እታ መሳርሒ ፕሮፖጋንዳ ምልካዊ ስርዓት ኢሳይያስ ዝኾነት፣ ወግዓዊት ጋዜጣ “ሓዳስ ኤርትራ”፣ ሎሚ 12 ሕዳር 2013 ኣብ ኤርትራ ከምዘይተሓትመትን ከምዘይተዘርግሐትን ምንጭታት ኣሰና ካብ ኣስመራ ሓቢሮም።

እታ ጋዜጣ፣ ኣብቲ ኣብ ወጻኢ ዝርከቡ ደገፍቲ ናይቲ ስርዓት ዝከታተሉዎ መርበብ ሓበሬታ ህግደፍ (shabait.com) ኣብ ኢንተርነት ተሰቒላ ‘ኳ እንተላ፣ ካብቲ ዝጀመረትሉ ፈለማ ቴስዓታት ክሳብ ‘ዚ እዋን’ዚ ኣቋሪጹ ዘይትፈልጥ ናይ ወረቐት ሕትመታ ስለምንታይ ሎሚ ቦዅሩ ከምዝወዓለ ዛጊት ጭቡጥ ሓበሬታ ኣይተረኽበን።

ይኹን’ምበር፣ ኣብ ርእሲ’ቲ ኣብ ኣስመራ ልሙድ ተረእዮ ኮይኑ ዘሎ ምቍራጽ ኣገልግሎት ጸዓት ኤለትሪክ፣ እቲ ብምኽንያት ሕጽረት ገንዘብ ነቲ ኣብ ሰሰለስተ ወርሒ ክዓጽዎ ዝግብኦ ክፍሊት ኣገልግሎት ፈነወ ሳተላይት Nile ከምኡ ‘ውን Globecast ከይዓጸወ ዓመቱ ኣሕሊፉ፣ ካብቶም ትካላት ፈነወ ሳተላይት መጥነቀቕታ ተዋሂቡዎ ዘሎ ውዱቕ ስርዓት ተመሳሳሊ ጸገም ኣጋጢሙዎ ክኸውን፣ ከምዝኽእል እቶም ምንጭታት ኣሚቶም።

ወግዓዊት ጋዜጣ ስርዓት ኢሳይያስ “ሓዳስ ኤርትራ”፣ ድሕሪ ምዕጻው ብሕታውን ጋዜጣታት ኤርትራ ኣብ 2001 ዓመተ ምህረት ብምልካዊ ስርዓት ህግደፍ፣ ኣብ ኤርትራ ክትሕተም ዝጸንሐት እንኮ ጋዜጣ እያ።