ወልፊ ስልጣን

በዓል ቈጽሊ፡ በዓል ሓይሊ፡ በዓል ጽልዋ ምዃን ደስ ይብል። ብዘይ ዓቃሪቦ ግን ኣይኮነን። ስልጣን ንመዓልታዊ ህይወት በዓል ስልጣንን ንንቡር ዝምድናታቱ ኣብ ስነሓባራዊ ናብራን ይቕይሮ።

ርግጽ፡ ስልጣን ኣብ በዓል ስልጣን ኣዎንታዊ ጽልዋታት ይፈጥር እዩ። ነፍሰ ንቕሓትን እምነትን ክብ የብል። ነቲ በዓል ስልጣን ብመጠነ ስትራተጂን ረቂቕን ኪሓስብ ይገብር። ተመሳጥነቱ የላዕል። እዚኣቶማት ሓፈሻዊ ጽቡቕ ወኒን ጽርሃ ዕዉትን ይፈጥሩሉ። ስልጣነኣልቦነት ከኣ ብሓፈሹ ኣሉታዊ ወኒታት ይፈጥር።

ስልጣን ጥዑም እዩ ምኽንያቱ ነቲ ድራግን ስጋዊ ርክብን ጻማና ንምኽፋል  ዝጥቀምሉ መትናዊ ሰኪዐት እዩ ንሱ’ውን ዝጥቀም ይብል ዶክቶር ሮበርትሶን። ዶክቶር ስነፍልጠት መትንታትን ስነኣእምሮን እዩ። ስልጣን ጸረ ነፍሰጽቕጠት መድሃኒታዊ ብቕዓታት ከምዘሎዎ’ውን ተረጋጊጹ እዩ። ንተስተስትሮን የኻዕብት። እምበኣር ስልጣን ከም ዝኾነ ሰራሕ-ውልፊ መድሃኒት/መርዚ እዩ። ወኒ ጥራሕ ዘይኮነስ ተመሳጥነትን ድፍረትን ሓዲስ ምህዞታትን ፈተነታትን ይቕስቅስ። ነቲ ድኹማትን ዕቡሳትን ዘይደፍርዎ የድፍር። “ስልጣን ትጉህ፡ ጎራሕ፡ ልዑል ተተምናዪ/ስሱዕ፡ ጸዓሪ/ዓመጸይና፡ ጽዑቕ ሸቶኣዊ ይገብር”።(ሮበርትሶን)።  ክሳብ እውን ስልጣን በቲ መንጽር ጾታ ብሁግ ይገብር። (power makes sexy!) ስልጣን በቲ ንሱ ኣብ ኣእምሮ ዝኸፍቶም መዓጹ ስልጣን ንጠባይ ይቕይር። እቲ ዝዓበየ ስልጣን ዝምገቦ ዝዓበየ ስልጣን እንዳደለበ እቲ ዕንክሊል ስልጣን ይቕጽል። ስለዚ ከኣ እቲ ዘይተኣደነ ስልጣን ክራገጽ ጅምር። ስልጣን እንተዘይተጠቒምካሉ ኣይስልጣንን። ስለ’ዚ ከኣ’ዩ ዝበዝሐ ስልጣን ዝበዝሐ የበላሹ ዝበሃል። ሱልጣን ሳሊም ናይ ትርኵ፡ ብጸጋም እንተተንሲኡ፡ ናብ ደስ ዝበሎ ሸነኽ ኢስጣንቡል፡ ብዘይካ ዝኾነ ምኽንያት መድፍዕ ይትኵስ። ኣብ ግጉይ ቦታ ኣብ ጉጉይ ሰዓት ዝጸንሑ ከኣ ይቕተሉ። ስለምንታይ ዝኾነ ዘይበደሉ ይድብድብ ተሓቲቱ ‘ክገብሮ ስለዝኽእል’ ኢሉ መሊሱ። ጽጡሕ ስኽራነ ስልጣን። ንቡራት፡ ጥዑያት ሰባት ኣብ ልዕሊ ካልኦት ምሉእ ስልጣን ኣብ ዝተዋህቦም ጊዜ ናብ ኣራዊት ክቕየሩ ኣብ ብዙሕ ፈተነታት ተረጋጊጹ እዩ።

ስልጣን ናብ ርእሲ እንተኣትዩ፡ በዐዓል ስልጣን ከኣ ከም ዊንታኡ ክገብር እንተ ጀሚሩ ነቲ ሰብ እንታይ ክብለኒ ዝብል ገደብ በብቁሩብ ይጥሕሶ። እንተድኣ ዝኾነ ተቓውሞ ዘይተራእዩ ከኣ እቲ በዓል ሓይሊ እንዳደፈረ ይኸይድ። ክሳብ እቲ ምጥሓስ ንቡር ዝመስሎ ከኣ ዶባት ይጥሕስ። እቶም ተኣዘዝቲ ከኣ ነቲ ምእዙዛት ምዃን ክሳብ ንቡር ዝኾኖም እንዳለመድዎ ይኸዱ። ኣብ’ዛ ህሞት’ዚኣ ከኣ እቲ ዲክታቶር ይውለድ። ንንቡርነት፡ ንሕርመታት፡ ንልጓማት ምጥሓስ ንበዓል ሓይሊ ምስክርነት ናይ ሓይሉ እዮም። ክሩሸቭ ብሳእኒ መካነ መደረ ሕቡራት መንግስታት ይትምትም። ሳዳም ሑሴን ኣብ ኣኼባ ሚኒስተራት ንዘይተሰማምዕዎ ይቕንጽል። በለስኮኒ ዘይጠሓሶ ሕጊ ኣምላኽን ሰብን የሎን። ኢሳያስ ደስ ንዘይበሉዎ ደቂ ሃገር ኣብ ሃገሮም ንኽቕበረኩ ይእግድ መረጋገጺ ርእሰ ዓንተርነትም እዩ። ከም’ዚ ኢሉ ከኣ ስልጣን ንምዕረ ሚዛንነት ሓንጎል ይዝርግ።

እቲ ቀንዲ ሓደገኛነት ስልጣን ናብ ዓመጻ ክቕየር እንከሎ እዩ። ተቛወምትን ተወዳደርትን ምቕንጻል፡ ምእሳር፡ ቁጣባዊ ምፍራስ፡ ጎረባብቲ ምውራር  ወዘተ። ዓማጺ ሓይሊ ኣብ ትሕቲኡ ንስለኡን ንስለነፍሶምን ዝዕምጹ ንኣሽቲ ዲክታቶራት ይሰርሕ እዩ። እቶም ብዘይካ ማሕበራዊ ቦታ (ንኣብነት ሽመት፡ ትምህርቲ … ) ሓይሊ ዝተዋህቦም  ደቀቕቲ ሰበሰልጣናት ከኣ እቶም ዝኸፍኡ መሰቀቕቲ ይኾኑ።

ገንዘብ፡ ጾታዊ ርክብ፡ ከም’ኡውን ስልጣን ከም ዝኾነ መድሃኒት ሰራሕቲ ወልፊ እዮም። ድሕሪ ክንደይ  ስልጣን’ዩ ስልጣን ናብ ወልፊ ዝእየር ኣገዳሲ ሕቶ እዩ። መብዛሕትኦም ሰበስልጣናት ካብ ንእስነቶም ክእዝዙ ዝተለማመዱ እዮም። ኣብ ቤት መግቢ ኣትዮም እቲ መስተአንገዲ፡ ዕድሜኡ ብዘየገድስ፡ ብዘይካ በጃኻን ኣቱምን ድልዬቶም ይእዝዙ። ሽሕ’ኳ ኣብ ቤት መግቢ ኣትየ ነቲ መስተአንገዲ  ክእዝዞ ዝኸፍል ምዃነትይን፡ እቲ መስተአንገዲ’ውን ክእዘዚ ስርሑ ምዃኑን ዝፈልጥ እንተኾንኩ፡ እንዳተሰከፍኩ እዬ ዝእዝዝ። ስርሑ ስለዝገበረ ከኣ ልዕሊ መጠን አመስግኖ መረስረሲ ኣበራዊ ስምዒተይ እመስለኒ። ንክእዝዝ ኣይተፈጠርኩን ወይ ከኣ ገና  ወልፊ ኣይሓዘንን። ስልጣን ናብ ወልፊ ንኽቕየር ዝገብር እቲ ስልጣን ዘምረቶ ብዝሒ ዶፓሚን  ዝተባህለ ቅመም እዩ። እዚ ቀመም’ዚ ከኣ’ዩ ኣብ’ቲ ማእከለ ደስታ ሓንጎልና ፍስሓ ዝፈጥር። እቲ ዝነውሐ ኣብ ስልጣን ዝጸንሐ ከኣ ዝበዝሐ ዶፓሚን የድልዮ። ስለ’ዚ ከኣ ስልጣኑ የንውሕን ኣብ ዓመጻታቱ ጠገለ ይስእን። ስለዚ ከኣ’ዩ ንነዊሕ እዋን ኣብ ስልጣን ዝጸንሑ ውልቀመለኽቲ ንነፍሶም ካብ ስልጣን ከልግሱን ብኻልእ ስልጣን ክትክኡን ብርቱዕ ዝኸውን። ካስትሮ፡ ኢሳያስ፡ ሆሰ ኤድዋርዶ ዶስ ሳንቶስ፡ ሮበርት ሙጋበ፡ ፑቲን ቅሉዓት ኣብነታት እዮም።

ኢሳያስ ሓደ ደንቈሮ፡ ስምዒትኣልቦ፡ ገባቲ፡ ቀናእ፡ ቀንጻሊ ዲክታቶር ስለዝኾነ ኵላትና ንጸልኦ ኢና። እንተኾነ ኢሳያስ ንበይኑ ነፍሱ ኣይሰርሐን። ንሕና እውን ኢና ሰሪሕናዮ ኢና። ኢሳያስ ንኽኸውን ኣኽኢልናዮ። ምስኪን ኢሳያስ ኣሪገ፡ ደኺመ፡ ኣብ ሓንቲ እግረይ ጠጠው ኢለ ንድንክል ድፍእ ጥራሕ ተሪፋትኒ እንከላስ እንታይ ኴይኖም እዮም ዘየልግሱኒ! ምሉእ ህይወተይ ክገዝኦም’ስ ንዓይ’ከ ኣይሓልዩለይን ድዮም! ኣነ’ስ በዓል ወልፊ ኴይነ ንሳቶም’ከ ስለምንታይ ዘይሓልዩለይ! ኢሉ ከምዝጭነቕ እስምዓኒ። ኣሕዋተይ፣ እቲ ንኢሳያስ ዝጸልእ ንነፍሱ’ውን ክጸልኣ፡ እቲ ንኢሳያስ ዝጻረፍ ከኣ ንነፍሱ’ውን ክጸርፋ ፍትሓዊ እመስለኒ።  ንዝሰረተ ዲክታቶርነት ምልጋስ ቀሊል ስራሕ ኣይኮነን። እቲ ዝበለጸ ሜላ ንዲክታቶርነት ምልጋስ ብጥርሱ፡ ኣብ ቍልዕነቱ ካብ ስሩ ምብንቋሱ እዩ። ተመሊሱ ከይጥጥዕ ከኣ ለይትን መዓልትን ምሕላዉ።

ዳንኤል ሰመረ ተስፋይ

20.05.2014

ጀርመን/ ባድ ቪልዱንገን