ውልቀመላኺ ኢሳይያስ ኣፈወርቂ ሎሚ ሓሙስ 13 ታሕሳስ ንፈለማ ግዜ ኣብ ሶማልያ ምብጻሕ ከምዝፈጸመ ኣፈኛ ናይቲ ስርዓት ሓቢሩ።

ኣፈኛ ውልቀመላኺ ስርዓት ኢሳይያስ የማነ ገብረመስቀል (ቻርሊ) እቲ ምብጻሕ ከም ኣካል ናይቲ ኣብ መንጎ ኤርትራን ኢትዮጵያን ሶማልያን ዝካየድ ዘሎ ስሉሳዊ ምሕዝነት ይካየድ ከምዘሎ ኣብ ትዊተር ገሊጹ።

ይኹን`ምበር፡ ክሳብ 92 ኣባላት ፓርላማ ሶማል፡ ኣብዚ ሳልስቲ ፕረዚደንት ሶማል ምስ ኤርትራን ኢትዮጵያን ምስጢራዊ ስምምዕ ፈሪሙ ብዝብል ክሲ ካብ ስልጣን ክወርድ ምሕጽንታ ኣብ ዘቕረቡሉ እዋን እዩ ዝበጽሕ ዘሎ።

ውልቀመላኺ ኢሳይያስ ሶማል ኣብ ዝኣተወለ ኣዝዩ ጽኑዕ ሓለዋ ጸጥታ ከምዝነበረ ኣህጉራውያን ማዕከናት ዜና ሓቢረን።

ስርዓት ኢሳይያስ ምስ ኣሸባሪ ዕጡቕ ጉጅለ ሶማል ኣሽባብ ምትሕብባር ብምግባሩ ኣብ ልዕሊኡ ካብ 2009 ኣትሒዙ ጸኒዑ ዝጸንሐ ኣህጉራዊ እገዳ ኣብዚ ቀረባ እዋን ከምእተላዕለ ይፍለጥ።