ብ 7 ሰነ ዘይሕጋውያን መሰጋገርቲ ራሻይዳ ብሰሜናዊ ቀይሕባሕሪ ብሰዋኪን ናብ ሱዳን ድሕሪ ምእንታዎም ናብ ፖሊስ ሱዳን ዘረከቡዎም 23 ኤርትራውያን ኣብ ቤትማእሰርቲ ፖርት ሱዳን ሰንፈላል ኮይኖም ኣብ ሻቕሎት ከምዝርከቡ ምንጭታት ሓቢሮም።

እቶም ግዳይ ኮይኖም ዘለዉ ስደተኛታት ፣ 3 ህጻናት ዝርከቡዎም 13 ደቀንስትዮን 10 ደቂ ተባዕትዮን እዮም።

እቶም ዘይሕጋውያን መሰጋገርቲ ገንዘቦም ምስ ተረከቡ ናብ ፖሊስ ሱዳን ብምስትላም፣ ከም ሓይለይቲ ነቶም ስደተኛታት፣ “ነቶም ፖሊስ ናይ ፖለቲካ ዑቑባት ኣይኮነን በሉዎም መታን ናብ መዓስከር ስደተኛታት ሸገራብ ከይትኸዱ፣ ገንዘብ እንተምጺእኩም ድማ ተዋሒስና ካብ ማእሰርቲ ብምውጻእ ናብ ሊብያ ከነስግረኩም ኢና” እናበሉ ተወሳኺ ገንዘብ ንምግሓጥን ኣብ ሓደጋ ንምእታዎምን የደናግሩዎም ከምዘለዉ ተፈሊጡ።

እቶም ኣብ መደበር ፖሊስ ሰዋኪን ተኣሲሮም ዝጸንሑ ኤርትራውያን ናብ ቤትማእሰርቲ ፖርት ሱዳን ምስ ተሰጋገሩ ኣብቲ ቦታ ዝርከቡ ማሕበረ ሰብ ኤርትራውያን ንኡድ ምትሕግጋዝ ኳ ክገብሩዎም እንተፈተኑ፣ ብሰንኪ እቲ ዝተፈጥረ ምድንጋር ግን ጉዳዮም ሰንፈላል ኮይኑ ኣጎላጕል ተሪፎም ከምዘለዉ እቲ ዝረኸብናዮ ሓበሬታ የረድእ።

እቶም ግዳይ ዘይሕጋውያን መሰጋገርቲ ራሻይዳን ፖሊስ ሱዳንን ኮይኖም ዘለዉ ኤርትራውያን ስደተኛታት፣ ኣብ መወዳእታ ናይቶም ካብ ሱዳንን መንገዲ ሊብያን ተለቒሞም ናብ ኤርትራ ተመሊሶም ዘለዉ ኤርትራውያን ዕድል ከጋጥሞም ከምዝኽእል ‘ውን እቶም ምንጭታት ይእምቱ።