ኣብ ሱዳን ዝገበሮ ናይ ክልተ መዓልታት ምብጽሕ ፈጺሙ ሎሚ 16 መከረም ኣስመራ ዝተመልሰ ውልቀመላኺ ኢሳይያስ ኣፈወርቂ ምስ መራሒ ሱዳን ወተሃደራውን ጸጥታውን ዘጠቓልል ሓባራዊ ስምምዓት ከምእተፈራረመ ማዕከና ዜና ናይቲ ስርዓት ኣብ ናይ ሎሚ ዜናአን ሓቢረን።

ውልቀመላኺ ኢሳይያስን መራሒ ሱዳንን፡ ነቲ ስምምዓት ንምክትታል ላዕለዋይ ኮሚተ ከምዘቖሙ `ውን እቲ ዜና ይጠቅስ።

እቲ ኣብ ኢትዮጵያን ሱዳንን ድሕሪ ዝተራእየ መንግስታዊ ለውጥታት ቅሳነት ስኢኑ ብጭንቀት ተርኡ ዝጽበ ዘሎ ውልቀመላኺ ኢሳይያስ፡ ከምቲ ኣብ ኢትዮጵያ ኣቢ ኣሕመድ ስልጣን ምስ ሓዘ ዝገበሮ፡ ንሽሙ ብዲፕሎማስያውን ቁጠባውን ምትሕግጋዝ ሸፋፊኑ ተቐዳዲሙ ኣብ ጸጥታን ምክልኻልን ዘተኮረ ስምምዕ ምፍርራሙ፡ ነቲ ሓዲሩዎ ዘሎ ናይ ጭንቀት ህሉው ኩነተ ኣእምሮ ዘመልክት እዩ።

ውልቀመላኺ ኢሳይያስ ዋላ ብዋጋ ልኡላውነት ሃገር ዕድመ ስልጣኑ ናይ ምንዋሕ ዕላማ ደኣምበር ናይ ሰላም ኮነ ቁጠባዊ ምትሕግጋዝን ፋዕራ የብሉን።

ካብ ኢትዮጵያ ዝተረኽቡ ውሽጣዊ ሓበሬታታት ከምዘመልክቱዎ፡ ውልቀመላኺ ኢሳይያስ ምስ ኣቢይ ኣሕመድ ናይ ጸጥታ ስምምዕ ድሕሪ ምፍርራሙ ን1ይ ሚኒስተር ኢትዮጵያ ዘቕረበሉ ቀዳማይ ሕቶ፡ ነቶም ኣብ ኢትዮጵያ ዝመደበሮም ተቓውምቲ ኤርትራ ኣረክቡና ዝብል እዩ። 1ይ ሚኒስተር ኣቢይ ኣሕመድ ግን ፍቓደኛ ኮይኑ ኣይተረኽበን።

እቲ ብዙሕ ዋዕዋዕ ዝተባህለሉ ርክብ ኢሳይያስን ኣቢይ ኣሕመድን ዝሕልሕል ኢሉ፡ የማነ ማንክን ዑስማን ሳልሕን ኣብዚ ዳሕረዋይ እዋን ናብ ኣዲስ ኣበባ ምስ ከዱ፡ መንግስቲ ኢትዮጵያ፡ ከምቲ ንስኻትኩም ኣብ ኣስመራ ምስ ተቓወምቲ ኢትዮጵያ ኣራኺብኩም ናይ ሰላምን ዕርቅን ውዕል ክንገብር ዝሓገዝኩምና፡ ንሕና `ውን ከነራኽበኩም ፍቓደኛታት ዲኹም ክብሉ ሕቶ ምስ ኣቕረቡሎም፡ የማነ ማንክን ዑስማንን ንሕና በዚ ኣጀንዳ `ዚ ክንዛረብ ኣይተዳለናን ኢሎም፡ ነቲ ብኢትዮጵያ ዝቐረበሎም እንግዶት ከምዝነጸጉዎ `ውን እቲ ሓበሬታ የረድእ።

ብዘይካ`ዚ ውልቀመላኺ ኢሳይያስ ኣብቲ ፈለማ እዋን ንመንግስቲ ኢትዮጵያ፡ ነቲ ኣብ ኢትዮጵያ ዘሎ መዓስከራት ስደተኛታት ዕጸዉዎ፡ ስደተኛታት `ውን ኣይትቀበሉሉ ኳ እንተበሎም፡ መንግስቲ ኢትዮጵያ ግን፡ ድሌት ዘለዎ ስደተኛ ብፍቓዱ ናብ ኤርትራ ክምለስ ዝደሊ እንተኾይኑ ክሕተት ይኽእል እዩ። ምዕጻው መዓስከር ስደተኛታትን ስደተኛታት ዘይምቕባልን ግን፡ ምስቲ ዝፈረምናሉ  ዓለም ለኻዊ ሕግታት ዝቃዶ ስለዘይኮነ ከነተግብሮ ኣይንኽእልን ኢና ኢሎም ከምዝኣበዩዎ `ውን ይፍለጥ።

ስለዚ እዚ ሕጂ ውልቀመላኺ ኢሳይያስ ምስ መራሒ ሱዳን ዝገበሮ ናይ ጸጥታን ወተሃደራውን ስምምዕ `ውን፡ ነቲ ኢሳይያስ ከማልኦ ዝደሊ ምስ ምቕጻል ግበታ ስልጣኑ ዝተኣሳሰረ እኩይ ውዲት ደኣምበር ናይ ሰላምን ብልጽግናን ዕላማ ዘለዎ ኣውንታዊ ጽምዶ ኣይኮነን።

ኣብዚ ገይረዮ ዝብሎ ዘሎ ስምምዓት ምርኩስ ገይሩ፡ ከምቲ ኩሉ ግዜ መርገጺ-እግሪ  ኣብ ዝረኸበሉ ሰዓት ተቐዳዲሙ ዝፍጽሞ፡ ኣብ ፈለማ ዓመታት ድሕሪ ናጽነት ኣብ ኢትዮጵያ ዝገበሮ፡ ሕጂ `ውን ዝፈታትኖ ዘሎ፡ ኣብ ሱዳን ከኣ ካብ ግዜ ቃልሲ ጀሚሩ ኣብ ልዕሊ ፍሉጣት ኣባላት ተጋድሎ ሓርነትን ካብ ህዝባዊ ግንባር ዘምለጡ ተጋደልትን ዘዘውትሮ ዝነበረ፡ ጭውያን ቅትለትን ተቐናቐንቱ ንምክያድ ድሕር ስለዘይብል፡ እቶም ኣብ ኢትዮጵያን ሱዳንን ዝንቀሳቐሱ ተቓወምቲ ይኹን ብሓፈሻ ህዝቢ ኤርትራ ብሓፈሻ ክልብመሉ ዝግባእ ጉዳይ እዩ።