[መጋቢት 29, 2014] ስምረት መንእሰያት ኤርትራ ንድሕነት ሃገር ብዛዕባ እቶም ካብ ቤት ማእሰርቲ ጅቡቲ ናብ ኢትዮጵያ ክሰጋገሩ ዝደልዩ ኤርትራውያን ሕቶኦም ግብራዊ መልሲ ክረክብን ናይቶም ናብ ካልኦት ሃገራት ክሰጋገሩ ዝደልዩ ጉዳይ ብዕቱብ ክርአን ምስ ላዕለዎት ኣካላት መንግስቲ ኢትዮጵያ ከምኡ’ውን UNHCR ተራኺቡ ተዘራሪቡ። ብመሰረት እቲ ብኣባላት ስምረት ዝተኻየደ ዘይሕለል ጻዕሪ ክሳብ ሕጂ እቶም ናብ ኢትዮጵያ ክሰጋገሩ ዝደልዩ ኤርትራውያን እሱራት ብጅቡቲ ቅልቀቑን ኢትዮጵያ ክትቅበሎምን ኣብ ስምምዕ ተበጺሑ ኣሎ።

ጉዳይ ኣብ ጅቡቲ ተኣሲሮም ዘለዉ ኤርትራውያን መሰረታዊ ፍታሕ ንኽረክብ: ስምረት ምስ ኣብ ኣዲስ አበባ ዝርከቡ ወከልቲ ARRA ብቐጻሊ ርክባት ክትገብር ድሕሪ መጽናሕ: ኣብ መጋቢት 10 ምስ UNHCR ዝርርብ ብምክያድ እቶም እሱራት ምእንቲ ኽፍትሑ UNHCR ጸቕጢ ንኽትገብር ምሕጽንታ ቀሪቡ። ከም መቐጸልታ ናይ’ቲ ዝተኻየደ ርክብ: UNHCR ኣዲስ አበባ ምስ UNHCR ጅቡቲ ብምርኻብ ነቲ ጉዳይ ብዕቱብ ይከታተሎ ከም ዘሎ ሓቢሩ። ከም መቐጸልታ ናይ’ቲ ተበግሶ ንምድሓን ኣሕዋትናን ኣሓትናን: ኣብ መጋቢት 17 ወኪል ስምረት መንእሰያት ኤርትራ ንድሕነት ሃገር መንእሰይ ኣድያም ረዳኢ ምስ ሓላፊ ወጻኢ ጉዳያት ኢትዮጵያ ዶክተር ቴድሮስ ኣድሓኖም ብምርኻብ ዝርርብ ኣኻይዳ። ዶክተር ቴድሮስ ብወገኑ መንግስቲ ኢትዮጵያ ብሓፈሻ ሚኒስትሪኡ ድማ ብፍላይ ነዞም ኣብ ሽግር ዝርከቡ ኤርትራውያን ክፍትሑን ብሰላም ናብ ዝሓሸ ዓዲ ክሰጋገሩን ዝከኣሎም ክጽዕሩ ምዃኖም ኣረጋጊጹ። ሽዑ ንሽዑ ድማ ኢትዮጵያ ነቶም ኤርትራውያን ስደተኛታት ንኽትቅበል ዘለዋ ድልውነትን ካብ መንግስቲ ጅቡቲ ዘድልዩ ምትሕብባራትን ብዝርዝር ዝተጻሕፈ ደብዳበ ናብ ኣብ ኢትዮጵያ ዝርከብ ኣምባሳደር ጅቡቲ ሰዲዱ። ኣምባሳደር ሱሌማን ብወገኑ ጅቡቲ ጉዳይ ናይ’ቶም ናብ ኢትዮጵያ ክሰጋገሩ ዝደልዩ ኤርትራውያን ንክሳለጥ ክትተሓባበር ምዃና ተመባጺዑ። ድሮ’ውን ሎሚ ንግሆ ምጽራይ ናይ’ቶም ናብ ኢትዮጵያ ክሰጋገሩ ዝደልዩ ኤርትራውያን ተጀሚሩ ከም ዘሎ ካብ ጅቡቲ ዝመጸና ሓበሬታ ኣረጋጊጹ ኣሎ። ብዘይካ’ዚ ኣባላት ስምረት ምስ ኣብ ዋሺንግቶን ዲሲ: ሎንዶን: ስቶክሆልም: ናይሮቢ ዝርከቡ ወከልቲ UNHCR ከምኡ’ውን ኣምባሳደራት ኢትዮጵያን ጅቡትን ብኣካልን ብደብዳበን ርክባት ከካይዱ ጸኒሖም ኢዮም። ኩሎም እቶም ኣብ ጅቡቲ ተኣሲሮም ዝሳቐዩ ዘለዉ ኤርትራውያን ተለቒቖም ናብ ሰለማዊ ሂወቶም ክመርሕሉ ዝኽእሉ ሃገር ክሳብ ዝሰጋገሩ: ስምረት መንእሰያት ኤርትራ ንድሕነት ሃገር ኣበርቲዓ ክትጽዕር ምዃና ድማ ይሕብሩ።

ከም ዝፍለጥ 267 ዝኾኑ ኤርትራውያን ካብ ኣብ ሃገሮም ዘሎ ባርነት ኣምሊጦም ናብ ጅቡቲ ምስ ኣተዉ: ብዘይ ንጹር ምኽንያት ንዓመታት ተኣሲሮም ኣደዳ ሕማምን ሞትን ይኾኑ ኣለዉ። ካብዚኣቶም እቶም 91 ናብ ኢትዮጵያ ክሰጋገሩ ፍቓደኛታት ኢዮም። ብዙሓት ኤርትራውያን ደለይቲ ፍትሒ ጉዳይ ናይዞም ኣብ ጸልማት ዝርከቡ ኣሕዋትናን ኣሓትናን መዕለቢ ክርከበሉ በብወገኖም ይጽዕሩ ከም ዘለዉ ይፍለጥ።

ሓርነትና ናይ ግድን ኢዩ!!!

ስምረት መንእሰያት ኤርትራ ንድሕነት ሃገር