ኣቐዲምና ከምዝጠቐስናዮ ብምኽንያት ቀዳማይ ዓመት ናይቲ ኣብ 21 ጥሪ 2013 ኣብ ስርሒት ፎርቶ ብጅግንነት ዝተሰውአ ተባዕ ስዒድ ዓሊ ሕጃይ (ወዲ ዓሊ) እዛ ሒዝናያ ዘለና ወርሒ ጥሪ “ወርሒ ጅግና ስዉእ ወዲ ዓሊ” ከምእትኸውን ንምግባር፣ ድምጺ ኣሰና ካብ ፈለማ ኣትሒዛ ኣብ መደባታ ብዝተፈላለዩ ጽሑፋት፣ ግጥምታትን ዜማታት ነቲ ወዲ ዓሊ ምእንቲ ህዝብን ሃገርን ዝፈጸሞ ሞያ ክትዝክሮ ከምዝጸንሐት ኣስተብሂልኩምሉ ክትህልዉ ተስፋ ንገበር። እዚ ፍሉይ ትዅርት ‘ዚ ክሳብ መወዳእታ ናይዛ ሒዝናያ ዘለና ወርሒ ጥሪ ክቕጽል እዩ።  ከምቲ ድሮ ትገብሩዎ ዘለኹም ተሳትፎኹም ኣብዚ ዕማም ‘ዚ ክዓዝዝ ከኣ ኣገዳሲ እዩ።

እቲ ኣብ ድሮ ሓዱሽ ዓመት ዝጀመርናዮ ንስድራቤት ወዲ ዓሊ ንምድጋፍ ዝተበገሰ ናይ ህጹጽ ሓገዝ መደብ ‘ውን፣ ከምቲ ፈለማ ‘ውን ዝጠቐስናዮ ግዝያውነቱ ሓልዩ፣ ምስዚ ተተሓሒዙ ኣብ መወዳእታ ናይዛ ወርሒ ክዛዘም እዩ።

ኣብ ውሽጢ ሃገር ዝርከብ ህዝብናን ኣባላት ሓይልታት ምክልኻልን፣ ብፈነወታት ራድዮ ኣሰና ሓጺር ማዕበልን ሳተላይትን ከምኡ ‘ውን ኣብ ስደት ዝነበር ህዝብና ብ ኢንተርነት መታን ክሰምዑዎን ክከታተሉዎን ከኣ፣ ኣብታ ኣብ ወርሒ ጥሪ ዘላ ናይ መወዳእታ መደብ ድምጺ ኣሰና (ዓርቢ፣ 31 ጥሪ) ከም መደምደምታ “ወርሒ ጅግና ስዉእ ወዲ ዓሊ” ኣብ ዝቐርብ ፍሉይ መደብ፣ እቲ ድሮ ኣብ demo.archive.assenna.com ዝዝርዘር ዘሎ ኣበርክቶን ኣስማትን ናይ ኩሎም ‘ቶም ግዱሳት ደገፍቲ ብዝርዝር ክንበብ እዩ።

ዝኽሪ ጅግና ወዲ ዓልን ደገፍ ስድራቤቱን፣ ንወዲ ዓልን ስድራቤቱን ጥራይ ዝግበር ህያብ ከምዘይኮነ ተገንዚብኩሞ ከምእትህልዉ ኣይንጠራጠርን። ብዓቢኡ ከም ኤርትራውያን ንነብስና ኢና ንሕግዝ ዘለና። ዝኽሪ ጅግናን ምጥዋር ስድራቤቱን፣ ነቶም ካብ ሞያኡ ዝጥቀሙ ዝዓበየ ሕልናዊ ሩፍታ ኣብ ርእሲ ምሃቡ፣ ካልኦት ጀጋኑ ዘፍሪ ቅዱስ ተግባር ‘ውን እዩ። ኣብዚ ጽንኩር ዘበን ኤርትራ ኸኣ፣ ንህዝቢ ኤርትራ ብሓቂ ጀጋኑ የድልዩዎ ኣለዉ’ሞ፣  ኣብ ሓዲኡ ንርገጽ፣ ወይ ጀጋኑ ንኹን ወይ ጀጋኑ ንፍጠር። እንተሓመቕና ኸኣ ጀጋኑ ነተባብዕ።

ኣሰና !

7 ጥሪ 2014