ቦኽሪ ወዱ ንውልቀመላኺ ኢሳይያስ ኣፈወርቂ፡ ኣብርሃም ኢሳይያስ፡ ጽዑቕ ናይ ሰለስተ ወርሒ ስልጠና  ወተሃደራዊ ስነፍልጠትን ምሕደራን ድሕሪ ምውሃቡ፡ ምኽትል ሓይሊ ኣየር ክኸውን ብኢስይያስ ከምእተመዘዘ ምንጭታት ሓቢሮም።

ነዚ ሓበሬታ’ዚ ብዝተፈላለየ መንገዲ ንምርግጋጽ ኣብ ዘካየድናዮ ፈተነ፡ ኣብ ሓይሊ ኣየር ተወሳኺ ስልጠና ይወስድ ከምዘሎ፡ ከምኡ ‘ውን ክብ ዝበለ መዝነት ተዋሂቡዎ ከምዘሎ ክረጋገጽ ተኻኢሉ።

ኣብርሃም ኣፈወርቂ፡ ቅድሚ ወርሒ ኣቢሉ ብሃታ ሃታ ከምዝምርዖ ዝተገብረሉ ምኽንያት፡ ክንድሰብ ከምዝኣኸለን ንሓላፍነት ድሉው ምዃኑን ንምርኣይን ከምዝኾነ ‘ውን እቶም ምንጭታት ጠቒሶም።

በቲ ሓደ ናይ ስልጣን ውርሻ ብኣግኡ ከሰላስል፡ በቲ ሓደ ድማ፡ ፍሉይ ሓለፋ ከምዘይደሊ፡ ከም ህዝቡ ምዃኑ ንህዝቢ ከደናግር፡ ኣብ ክልተ ዘይጠዓዓሙ ምርጫታት ክወላወል ዝነብር ዘሎ ዲክታተር ኢሳያስ ኣፈውርቂ ፡ ከምስል ንወዱ ንሳዋ ኳ ልኢኹዎ እንተነበረ፡ ወዱ፡  ኣብርሃም ኢሳይያስ፡ ናብ ዩኒቨርሲቲ ክሓልፍ ስለዘይከኣለ፡ ኮለጅ ማይ ነፍሒ ብሃንደበት ክኽፈት ከምዝኣዘዘ ይንገረሉ።

እዚ ኣብ መራሕቲ ሃገራት ዓረብ ልሙድ ዝኾነ፡ ሳዳምን ቀዛፍን ነቶም ጨካናትን ዓዋሉን ደቆም ሸይሞም ስልጣኖም ክሕልዉን ከሰጋግሩሎምን ፈቲኖም ዘይተዓወቱሉ፡ ብህዝባዊ ብድሆታት ዝስበር ዘሎ ንስልጣን ስድራቤታዊ ውርሻ ንምግባር ዝሕልን ድሑር መስፍናዊ ሕልሚ፡ ምስ ኢሳይያስ ኣተኣሳሲሮም ሰባት ከም ዋዛ ጥራይ ዘልዕሉዎ ዝነበሩ ጉዳይ ኳ እንተኾነ፡ ሕጂ ኣሰራት ከርኢ ምጅማሩ፡ መወሳኽታ ናይቲ ንኤርትራውያን ከከይተጸበናዮ ዘጋጠመና ዘሎ ብዙሕ ኣንደበታት እዩ።