ኣብ ዝሓለፈ ወርሒ ታሕሳስ 2012 ብወልዱ ገብረክርስቶስ (ባርያ) ዝተፈጸመ ግፍዒ ህዝቢ ኣቖጢዑን ኣሕዚኑን ይርከብ።

ኣባል ቤት ዕዮ ናይ ዓሻ ጎልጎል

ምሉእ ስሙ – ማትያስ ስዩም

ዕድመ – 34

ደረጃ ትምህርቲ – 12

ሞያ ስራሕ – ቶርኒቶረ

ትውልዲ ዓዲ – ማይ ኣሓ ( ወረዳ መረታ ሰበነ)

መንበሪ ቦታ – ማይጭሆት (ኣስመራ)

ስራሕ ኣቦ  – ወናኒ ጽዕነት መኪና ዝኾነ መንእሰይ፡

ባትሪ ናይ ዓባይ መኪና ተሰሪቑ ካብ ዓሻ ጎልጎል ወጺኡ ብዝብል ምስምስ፡ “ብዝቐልጠፈ ኣምጺእኩም ኣብ ሓጺር እዋን መርሚርኩም ከምዝእመን ግበሩዎ” ብዝብል ትእዛዝ ናይ ወልዱ ባርያ ኣብ ውሑድ ሰዓታት ተደልዩ ኣብ ትሕቲ ቀይዲ ኣትዩ። ኣብ ዓሻ ጎልጎል ኣብ ዝርከብ ቤትማእሰርቲ ምስ ኣተወ፡ “ዝገበርኩም ጌርኩም ኣለፋልፉዎ” ንዝብል ናይ ወልዱ ባርያ ትእዛዝ ተኸቲሎም ኣብ ውሽጢ ዓሻ ጎልጎል ኣብ ዝርከብ ናይ ወልዱ ባርያ  ቤትማእሰርቲ ኮንቴነራት መርመራ ከካይዱሉ ከለዉ፡ ኣብ ውሽጢ ፍርቂ ሰዓት ብምኽንያት ከቢድ መግረፍቲ ብኡንብኡ ዓሪፉ።

ንሱ፡ መርመርቲ ወልዱ ባርያ ኣገባብ ብዘይብሉ ማህረምቲ ኣብ ርእሱ ብበትሪ ደጋጊሞም ብምቕጥቃጥ፡ ኣፍ ልቡ ብምዕባስ ከምኡ ‘ውን ኣብ ኩሊቱ ብኸቢድ ስለዝሃረሙዎ ተዓቢሱ ወዲቑ ‘ዩ ኣብ ቤትማእሰርቲ ዓሪፉ።

ኣባል ቤትዕዮ ዓሻ ጎልጎል ዝኾነ ማቲያስ ብጠባዩን ስርሑን ኣዝዩ ምስጉንን ፍቱውን ስለዝነበረ፡ ኩነታቱ ኣብቶም ሽሕን ሓሙሽተ ሚእተን ኣባላት ሰራሕተኛታት ዓሻ ጎልጎል ሽዑ ንሽዑ ተወርዩ ዓቢ ቁጥዐን ሓዘንን ኣለዓዒሉ። በዚ ዝረዓደን ዓቕሉ ዘጻበበን ወልዱ ባርያ  ናብ ፖሊስ ብምኻድ፡ ነቲ ነገር ካብ ኢዱ ንምውጻእ ነቲ ጉዳይ ክርከቡዎ ምስ ሓተተ፡ “ ኣብ ቤትማእሰርትና መዓስ ዓሪፉ፡ እዚ ናትካ ጉዳይ እዩ፡ ንዓና ዝምልከት ኣይኮነን” ኢሎም መሊሶሞ። ንሱ ኸኣ ናብ ቤትጽሕፈት ፕረዚደንት ብምኻድ ንኢሳይያስ ምስ ሓበረ፡ ኮለኔል ተስፋልደት (ሓላፊ ኣሃዱታት ሓለዋ ፕረዚደንት) ከምኡ ‘ውን የማነ ገብረመስቀል (ሓላፊ ቤትጽሕፈት ፕረዚደንት) ነቲ ጉዳይ ክከታተሉዎ ኢሳይያስ መምርሒ ሃበ።

ስድራቤት መንእሰይ ማትያስ ሞት ወዶም ተነጊሩዎም። እንተኾነ፡ ሬሳ ወዶም ክምርመረሎም፡ ምኽንያት ሞቱ ክፈልጡ ከምዝደልዩ ሓቢሮም። እዚ መበሊኦም ድማ፡ ኣባላት ዓሻ ጎልጎል ወዶም ብ ኣገባብ ዘይብሉ መርመራ ከምዝተቐትለ ብስዉር ስለዝሓበሩዎም እዩ። ስድራቤት፡ “ወድና ብዘይወዓሎ ገበን ንምንታይ ተቐቲሉ”፡ ኢሎም ብትሪ ስለዝተኻትዑ፡ ወልዱ ባርያ ብኽቱር ፍርሒ ንየማነ ገብረመስቀልን ኮለኔል ተስፋልደትን ንኸገላግሉዎ ለሚኑ። ንስድራቤት መዋቲ ከይርእዮም ድማ ተሓቢኡ። ሽምግልና ተጀሚሩ የማነን ኮለኔል ተስፋልደትን ናብ ስድራቤት ምስ ቀረቡ፡ ስድራቤት መዋትን ኮለኔል ተስፋልደትን ቤተሰብ ኮይኖም ጸኒሖም። ከምዝብሃል፡ መዋትን ተስፋልደትን ደቂ ሓደ ከባቢ ምዃኖም ዝፈለጠ ኢሳይያስ ነቲ ኩነታት ንምዝሕሓል ኮነ ኢሉ ተጣቢቡ ዝሃቦ መምርሒ እዩ።  ስድራቤት ማትያስ ግን፡ “ ንሕና ምስ ቀተልቲ ወድናን ኣዛዚኦምን እምበር ምሳኹም ዘዛርብ የብልናን” ኢሎም ብትሪ ኳ እንተተኻትዑ፡ ቁጥዐ ብዝበዝሖ ትእዛዝ “ርክባትኩም ኩሉ ምስ ቤትጽሕፈት ፕረዚደንት እምበር ምስ ወልዱ ባርያ፡ ዘዛርብ የብልኩምን” ተባሂሎም ምፍርራሕ በጺሑዎም። ክልተ ሰለስተ ጊዘ ድማ ተስፋልደት ንወልዱ ሒዙ ክበጽሕ ኣብ ዳስ ሓዘን ተራእዩ።

ወልዱ ባርያ ካብዛ ዕለት ‘ዚኣ ኣትሒዙ ብፍርሒ ተዋሒጡ ብዙሕ ኣይረአን ዘሎ። ብልምዲ ንጉሆ ንጉሆ ካብቲ ብሓይሉ ሰይሩ ዝኣተዎ ዓቢ ቪላ ናይ ኣቶ ታረቀ ( ወናኒ እንዳ ወርቂ ዝነበረ) ድሕሪ ኣልቤርጎ ኢታልያ (ጣባ) ዝርከብ፡ ምስ ምሉእ ኣቑሑኡ ዝወረሶ ገዛ፡ ንዓሻ ጎልጎል ብናይ ኮርሶ ብሽግለታ፡ ናይ ኮርሳቶረ ልብሲ ወድዩ ምስ ሓደ ቀዲ ሸቃ ዝተባህለ ሓላዊኡ እዩ ዝወፍር ነይሩ። ካብዛ ፍጻሜ እዚኣ ንደሓር ግን ሓደ ሓደ “ወዲ ሰብ ቀቲልካ ኣይትደቅስ” ዝብል ናይ ተለፎን ምፍርራሕ ስለዝበጽሖ ኣሽንባድይ ዶ ብብሽግለታ፡ ምንቅስቓሳቱ ብመኪና ‘ውን ኣይረአን ዘሎ። ብዓል ኮለኔል ተስፋልደት ነብሱ ክሕሉን ክጥንቀቕን ከምዘለዎ ሓቢሮሞ ኣለዉ ‘ውን ይብሃል። ስድራቤት ማትያስን ኣባላት ዓሻ ጎልጎልን በዚ ጉዳይ ከምዘይደቀሱን ይሕንሕኑ ከምዘለዉን ሓበሬታ ‘ሎ።

ንኣመጻጽኣን መንነትን ወልዱ ባርያ ኣብ ቀጻሊ ብሰፊሑ ክንገልጾ ኢና።

ጉዱሳት ካብ ኣስመራ