ውልቀመላኺ ኢሳይያስ ኣፈወርቂ ብምኽንያት 20 ሰነ መዓልቲ ዝኽሪ ሰማእታት ኤርትራ ሎሚ ንጉሆ ኣብ ኣስመራ ኣብ ዝገበሮ መደረ፡ እቲ ኣብ ዝሓለፈ ቅንያት ኣብ ኢትዮጵያ ዝተቐልቀለ ተርእዮታት ሰላም ግቡእ ኣቓልቦ ዝሓትት ኣውንታዊ ምዕባለ ምዃኑ ብምጥቃስ፡ ነቲ ህሉው ኩነታት ብቐጥታን ብዕምቆትን ንምፍላጥን ቀጻሊ ውጥን ስራሕ ንምንዳፍን ናብ ኣዲስ ኣበባ ልኡኽ ክሰድድ ምዃኑ ገሊጹ።

ንሱ ኣብ መግለጺኡ፡ ነቲ ኣብ ኢትዮጵያ ተኸሲቱ ዘሎ ኩነታት ከም ኣውንታዊ ናይ ምስግጋር መድረኽ ጠቒሱ፡ ዘለፋኡ ናብ ወያነ ብምንጽጻር፡ ኣብ ርእስቲ ኣብ ኢትዮጵያ ዝተኸተሉዎ ኣዕናዊ ፖሊሲታት፡ ናይ ህዝቢ ኤርትራን ኢትዮጵያን ተመላላኢ ጉልበት ክፈጥሮ ዝኽእል ዝነበረ ኣውንታዊ ክልተኣውን ዞባውን ኩሉ ጎድናዊ ዕብየት ምዂላፉ ዝዓበየ መጒዳእቱ ከምዝነበረ ኣገንዚቡ።

ንሳቶም መናውሒ ዕድሚኦም ኢሎም ዝሓስቡዎ ምስ ኤርትራ ዘሎ ወጥሪ ከምዝቕል ምግባር ከምኡ `ውን ኣብ ልዕሊ ኤርትራ ዘሎ ዘይሕጋዊ እገዳ ንምዕቃብ ምስራሕ ከምዝኾነ ብምምልካት ከኣ፡ ነቲ ብዘይምኽኒት ዘባርዑዎ ግጭት ዶብ ተንጠልጢሉ ከምዝተርፍ ንምግባር `ሕራይ ፡ግን` እናበሉ ዘስምዑዎ ዘለዉ ጣቋ መርኣያኡ ከምዝኾነ ገሊጹ።

ውልቀመላኺ ኢሳይያስ፡ ነቲ ኢህወደግን ቀዳማይ ሚኒስተር ኢትዮጵያ ዶር ኣብይ ኣሕመድን ዝዘርግሑዎ ናይ ሰላም ወስታ በዚ ናይ ሎሚ መግለጺኡ ብኣውንታ ርእዩ ብጭቡጥ ንምፍላጡን ክሰርሓሉን ልኡኽ ክሰድድ ምውሳኑ፡ ነቲ ኣብ መንጎ ክልቲኦም ህዝብታት ዝጸንሐ ተጻብኦ ኣወጊዱ ዝምድናኦም ናብ ንቡር ናይ ምምላስ ተኽእሎ ስለዘለዎ ብኣውንታ ዝርአ እዩ።

ይኹን`ምበር፡ ውልቀመላኺ ኢሳይያስ ብቐንዱ፡ ዋና ብዓል ብርኪ ናይቲ ህይወት ኣሽሓት ዝቐዘፈ ግጭትን ብድሕሪኡ ዝቐጸለ ንኽልቲኡ ህዝብታት ናይ ሓደ ወለዶ ዕብየት ክሳራ ዘስዓበ ሰንፈላልን ኮይኑ፡ ኣብ ኤርትራ ክትግበር ንዝነበሮ ፖለቲካዊ ለውጢ ብምስምስ ናይዚ ኩነታት`ዚ ጅሆ ሒዙ ዕድመ ስልጣኑ ከናውሕ ከምዝጸንሐ ህዝቢ ኤርትራ ኣጸቢቑ ዝፈልጦ ሓቂ እዩ።

ስለዚ፡ ሕጂ `ውን ህዝቢ ኤርትራ፡ እቲ ኣብ ኢትዮጵያ ተረኺቡ ዘሎ ኣንውታዊ ኣንፈት፡ ኣብ ውሽጢ ኢትዮጵያ ፖለቲካውን ቁጠባውን ምትዕርራይ ብምግባር ይጅምር ምህላዉ ተገንዚቡ፡ ነቲ ኢሳይያስ ሎሚ ዝኣመቶ ኣውንታዊ ተበግሶ እናተባብዐ፡ ነዚ ስጉምቲ`ዚ ከም መተካእታ ናይቲ ዝበለየ ምስምስ ኣይኲናት ኣይሰላም ተጠቒሙ፡ ንህዝቢ ኤርትራ ዓምጺጹ፡ ስልጣኑ ንምንዋሕ ከይጥቀመሉ ምእንቲ፡ ምፍታሕ ውሽጣዊ ፖለቲካዊ ቅልውላዉ ብቐዳምነት ክርአ ከምዘለዎ ክግርሃሉ የብሉን።

እዚ ኩነታት`ዚ ፈጻሚ ስራሕ ኢህወደግ ብ 5 ሰነ ንስምምዕ ኣልጀሪስን ውሳኔ ኮምሽን ዶባት ኤርትራን ኢትዮጵያን ብዘይቅድመ ኩነት ከተግብሮ ቅሩብ ምዃኑ ድሕሪ ምግላጹ ዝተኸስተ እዩ።

ድሕሪ`ቲ ናይ ኢትዮጵያ መግለጺ፡ ውልቀመላኺ ኢሳይያስ ኣፈወርቂ ካርድታቱ ሒዙ ክጸናቶ ኳ እንተቐነየ፡ እቲ ኣካል ኢህወደግ ዝኾነ ህውሓት፡ ነቲ ኢትዮጵያ ንሓያለ ዓመታት ሒዛቶ ዝጸንሐት ቅድመ ኩነት ናይ ምዕቃብ ኣመት ዘለዎ፡ ነቲ ናይ ኢህወደግን ቀዳማይ ሚኒኒስተር ኢትዮጵያን ውሳነ ዝቃወምን ዘተኣጓጒልን መግለጺ ከምዘውጽአ ይፍለጥ።

ኣብ ናይ ትማሊ ዜና ከምዝተኸታተልኩሞ፡ ቀዳማይ ሚኒስተር ኢትዮጵያ ዶር ኣብይ ኣሕመድ፡ ነቲ ኣብ ፓርላማ ዝቐረበሉ፡ ነቲ ናይ ህውሓት መግለጺ ዘንጸባርቕ ሕቶታት፡ ሰላም ብሰላም እዩ ዝመጽእ ብምባል ነጺጉ፡ ዝምድና ኤርትራን ኢትዮጵያን ናብ ንቡር ናይ ምምላስ ጻዕሩ ክቕጽል ምዃኑ ምሕባሩ ይፍለጥ።

ኣብ መንጎ ኤርትራን ኢትዮጵያ ኣብ 1998 – 2000 ዓመተ ምህረት ብዝተኻየደ ኣዕናዊ ኲናት ካብ ክልቲኡ ወገናት ዓሰርተታት ኣሽሓት ህይወት ክሃልቕ ከሎ፡ ብድሕሪኡ ኣብ ዝቐጸለ 18 ዓመት ክልቲአን ሃገራት ዓቢ ሓባራዊ ናይ ምትሕግጋዝን ልምዓትን ዕድል ኣጥፊአን እየን።

ህዝቢ ኤርትራ ብፍላይ፡ ብሰንኪ እዚ ዘይሓላፍነታዊ መሪሕነት ዝፈጠሮ ኩነታት ብኹሉ መኣዝን ኣብ ከበባ ኣትዩ፡ ፖለቲካዊ ዕምጸጻኡ ብኢሱ፡ ብቑጠባውን ማሕበራውን ምረት ይሳቐ `ሎ። ተጠቃሚ ናይዚ ሕጂ ብኽልቲኡ ወገን ዝርአ ዘሎ ኣውንታዊ ኣንፈት ሰላም ክኸውን ድማ ናይ ኩሉ ደላዩ ጽቡቕ ደገፍ የድልዮ።

ህዝቢ ኢትዮጵያ ብሕልፊ ድማ እቲ ብቐጥታ በዚ ኩነታት`ዚ ከም ህዝቢ ኤርትራ ተጎዲኡ ዝጸንሐን ብምፍትሑ ብማዕረ ዝጥቀምን ህዝቢ ትግራይ `ውን፡ ምእንቲ ረብሕኡን ሓባራዊ ጠቕሚ ክልቲኡ ህዝብታትን ክብል ንዝኾነ ነዚ ኣንፈት`ዚ ዘዐንቀፍ ስጉምታት ክልብመሉ ይግባእ።