ጉጅለ ህግዲፍ፡ 33ሚልዮን ናቕፋ ብምብኻን ኮራኹሩ ኣብ በዓል ሓሙሽተ ኮኸብ ሆቴል  ዝፍንጥዙሉ ኣኼባ ኣካይዱ።ኣብዚ ካብ ትማሊ ዓርቢ ክሳብ ጽባሕ ሰኑይ ኣብ ቢርሚንግሃም ሂልተን ሆተል ዝግበር ዳንኬራ ንነብስወከፍ ኩርኩር ንመዓልቲ ልዕሊ ዓሰርተ ሹዱሽተ ሽሕ(16,000 ናቕፋ)ከምዝተኸፍለ  ልኡኻት ድምጺ ረድዮ ኣሰና ካብቲ ቦታ ሓቢሮም።ነዚ ብኽነት ብዝምልከት ብተለፎን ዘዘራረብናዮም ኣብ ኤርትራ ኣብ ግዱድ ወተሃደራዊ ጎዳጉዲ ተጸሚዶም ዘለው መንእሰያት፡ንሓደ ኩርኩር ህግዲፍ ኣብቲ ሆተል ዝተዘርወ ገንዘብ፡ንመማቕርቲ ተባሂሉ ዝቁረጽ ገንዘብ ከይተጸብጸበ ወርሓዊ ደሞዝ 130 ኣባላት ከምዝኾነ ገሊጾም።ንሳቶም ከምዝብልዎ ህግዲፍ ንመራሕቲ ደምሂትን ካልኦት ውድባት ብደረጃ ኤርትራ ኣብ ዝለዓለ ሆተል ሓቑፉ ዘጥፍኦ ገንዘብ ከይኣክል፡ኣብ ኤውሮጳ ንፈንጠዝያ ኮራኹሩ ሚልዮናት ናቕፋ ምዝርዛሩ፡ክሳብ ግብኣተ መሬቱ ኣብ ልዕሊ ህዝቢ ዘለዎ ንዕቀት ከምዝቕጽሎ ዘረጋግጽ እዩ ኢሎም።

እዚ ድማ ምስቲ ህዝቢ ኢትዮጵያ እናጠመየ 10ይ ዓመት በዓል ንምጽንባል ደርግ ዝገበሮ ዳንኬራ ከምዝመሳሰልን ፋሽስታውያን ሕብሮም እምበር ተግባራቶም ሓደ ከምዝኾነ የነጽር።

ኣብዚ ቐረባ ጊዘ ነቲ ወዲውሻጠ መህግዲፍ(ypfdj) ዝነበረ  ድማ፡ህግዲፍ ዕድመ ስልጣን ንምልቃብ ነቶም ኣብ ወጻኢ ተወሊዶም ዝዓበዩ ብዛዕባ ኤርትራ ቅንጣብ ሓልዮት ዘይብሎም ብኣኼባ ተሞኽልዩ፡ ብመስተን ዝሙትን ሓንጎሎም ከምዝቆጻጸር ሓቢሩ ነይሩ።