ውልቀመላኺ ኢሳይያስ ኣፈወርቂ «ሓሚሙ ዶ ተጸሊሉ» ዝብል ወረ ኣብ ከም ፈይስ ቡክ ዝኣመሰሉ ማሕበራዊ መራኸቢታት ገኒኑሉ ኣብ ዘለወሉ እዋን፣ ኤሪ ቲቪ ትማሊ ንኢሳይያስ ብዝምልከት ዝዘርግሓቶ ብደረቕ ስእሊ ዝተሰነየ ዜና ነቲ ፈኸም ክብል ዝቐነየ ወረ ላምባ ወሲኹ ዘብእስ ኮይኑ ተረኺቡ።

መደበር ቴለቭዥን ናይቲ ስርዓት፣ ኣብ ናይ ትማሊ ዜናኣ ካልኦት ሰበስልጣን ናይቲ ስርዓት ምስ ልኡኻት ቻይና ንዝገበሩዎ ርክብ ብተንቀሳቓሲ ስእሊ ኣቕሪባቶ ክንሳ፣  «ኢሳይያስ ምስ ላዕለዋይ ልኡኽ ቻይና ተራኺቡ» ንዝብል ዜናኣ ብደረቕ ስእሊ ጥራይ ምቕራባ፣ መሊሱ ሕቶ ኣልዒሉ፣ ዋላ ኣብቶም «ኢሳይያስ ደኣ ቀደም ዝዓበደ፣ እንታይ ሓድሽ ነገር ኣለዎ» ብምባል ነቲ ወረ ንዒቖሞ ዝቐነዩ ወገናት ከዛርብ ጀሚሩ።

ኢሳይያስ ኣብ ዝድነሰሉ እዋን፣ ኣፈኛታት ናይቲ ስርዓት ንናይ ቻይና ልኡኻት፣ ብተደጋጋሚ ግዜ መርኣዩ ኢሳይያስ ኣብ ቴለቭዥን ከምዝጥቀመሎም ይፍለጥ። ልክዕ ከምዚ ናይ ትማሊ፣ ትሕዝቶን ቁምነገርን ርክቦም ዘይኮነ፣ እቲ ኢሳይያስ ዝዋስኣሉ ፖለቲካዊ ድራማ እዩ ዘገድሶም።