ወተሃደራት ግብጺ ኣብ ኤርትራ ኣትዮም ከምዘለዉ ኣብ ዝግለጸሉ ዘሎ ግዜ ከምኡ `ውን ሱዳን ሰራዊታ ኣዋፊራ ምስ ኤርትራ ዘዋስና ዶባት ዓጽያ ኣብ ዘላትሉ እዋን፡ ውልቀመላኺ ኢሳይያስ ኣፈወርቂ ምስ ፕረዚደንት ግብጺ ኣል ሲሲ ንምርኻብ ሎሚ ንጉሆ 9 ጥሪ ካይሮ ኣትዩ ከምዘሎ Egypt today ዝተባህለ ጋዜጣ ግብጺ ሓቢሩ።

ክልቲኦም መራሕቲ፡ ኣብ `ኢትሓድያ ፓላስ`፡ ንኩነታት ሃገራት መገብቲ ፈለግ ኒልን ሃገራት ቀርኒ ኣፍሪቃን ዝምልከት ዕጹው ዝርርብ ከካይዱ ምዃኖም እቲ ዜና ብተወሳኺ የገንዝብ።

ኤረ ቲቪ `ውን ነቲ ካብ ትማሊ ኣትሒዙ ብኻልኦት ምንጭታት ዝነፈሰ፡ ሎሚ ድማ ብ ማዕከናት ግብጺ ዝተጋውሐ ምብጻሕ ኢሳይያስ ድሒራ ኣቃሊሓቶ `ላ።

እዚ ናይ ኢሳይያስ መገሻ ናብ ግብጺ፡ ከምዚ ዝተጠቕሰ፡ ኣማኢት ወተሃደራት ግብጺ ኤርትራ ኣትዮም ናብቲ ምስ ሱዳን ዘዳውብ ሸነኽ ምዕራብ ኤርትራ ተዋፊሮም ምህላዎም ድሕሪ ዝተዘርግሐ ሓበሬታ፡ ሱዳን ሰራዊታ ኣዋፊራ ንኹሉ ዶባት ኤርትራን ሱዳንን ድሕሪ ምዕጻዋ፡ ከምኡ `ውን ድሕሪ`ዚ ምዕባሌታት`ዚ፡ ቀንዲ ሓለቓ ስታፍ ሰራዊት ሱዳን ልፍቴናንት ጀነራል ኢማድ ኣል-ዲን ምስጦፋ ዓዳዊ፡ ብቕድሚ ትማሊ ሰኑይ 7 ጥሪ ኣዲስ ኣበባ በጺሑ ምስ ቀዳማይ ሚኒስተር ኢትዮጵያ ሃይለማርያም ደሳለኝ ድሕሪ ምዝርራቡ ዝፍጸም ዘሎ እዩ።

ከምዚ ዝተኸታተልኩሞ፡ እቲ ብ ፕረዚደንት በሽር ዝተላእከ ሓለቓ ስታፍ ሰራዊት ሱዳን፡ ኣብ ኣዲስ ኣበባ ንጋዜጠኛታት ኣብ ዝሃቦ መግለጺ፡ `ኣብ ከባቢና ዘሎ ብድሆታት ካብ ግዜ ናብ ግዜ እናተለዋወጠ እዩ ዝመጽእ ዘሎ። እቲ ብድሆ፡ ዞባውን ኣህጉራውን እዩ። ስለዚ ኸኣ ኢና፡ ሱዳንን ኢትዮጵያን ንዝገጥሙና ብድሆታት ብሓባር ንምፍታሕ እንመኻኸርን እንተሓጋገዝን። ንኢትዮጵያ ዝጎድእ ነገር ንዓና ንሱዳናውያን ይጎድኣና እዩ፡ ንሱዳን ዝጎድእ ነገር ድማ ከምኡ ንኢትዮጵያ ይጎድኣ። ኩሉ ግዜ ርክባትና እነሐይለሉ ምኽንያት ከኣ ንሃገርናትናን ህዝብናትናን ክንብል ኢና` ኢሉ።`

ኢሳይያስ፡ ኣቐዲሙ ናብ ሕቡራት ኢማራት ዓረብ `ውን በጺሑ እዩ።

ኢማራት ዓረብ፡ ድሮ ኣብ ኤርትራ ኣብ ዓሰብ ወተሃደራዊ መደበር ክህልዋ ኸሎ፡ እቲ ዝብሃል ዘሎ ምውፋር ግብጻውያን ወተሃደራት ኣብ ምዕራብ ኤርትራ `ውን ብምውህሃድ ምስ ኢማራት ከምዝተገብረ እዩ ዝሕበር።

ጸብጻባት ምውፋር ወተሃደራዊ ሓይሊ ግብጺ ናብ ኤርትራ፡ ነታ ድሮ ብምኽንያት ህንጻ ሓጽቢ ህዳሰ ምስ ግብጺ ኣብ ምስሕሓብ ዘላ ኢትዮጵያ ኣቖጢዑዋ ከምዘሎ፡ ድሮ `ውን ሰራዊታ ናብ ዶባት ኤርትራን ኢትዮጵያን ኣጸጊዓ ከምዘላ መርበብ ሓበሬታ ኣጀዚራ ይጠቅስ። ኢማራት ኣብ ዓሰብ ወተሃደራዊ መዓስከር ደኲና ምህላዋ `ውን ንኢትዮጵያ ከየቕሰነ ዝጸንሐ ጉዳይ እዩ።

ብዘይ`ዚ ሓድሽ ምዕባሌታት`ዚ፡ ኢትዮጵያ፡ ኤርትራ ኢደ-በዛ ግብጺ ኮይና ብመንገዲ ተቓወምቲ ኢትዮጵያ ኣብቲ ዝስራሕ ዘሎ ሓጽቢ ሽርሕታት ንምፍጻምን ኣብ ኢትዮጵያ ህዝባዊ ናዕቢ ንምልዕዓልን ትሰርሕ ምህላዋ ክትከስስ ጸኒሓ እያ። እዚ ዝብሃል ዘሎ ምእታው ወተሃደራት ግብጺ፡ ነቲ ኣብ መንጎ ኤርትራን ኢትዮጵያን ዝጸንሐ ምትፍናን መሊሱ ከምዘዕርጎ ድማ ዘማትእ ኣይኮነን።

በዚ ኮይኑ በቲ፡ ኣብዚ ብደረጃ ጎረባብቲ ሃገራትን ዞባ ወሽመጥ ዓረብን፡ ብሕልፊ ንኤርትራ ዓውዲ ናይ ውክልና ኲናት ከይገብራ ዘስግኣሉ ዘሎ እዋን፡ ቀንዲ ተጎዳኢ እቲ ድሮ ብውልቀመላኽነትን ብልሽውናን ብዝጠስጠሰ ውዱቕ መሪሕነት ላሕሊሑ ዝሳቐ ዘሎ ውጹዕ  ህዝቢ ኤርትራ እዩ።

Subscribe ASSENNA YouTube to get Radio Assenna shows on time: