መራሒ ስርዓት ግህደፍ ውልቀመላኺ ኢሳይያስ ኣፈወርቂ ብሰንኪ ‘ቲ ኩሉ ዝፈልጦ ናይ ኣልኮላዊ መስተ ኣመሉ ሕዱር ሕማም ኣጥርዩ፡ ካብዚ ዝሓለፈ ቀረባ ዓመታት ብፍላይ ንሕክምና ናብ ቀጠርን ካልኦት ሃገራት ወጻእን ክመላለስ ከምዝጸንሐ ብተደጋጋሚ ኣብ ዜናታት ተጠቒሱ እዩ።

ኣብዚ ዝሓለፈ ክልተ ሰሙን ብፍላይ ግን፡ ሕማሙ ኣዝዩ ስለዝኸበዶ ብምስጢር ካብ ክልተ ሳዕ ንላዕሊ ናብ ወጻኢ ከምዝተመላለሰ እሙናት ምንጭታት ካብ ኤርትራ ኣረጋጊጾም።

ነዚ ብዝምልከት ኣብ መርበብ ሓበሬታ ኣሰና ሓበሬታ ድሕሪ ምዝርጋሕና ድማ፡ እቲ ከምዚ ንዝኣመሰለ ዜናታት ሓሶት ኣምሲሉ ህዝቢ ንምድንጋር ንምስሊ ኢሳይያስ ኣብ ቴለቪዥን ኤርትራ መርኣዪ ዝኸውን ንጥፈታት ምሂዙ ድራማ ዝሰርሕ ዝነበረ ሚኒስትሪ ዜና ህግደፍ፡ ኣመሉ ገዲፉ፡ ሎሚ ምሸት 22 ሚያዝያ፡ “ኢሳይያስ ኣፈወርቂ ከም መንእሰይ ኣብ ብርኩ የስተንፍስ ኣሎ” ክብል፡ ስእሊ ኢሳይያስ ዘይብሉ ወግዓዊ ጋዜጣዊ መግለጺ  ኣብ ቲቪ-ኤረ ዘርጊሑ።

እዚ ዓሊ ዓብዱ ዝመሃዞ ሓድሽ ናይ ቲቪ-ኤረ ኣማተር ጥበብ ግን፡ በንጻር’ቲ ነቲ ዜና ንምግታእን ንምህሳስን ዝነበሮ ዕላማ፡ ህዝቢ “ሰራቕ ሞባእ’ሲ ባዕሉ ይለፋለፍ” ኢሉ፡ ዝያዳ ከምዝህንጠየሉን ከምዝኣምኖን ገይሩዎ ‘ሎ።

ነቲ መሳርሒ ፕሮፖጋንዳ ህግደፍ ሚኒስትሪ ዜና ከም ኣመል ኣይኡ ንኹሉ ናብ ኣመሪካ ብምጽጋዕ ነቲ ዕቱብ ኩነታት ክሰግሮ ዘካይዶ ናይ ተልሜደን  ፈተነ ከምዘለዎ ብድምጺ ንምስማዕ ኣብዚ ጠውቑ።

ሎሚ ቕነ ስርዓት ህግደፍ ብጥብቂ ምስጢር ክሕዞ ዝፈተነ ጉዳይ ግን ሕማምን ሃለዋትን ኢሳይያስ ጥራይ ኣይኮነን። ማዕረማዕሪኡ ብምስጢር ክካየድ ንዝቐነየ ኣኼባታት ላዕለዎት ሓለፍቲ ስርዓት ህግደፍ ክሓብኦ ምፍታኑ፡ ምስ ክብደት ሕማም ኢሳይያስን ተኽእሎታት ቀጻልነቱን ዝተኣሳሰር፡ ኣብ ፖለቲካዊ ኩነታት ኤርትራ ዕቱብ ሳዕቤን ዘለዎ ጉዳይ ምዃኑ ዝእምት እዩ። ነዚ ንኣገዳሲ ሃገራዊ ፖለቲካዊ ኩነታት ብምስጢር ሰቲርካ ግዜ ብምግዛእ፡ ፖለቲካዊ ግብረመልሲ ህዝቢ ንምዕብዓብ ዝግበር ዘሎ ሃቐነ ግን ህዝብን ሰራዊትን ኤርትራ ዕቱብ ኣስተብህሎ ክገብረሉ ይግባእ።