ዓቢ መራሒ ተቓውሞ ኤርትራ፣ ገዲም ተጋዳላይ ኣሕመድ ናስር ብሕማም ወቕዒ ተጎዲኡ ሓደ መዓልቲ ኣብ ሕክምና ድሕሪ ምጽናሕ ሎሚ ረቡዕ 26 መጋቢት 2014 ኣብ ስቶክሆልም፣ ሽወደን ዓሪፉ።

ገዲም ተጋዳላይ ኣሕመድ ናስር ኣብ ካልኣይ ውድባዊ ጉባኤ ተጋድሎ ሓርነት ኤርትራ ኣቦ ወንበር ተሓኤ ዝተመርጸ ሓደ ካብ ፍሉጣት መራሕቲ ናይቲ ውድብ ዝነበረ ኤርትራዊ ተቓላሳይ እዩ።

ተጋድሎ ሓርነት ኤርትራ ኣብ 1981 ተበታቲና ካብ ሜዳ ኤርትራ ምስ ወጽአት ‘ውን ክሳብ’ቲ እዋን’ቲ ኣቦ ወንበር ዝነበረ ተጋዳላይ ኣሕመድ ናሰር፣ ካብ ፖለቲካ ኤርትራ ኣይተፈልየን። ድሕሪ ናጽነት ምስ ብጾቱ ሃገራዊ ዕርቂ ክግበር ናብ ኢሳይያስ ኣፈወርቂ ዘቕረቦ ምሕጽንታ ኣውንታዊ ምላሽ ከምዘይረኸበ ኸኣ ይንገር።

ካብኡ ቀጺሉ፣ ኣብ ደምበ ተቓውሞ ከም ሓላፊ ተጋድሎ ሓርነት ኤርትራ ማእከላይ ባይቶ ደሓር ከኣ ከም ኣቦ ወንበር ግንባር ሃገራዊ ድሕነት ኤርትራ ኮይኑ ኣገልጊሉ። ኣብ 2012 ንሓደሽቲ ወለዶ ቦታ ንምግዳፍ መዝነቱ ብወለንታ ለቒቑ ከም ተራ ኣባል ናይቲ ውድብ ቃልሱ ከምዝቐጸለ ‘ውን ይሕበር።

እቲ ብህድኣቱ ዝፍለጥ ተጋዳላይ ኣሕመድ ናስር፣ ኣብ ግዜ ቃልሲ ኣብ ወተሃደራዊ ኣካዳሚ ዒራቕ ናይ ከቢድ ብረት ትምህርቲ ቀሲሙ ናብ ሜዳ ኤርትራ ተመሊሱ ቃልሱ ከምዝቐጸለ ይፍለጥ።

ንናጽነት ኤርትራ ክጋደል ካልኣይ ደረጃ ምስ ፈጸመ ኣብ 1964 ኣብ እዋን ንእስነቱ ንኣስመራ ዝሓደጋ ተጋዳላይ ኣሕመድ ናስር ናብ ገዝኡ ኣይተመልሰን።

ስነስርዓት ቀብሩ ኣብ ሽወደን ክፍጸም እዩ።

መርበብ ሓበሬታ ኣሰና፣ ብመስዋእቲ ተጋዳላይ ኣሕመድ ናስር ሓዘና እናገለጸት፣ ንቤተሰቡን መቓልስቱን ጽንዓት ይሃብኩም ትብል።