እቲ ኣብዚ ዝሓለፈ ሒደት ኣዋርሕ ምስ ኢትዮጵያ ርክብ ካብ ዝጅምር ናብ ኢትዮጵያ ሰለስተ ግዜ ዝተመላለሰ ውልቀመላኺ ኢሳይያስ ኣፈወርቂ፡ ኣብ ክልል ኣምሓራ ዑደት ንምግባር ሎሚ ቅድሚ ቀትሪ ጎንደር ከምዝኣተወ ቴለቭዝን ኢትዮጵያ ብቀጥታ ኣብ ዘመሓላለፎ ዜና ኣፍሊጡ።

ኣብቲ ኣጋጣሚ 1ይ ሚኒስተር ኢትዮጵያ ኣቢይ ኣሕመድን ሰበስልጣን ናይቲ ክልልን ኣብ መዓርፎ ነፈርቲ ጎንደር ተቐቢሎሞ።

እቲ ወትሩ፡ ንኹሉ እቲ ኢሳይያስ ዝገብሮ ናብ ኢትዮጵያ ዝገብሮ ዘሎ ምምልላስ፡ ` ገስጋስ ናይቲ ብ 9 ሓምለ ዝተበጽሐ ስምምዕ ሰላም ንምግምጋም` ክብል ክሽፍኖ ዝፍትን ሚኒስተር ዜና ውልቀመላኺ ኢሳይያስ የማነ ቻርሊ ኣብ ትዊተር ኣብ ዝዘርግሖ ሓበሬታ፡ ሎሚ `ውን ኣብ ትዊተር ተመሳሳሊ መስመር ኣቐሚጡ። ነዚ ተዋስኦ`ዚ ሓቂ ንምምሳል ድማ ከምቲ ዝሓለፈ ፕረዚደንት ሶማልያ `ውን ተዓዲሙ `ሎ።

ይኹን`ምበር፡ እቲ ኢሳይያስ ናብ ክልል ኣምሓራ ዝገብሮ ዘሎ ምብጻሕ ከምቲ ከምስሉዎ ዝደልዩ ዘለዉ ቀንዲ ድርኺቱ ዞባዊ ምትሕግጋዝ ዘይኮነ ክልላዊ ጉዳይ ምዃኑ ተዓዘብቲ ይእምቱ።

መራሕቲ ክልል ኣምሓራ ብዘይወግዓዊ መንገዲ ንተደጋጋሚ ግዜ ኣስመራ በጺሖም ምስ ኢስሳይያስ ከምእተራኸቡን ክበጽሕ ናብ ክልል ኣምሓራ ክበጽሕ ዕድመ ከምዘቕረቡሉን ይፍለጥ። ሕጂ ድማ፡ ብኹሉ`ቲ ንኽልል ትግራይን ኣምሓራን ዘዋስን ከም ብዓል ወልቃይት፡ ጸገደ፡ ከምኡ `ውን ራያ ዝኣመሰሉ ከባቢታት ኣብ መንጎ ተጋሩን ኣምሓራን ምትፍናንን ግጭትን ተጓሃሂሩሉ ኣብ ዘሎ እዋን እዩ ነዚ ዑደት ዝፍጽሞ ዘሎ።

ውልቀመላኺ ኢሳይያስ ኣብ ዝሓለፈ እዋን ኢትዮጵያ ከይዱ ፋሪካ ሽኮር ኣብ ዝመረቐሉ ኣጋጣሚ፡ ቀንዲ ኣጀንድኡ፡ ንላዕለዎት መራሕቲ ኦሮሞን 1ይ ሚኒስተር ኣቢይን ብምርኻብ ነቲ ብገለ ላዕለዎት መራሕቲ ኦሮሞ ንኣቢይ ዘሎ ዘይምእዙዝነት ንምምሕያሽ ምንባሩ ጸኒሑ ከምዝተጋህደ ይዝከር። ሎሚ ኣምሓራ ኣብ ልዕሊ ትግራዎት ሕኒን ኣብ ዝብሉሉ ዘለዉ እዋን ንምትብባዖም ናብ ጎንደርን ባህርዳርን ዑደት ይገብር ምህላዉ፡ ሓይሊ ኦሮሞን ኣምሓራን ኣስሚርካ ንኣቢይ ብምድልዳል ትግራዎት ከምዝለዝቡ ወይ ከምዝጭፍለቑ ንምግባር ዝዓለመ ምዃኑ ተዓዘብቲ ይእምቱ።

እቶም ቀደም፡ ንህዝቢ ኤርትራን ስርዓት ኢሳይያስን ብማዕረ ከም ጸላእቲ ርእዮም፡ ደሓን ነንሕድሕዶም ይባልዑ ኢሎም ህዝቢ ኤርትራ ክዳኸም ስቕ ኢሎም ዝተዓዘቡ፡ መንግስቲ ሒዞም ከለዉ ብኣግኡ ንህዝቢ ኤርትራ ብልቢ ሓጊዞም ሽግሩ ክፈትሕ ዘየተባብዑዎ ተጋሩ፡ ሕጂ `ውን ኢሳይያስ ከም ዕንቅርቢት ተገምጢሉ እናነኸሶምን ውዲት እናኣለመሎምን ከሎ፡ በቲ ህዝቢ ብህዝቢ ዝብል ናይ ስግረዶብ ንግድን ባህላዊ ምርኢታትን ዘንጊዖም ከምዘለዉ `ውን ትዕዝብቶም ይገልጹ።