ዝለዓለት ኢጣልያዊት ሞዴል ቢያንካ ባልቲ፣ ኣቐዲማ ንላዕለዋይ ኮምሽነር ስደተኛታት ውድብ ሕቡራት ሃገራት ብገንዘብ ንምሕጋዝ ብዝኣተወቶ ምብጽዓ መሰረት ንዝሓለፈ  11 ዓመት በብግዚኡ ኣብ መድረኽ ጽባቐ ንዝተረእየትሉ ተኸዚኑ ዝነበረ ኩሉ ኣልባሳ ናብ መሸጣ ብምውራድ ስደተኛታት ንምሕጋዝ ከምዘውዓለቶ Forbes ሓቢሩ።

እታ ጓል 32 ዓመት ሞዴል ‘ንእሽቶ ክፋለይ ንስደተኛታት” ብዝብል ቴማ ትማሊ ንህዝቢ ኣብ ዝኸፈተቶ መሸጣ ክቡራት ኣልባስ፣ ቀዳማይ ዓዳጊ ውልቀሰብ ብኡ ንብኡ 1000 ይሮ ከም ዝኸፈለ እቲ ሓበሬታ ጠቒሱ።

ኣብቲ ኣጋጣሚ ተረኺባ ዓደግቲ እተእንግድ ዝነበረት ኣደ ክልተ ቆልዑ ቢያንካ፣ “ ኣደ ኣብ ዝኾንካሉ እዋን፣ ናይ ህወትካ ቀዳማይ ተልእኾ ውላድካ ምክልኻል እዩ፣ ስለዚ፣ ውልድካ እናበኸየ፣ ናብቲ ኣብ ስግር ዘሎ መሬት ብህይወት ክትሰግር ምዃንካን ዘይምዃንካን ውሕስነት ኣብ ዘይብሉ ባሕሪ ክትኣቱ ከለኻ ክሳብ ክንደይ ከቢድ ምዃኑ ይረኣየኒ” ክትብል፣ ስደተኛታት ኣደታት ዓቕለን ጸቢቡወን ምስ ህጻውነተን ነቲ ሓደገኛ ጉዕዞ ባሕሪ ክፍጽማ ይግደዳ ከምዘለዋ ገሊጻ።

ብፍላይ ነቲ ካብ ሊብያ ናብ ዓዲ ጥልያን ዝግበር ሓደገኛ ጉዕዞ ማእከላይ ባሕሪ ኤርትራውያን ብብዝሒ ከምዝጠቀሙሉ፣ ነቲ ብ 2013 ዘጋጠመ ልዕሊ 367 ህይወት ኤርትራውያን ብጅምላ ዝቐዘፈ ትራጀዲ ሓዊስካ ብዙሕ ህይወት ኤርትራውያን ኣብቲ ባሕሪ ከምዝሃለቐ ይፍለጥ።