉን ዘገልገልናዮን ውድብ ከኣኒ ሕጂ ስለ ዝመረረና ጥራይ፡ ሕቘና ኣይንህቦን ኢና!’ እዚ ቃል’ዚ፡ ብሃጥር (ብጅግና) መራሒ ነፋሪት (pilot) ደጀን ዓንደ ሕሸል፡ ሰባር መቊሕ ካርሸሊ፡ ዝተነግረና ቃል ወላዲቱ’ዩ ኔሩ። ነዛ ሓጻር ቃል’ሞ ክቡራት ኣሕዋት፡ ብልቢ ነስተውዕለላ! ኩሉ ሽግራትናን መፍትሒኡን ኣብዛ ቃል እዚኣ ተጠቓሊሉ ኣሎ። ብኸመይ?

“ንዓመታት ዝተቓለስናሉን ዘገልገልናዮን ውድብ…!” እዋእ! ኣቱም ኣሕዋት፡ ወረ በጃካትኩም ከም ሰብ ሕሰቡ። ንሕና ንነብስኹምን ንመላእ ህዝቢ ኤርትራን ሓርነት ንምጉንጻፍ ኢልኩም ከም ዝተቓለስኩም ኢና ንፈልጥ። በዚ መሰረት ድማ ኢና ሃዋርያት ናጽነት ኢልና ንጽውዓኩም። እቲ ተቓሊስናሉን ኣገልጊናሉን ትብሉዎ ዘለኹም መሪሕነት’ኮ ልዕሊ’ቲ ንስኻትኩም ዘበርከትኩሞ ኣበርክቶ ኣይገበረን። ከመይ ኣቢልኩም ኢኹም ደኣ ምግዳልኩም ንእኡ ምዃኑ ትዛረቡ!? “ሰበይቲ ጸማም ብኾፉ ይጽውዑሉ፡ ሰበይቲ ዕዉር ብኾፉ ይስዕሙሉ!” ዚበሃል’ኮ ከምዚ ናታትኩም’ዩ። ብሓቂ ዲኹም ከምኡ ትሓስቡ!? ሙዃን ሓቅነት ናይዚ ዘጠራጥር የብሉን። ንእኡ ኢልኩም እንተዘይትቃለሱ እዚ ኹሉ ኣብ ልዕሊ ህዝብን ሃገርን ዘውርዶ ዘሎ ስፍሪ ኣልቦ ግፍዕን ዕንወትን ኣሜን ኢልኩም ኣይምተቐበልኩሞን። ገለስ ምገበርኩም! እዚ ኹሉ ፈቐዶኡ ዝወደቐ ስውእሲ ምእንቲ ኢሳያስን ጉጅለኡን’ዩ ሓሊፉ!? ዘገርም’ዩ! “ከም ሰብ ዚሓስብ ኣድጊ ርእየ ኣይፈልጥን፤ ከም ኣድጊ ዚሓስቡ ሰባት ግን ኣጋጢሞሙኒ ኣለዉ” ዝበለ ሄንሪ ዝብሉዎ ጸሓፍስ ለካ ከምዚ ምስ ረኸበ’ዩ።

ትማሊ ቀዳም 24 ግንቦት 2014 ነገሰ ነገስት መለኽቲ ኢሳያስ ኣፈወርቂ ከይሓፈረ፡ ነቲ ንዓመታት ላዕለዎት ካድራቱ፡ ‘ቅዋም’ኮ ሓንቲ እታ ምርጫ ናይ ፕረዚደንት ጥራይ እያ ተሪፋትና ዘላ’ምበር እቲ ካልእስ ኩሉ ነተግብሮ ኢና ዘለና!’ ብምባል፡ ከም ኣመሎም ህዝቢ የደናግሩ ከምዘይነበሩ፡ ኣብዚ መላኺ ትማሊ ዝገበሮ ናይ መወዳእታ ዝመስል ምስሉይ መደረ ግን ቅዋም ከተግብር ዘይኮነስ ክነድፍ ምዃኑ ሓቢሩና ኣሎ። ካድራቱ ደኣ’ሞ ነየናይ ቅዋም’ዮም ንዝበዝሐ ክፋላቱ የተግብሩዎ ኔሮም!? ካልእ እቲ ን16 ዓመታት ዝተመኽነየሉ ጉዳይ ዶብ ከደኣ እንታይ ፍሉይ ነገር ስለ ዝተረኽቦ ወይ ዝተገብሮ’ዩ ሕጂ ቅዋም ኪትግበር ፈቒዱ!? ‘ኣይ ኣብ ኲናት፡ ኣይ ኣብ ሰላም ስለ ዘሎና ቅዋም ኣይነተግብርን ኢና!’ ዶ ይብሃለና ኣይነበረን። “ኪሰርቀኒ ዝረኤኹዎስ ኪመልሰለይ ነይኣምኖ!” ይብሉ ወለድና። ያኢ እቲ ፍንጥራዕ ዚለመደ ፋኖ ህግደፍሲ ብሕጊ ተገዚኡ ሃገር ብስድቢ (ብቅዋም) ኪመርሕ! ዘይሕሰብ!

ክገርመኩም ትማሊ መዓልቲሲ ሓንቲ ሰብ መሰል ወኻርያ፡ ኣማሓዳሪት ናይ ሓንቲ ካብተን 13 ምምሕዳራት፡ እታ ብሰሪ’ዚ ኣዕናዊ ምስሉይ ጉጅለ’ዚ ብዕንወት ዲማ (ጥንታዊ) ህንጻታታ ‘ኣስመራ ጻዕዳ’ ዘስመያ ምስላ ተደዊኑ፡ ማድያ ዘላ ምጭውቲ ከተማና ኣስመራ ዝኾነት ተጋዳሊት፡ እንታይ ኢላ እመስለኩም፥ ኣብ ቅድሚ ካሜራ ህግደፍ ቀሪባ ከይሓፈረት፡ ናብቶም ንዓመታት ከም ዑፍ መስቀል ቅልቅል ኢላ እናተሸርበት ዘሐለለቶም ልቺ ህግደፍ ንሓደ ምሸት ከም ልቦም ንኽርእዩን ኣብ ናይ ናጻ ጓይላ ንኽስዕስዑን ኢሎም ካብ ምሉእ ከተማ ኣስመራ ናብ ጎደና ተለላ (ኮምብሽታቶ) ዝተኣኻኸቡ፡ ትሕቲ ዕድመ ዝኾኑ ኣማእት መንእሰያት እናኣመልከተትሲ፥ ‘ረኣዩዎም እስከ እዞም መንእሰያትና፡ ኣብዚ እንድዮም ዘለዉ። ጠፊኦም፣ ፋሕፋሕ ኢሎም ወዘተ. ብምባል መንግስትና ዘጸልሙ ዘለዉ ሓሰውቲ! ዝጠፍአ መንእሰይ የብልናን!’ ክትብል ምስ ሰማዕኩዋ ኣብ ክንዳኣ ሓፊረ።