ውልቀመላኺ ኢሳይያስ ኣፈወርቂ፣ ብ 24 ግንቦት ብምኽንያት ጽምብል ናጽነት መበል 23 ዓመት ኣብ ኣስመራ ኣብ ዝሃቦ መግለጺ፣ ምንዳፍ ሓዱሽ ቅዋም ክጅመር ምዃኑ ሓቢሩ።

ህዝቢ ኤርትራ ንምንዳፉ ሰለስተ ተኸታታሊ ዓመት ዝወሰደሉ፣ ብ1997 ዝጸደቐ ሃገራዊ ቅዋም ‘ኳ እንተለዎ፣ ውልቀመላኺ ኢስይያስ ብዛዕባ ትግባረ ናይቲ ኮነ ኢሉ ዘባኸኖ ድሉው ቅዋም ኣብ ክንዲ ዝዛረብ፣ ‘ሓዱሽ ቅዋም’ ክንደፍ ምዃኑ ምግላጹ ንዝህብና ብባዶ መብጽዓ ንምትላል ዝኣለሞ፣ ነቲ ሕዱር ቅዋምን ሕግን ናይ ምጽባእ ሕማሙ ዘንጸባርቕ ፍሹል ፈተነ እዩ።

እዚ ኸኣ ውልቀመላኺ ኢሳይያስ ኣፈወርቅን ስርዓቱን ብስነሓሳብ ከምዝተሳዕሩን፣ ስዕረቶም ኣብ ቅድሚ ህዝቢ ከምዝተኣመኑሉን የንጸባርቕ። ኢሳይያስ ነቲ ኣብ ውሽጥን ወጻእን ዘሎ ህዝቢ ኤርትራ ብቐጻሊ ዘልዕሎ ዘሎ ሕቶ ቅዋማዊ መንግስቲ ከም ቀደም ብብድዐ ዕሽሽ ኢልካ ምሕላፍ ዘይከኣል ምዃኑ ተገንዚቡ ክዛረበሉ ምግዳዱ እቲ ስርዓት ብፖለቲካዊ መዳይ ተሳዒሩ፣ ለሽ ኢሉ ደኺሙ ምህላዉ ብዘየወላውል ዘረጋግጽ እዩ። ህዝቢ ኤርትራ በዚ መደናገሪ ስልቲ ኢሳይያስ ከይተደናገረ፣ ነቲ ዘይተርፍ ውድቀቱ ኣቀላጢፉ፣ ነቲ ኣቐዲሙ ዝጸደቕ ቅዋሙ ምርኩስ ብምግባር ህዝባዊ ዲሞክራስያዊ መንግስቲ ንምትካል ጽዓቱ ካብ ቀደም ብዝያዳ ከሐይል ይግባእ።