ብወልደየሱስ ዓንደማርያም

ክንድዚ ክኸውን ጻልጣ ሓሶት ከ ኣሎ ድዩ!!! ኢሳያስ፡ ነታ ነፍስኻ ኸ ቅሩብ ኣይትሓስበላን ዶ? ምስ ዓርከይ ነቲ ጉሓፍ ዝኾነ ፖለቲካዊ ታሪኽ ኢሳያስ ኮሊልና ምውዳእ ምስ ኣበየና፡ ረብሪብና ንቕሩብ ግዜ ዝን በልና። ነገሩ ንምድምዳም፡ “እዚ ኹሉ ሽግራትና ግና፡ ካብ እንታይ እዩ ነቒሉ ትብል?” ኢለ ምስ ሓተትክዎ፡ “ካብ ሓሶት!! ካብቲ ማእለያ ዘይብሉ ተደጋጋሚ ሓሶት ኢሳያስ እዩ። ሕጂ እውን ወራር ሓሶት ደው ክብል ኣይኮነን። ኢሳያስ ግና ኣሎ ዝብሃል ሓሶት ዓለም ጸንቂቑ ወዲእዎ፡ ዝተዛረበ እንተ ተዛረበ ዝኣምኖ የብሉን። ስለዚ ዘረባ ገዲፍዎ እዩ። ስለዝኾነ ከኣ፡ ኣብዚ ግዜ እዚ ጥርሑ ወጺኡ፡ እቲ ዝሓልሞን ዝሓስቦን ዝነበረ ኩሉ ብግህዶን ብግብርን እዩ ዘርእየና ዘሎ። ደምሒት ኣብ ውሽጢ ሃገርና ብብረትን ጥይትን መጺኦምና ኣለዉ። ኣብ ወጻኢ ሃገራት ከኣ ብመስቀልን ዳዊትን ክመጹና፡ ክብገሱ ይሸባሸቡ ኣለው ሰሚዕና። ሕጂ ድማ ጋንታ ኩዕሶ እግሪ ደምሒት፡ ካብዝን ካብትን ተዳቓቒላ ንኤርትራ ወኪላ ምስ ካልኦት ሃገራት ኩዕሶ እግሪ ክትገጥም ትቀራረብ ኣላ።” በለኒ።

ሓሶት፡ ሓሶት ተወዲእዋ ትብሎ ምስ ጠፍኣ፡ ነታ ሓቂ ከይተፈለጣ በሎኽ ኣቢላ ተውጽኣ እያ። ሓሶት ፈትያ ዘይኮነትስ፡ እታ ሓቂ ሓያል ስለዝኾነት ነታ ሓሶት ኢዳ ጠውያ፡ “ሕጂ-ሕጂ!! ኣብዚኣ ደው ኢልኪ!! ሓቂ ተዛረቢ፡” ትብላ ማለት እዩ። ንኣብነት ኣብ ቤት ፍርዲ ሄግ ንኢሳይስ ከምኡ እዩ ኣጋጢምዎ። ውግእ ባድመ ባዕሉ ከም ዝጀመሮ ኣሉ ክብሎ ዘይክእል ጭብጥታት ቀሪብሉ ፈርም ምስ ተባህለ፡ ተቐርቂሩ መውጽኢ ስለዝሰኣነ፡ “እወ!! ኣነ እየ ጀሚረዮ፡” ብማለት ብዓሰርተ ኣጻብዕቱ እዩ ዝፈረመ። ጀማሪ ዕንወትን ህልቀትን ምዃኑ ኣሚኑ ከም ዝፈረመ ግና፡ ንህዝቢ ኤርትራ ኣይነገረን። ብኣንጻሩ ወያነ ዝጀመረቶ ኩናት እንዳበለ ንህዝብና ክሕስወሉን ከታልሎን ቐጸለ።

ሓደ ሓደ ግዜ ዘገደዶ ዘይብሉ ክነሱ፡ እቲ ሓቂ ተዛሪቡ ዘይፈልጥ፡ ሓሶት ዝኣርማኡን ዝሃይማኖቱን ኢሳያስ፡ ኩሉ ተወዲእዎ፡ ነታ ኣብ ውሽጢ ልቡ ዘላ ሓቂ፡ ባዕሉ ቶግ ከብላ ይስማዕ እዩ። ንኣብነት፡ “ምርጫ መዓስ ኢኻ ተካይድ?” ተባሂሉ ምስ ተሓተተ፡ ምናልባት ድሕሪ 40 50 ዓመታት ዝበሎ፡ ንሱ ኸሎ ምርጫ ከምዘይህሉ፡ ከምኡ እውን እቲ መንግስቲ ዝብሎ፡ ክሳብ ንሱ ዝወድቕ ግዜያዊ መንግስቲ ተባሂሉ ክጽዋዕ ከም ዝኾነ ምንጋሩ እዩ። ሓቂ ድማ እዩ። እዚ ኹሉ ብእኡን ብዕሱባቱን “ኣየ ምዕባለ ዝግበር ዘሎ ኣብ ሃገርና!!” ዝብሃል ዝነበረ፡ ሎሚ ዘመን ኣብዚ ዕስራ ዓመታት ዋላ ሓንቲ ዝገበርናዮ ምዕበለ ከምዘየለ ነጊሩ። ሰኽራም ናይ ልቡ እዩ ዘዛርቦ ከም ዝብሃል፡ ምስ ሰኸረ እዛ ዓዲ ናብ ሶማል ክቕይራ እየ ዝብሎ ዝነበረ፡ ሕጂ ብግህዶ ይገብሮ ኣሎ። ነፍሲ-ወከፍና ተመሳስሊ ኣብነታት ከነቕርብ ንኽእል ኢና።

እንተኾነ ግና፡ ኢሳያስ ነታ ሓቂ ከምዛ ዓመት እዚኣ ገይሩ ብግብሪ ኣየውጽኣን። ህልቀት ላምፓዱዛ መቐይሮ ቃልስና ከም ዝኾነ ባዕሉ ይነግረና ኣሎ። ኣብ ውሽጢ ሃገር ብደምሒት ተሓልዩ ኣብ ልዕሊ ሬሳታትና ክድብል ምስ ተራእየ፡ ኢሳያስ ውድቀቱ ጥራይ ዘይኮነስ ከመይ ጌርና ከም እነውድቖ ባዕሉ እዩ ዝነግረና ዘሎ። ማዕረ ማዕሪኡ ኣብ ከተማታት ኤርትራ ብተቓወምቲ ዝብሃሉ ትግራዎት ዝቐነየ ግፋ ዜጋታትና፡ ኣርማ ኢሳያስን መልእኽቱን ብግህዶ ኣብ ዕጥቆም ተጠቓቒዑ ዝረኣየ ህዝቢ፡ “ወያነ ትገፍፍ ኣላ!! ወያነ ትገፍፍ ኣላ!!” ከብሎ ቀንዩ እዩ። ሕጂ ድማ እቶ-እቶ ኣተኣታትዩ ብደምሒት ከም ዝሕሎ ገይሩ ኣሎ። እዚ ኹሉ ዘርእየና፡ ካብ ቀድሙ ቃልሲ ኢሳያስ ንኤርትራ ይኹን ንህዝቢ ኤርትራ ከምዘይኮነ ተጋሂዱ፡ ኣብ መጨረሽታኡ ዝገበሩ ይግበሩ ኢሉ ነታ ሓቂ ባዕሉ ፈኒይዋ ኣሎ። ብሓጺሩ  ኢሳያስ ብዓንተውኡ ናትና ዘይኮነስ ናይ ካልእ ከም ዝነበረን ዝኾነን ኣግሂዱ ብጭብጢ ይነግረና ኣሎ።

ከምቲ ዓርከይ ዝበሎ ግና ኢሳያስ ሓሶት ክስእን ንሓሶት ክገድፋ ዝብል እምነት የብለይን። ምኽንያቱ ኢሳያስ ኣርማ ሓሶትን ክሕደትን እዩ። ብዘይ ሓሶት ከመይ ኢሉ ክኾነሉ? ኣፈጣጥርኡ እውን እንተኾነ፡ ኣብ ሞንጎ ዝተፈላለዩ ሰብኡት ብዝተገብረ ምሽኽኻዕን ምትሕስሳዉን ጭርጭር-ዓበደን ተዳናጊሩ ከም እተኻወሰን እተኸሸነን እዩ ዝንገረሉ። ስለዚ ንሱን ክውንነቱን ንገዛእርእሱን ስጋ ዝለበሰ ሓሶት እዩ። ፍጥረትን ምንጪን ሓሶት ስለዝኾነ ከኣ ሓሶት ክውድኦ ኣይክእልን። እታ ሓሶቱ ኣብ ዘይትኣትዋ ሰፈር የብላን[W1] ። ንዝቐረበቶን ንዝተንከፈቶን ዘበለ ኹሉ ድማ ተሐሱን ተማራስሕን። ስለዝኾነ ከኣ፡ ንሃገርና ኣብ ዘመን ሓሶትን ምጥልላምን ምክሕሓድን ደቕዲቕዋ ይርከብ።

ኣመል ምስ መግነዝ ከም ዝብልዎ፡ ኢሳያስ ለንቅነ ድማ  ናብቲ ሓሶቱ ተመሊሹ በታ ቲቪኡ፡ ኤርትራ ንሃገራት ዓለም ኣብነት ምዕባለ ኮይና ዘላ ሃገር እያ ክብለና ቐንዩ። ኣብቲ ስነ-ፍልጠታዊ መዐቀኒታት ምዕባለ ሃገራት ዓለም ተወኪስና ኤርትራ እተምጽኦ ነጥብታት እንተድኣ ክንምልከት ኮይና፡ ክንደይ ዜሮታት እሞ ኢና ክንጽብጽብ። ይትረፈና እብለኩም። ሓሶት ኢሳያስ ንሳይንስን ስነ-ፍልጠትን ንሃይማኖትን እምነትን ግጉይ እዩ እንዳበለ ከሓድዎ ብማለት ከእምን ዝመጣጠር ባህርያት እዩ። ነቲ ክቕየርን ክልወጥን ዘይክኣል ኣሃዝን ቁጽርን ርግጽነቱን፡ ኣሉ ይብሎ። ካብቲ ዘገርም ከኣ፡ ነቲ ዓለም ብዓለሙ ዝጥቀመሉ መዐቀኒታት ምዕባለ ሃገራት፡ “ግጉይ እዩ ከምኡ ጌርካ ኣይኮነን ምዕባለ ሃገራት ዝዕቀን” እንዳበለ፡ ነቲ ዓዋን ሓሳባቱ ንመወዳእታ ዘይብሉ ሰዓታት ሃለፍ ከብሎ እንከሎ፡ በታ ዓቕሙስ ኣብቲ ባዕሉ ክፈጥራ ዝፍትን ናይ ጽውጽዋይን ዓበድበድን ዓለም ከንብረና ምፍታኑ እዩ። ኣብቲ ንጸላም ብርሃን እዩ ዝብል፡ ንጥሜት ርእስኻ ምኽኣል፡ ንድንቁርና ፍልጠት፡ ንጭቆና ፍትሒ፡ ንውግእ ሰላም፡ ብሓጺሩ ንሰለስተ ሓሙሽተ፡ ንሓሶት ሓቂ፡ ንሕማቕ ጽቡቕ እንዳበልካ ንበር ዝብል ጸልማትን ሰሃሮን ዘፍትወሉ ምሽሙሽ ሕልናኡ፡ ንበሩ ማለቱ እዩ። የግዳስ፡ ነቲ ሳይንሳዊ መዐቀኒታት ካብ ዘይኣምነ፡ እቲ ዓወት ንሓፋሽ እንዳበለ ዝኣተወ ሓሳዊ፡ እስከ ነቲ ህዝቢ ኤርትራ ዘምጽኣሉ ምዕባለ፡ ባዕሉ እቲ ሓፋሽ ይዛረበሉ ጥራይ እየ ክብሎ ዝደሊ። ሓሶት!! ሓሶት!! ሓሶት!! ሽሕን እልፍን ሓሶት። ሓሶት ኢሳያስ ነቲ ምድራዊ ሂወትና ጥራይ ኣይኮነን ጎዲኡ። ነቲ መንፈሳዊ ሂወትና ከመራስሖን ከመሽመሾን እውን እንታይ ዘይፈተነ።

ኩላትና ኣብዛ ግዜያዊት ዓለም እዚኣ ነበርቲ ሰለዘይኮንና፡ ነቲ ኣብ ምድራዊ ዓለም ኣነካይዶ ቃልሲስ ዝደለ ምኾነ እስከ ንበሎ። እንተኾነ ግና፡ ካብቲ ንዝመጽእ ዓለም ዝቃለስ መንፈሳዊ ኸ፡ ተደጋጋሚ ሓሶት ክስማዕ እንከሎ፡ እንታይ ንበሎ? ሕማም ኢሳያስ ሓሊፍዎ!! ክንዲ ኣድሪ ትኹን ሓሶት ዘየፍቅድን ዘይጻወርን ቤት-መቕደሳት፡ ንሓሶት ተቐቢሉ ሓቂ ከምስላ እንከሎ ምጽኣት ዶ ኣይኮነን። ንምዃኑ ከምዚ ዝዓይነቱ ቤት-መቕደሳት ንዝሞተ ፍትሓት ክገብር ኣምላኽ ይሰምዖ ዶ ኾን ይኸውን? ካብ ዝብል ጥርጣረ ተበጊሰ ነዚ ትካል እዚ፡ ንግዳያት ላምፓዱዛ ስለምንታይ ፍትሓት ዘይገበረሎም ክንብል እንከሎና፡ ይገርመኒ። ኢሳያስ፡ “ሓሶት እንተደጋገምካያ ሓቂ እያ ትኸውን፡” ዝብል ምህሮ ዓለማውያን ንመንፈሳውያን ኣስኒቑ፡ “መስቀል ተሰኪምኩም ወራራ ሓሶት ኣካይዱ፡” ክብሎም ኸሎስ ስራሕ ዲያብሎስ ተዓጠቕሉ ማለት ዶ ኣይኮነን። ኣብ ትሕቲ ምቁጽጻረይ ዘይምእዘዛ ቤተ-ክርስትያናት ኣፈራርስወን ማለትሲ እንታይ ዓይነት መንፈሳዊ ስራሕ ይብሃል? እስከ ካብቲ ምድራዊ ሂወትናን ፖለቲካኡን ወጺእና ብዛዕባ እቲ ዝኾነ ዓለማዊ ክኣትዎ ዘይግብኦ መንፈሳዊ ሂወትና ንዛረብ። ምኽንያቱ ሓሶት ኢሳያስ ነዚ ሂወት እዚ እውን ዝገደፈሉ የብሉን።

ኣብ ሃገርና እቲ ናይ ብሓቅን ሕጋውን ፓትርያርክ ሃገርና ዝኾነ ኣቦና ኣቡን ኣንጠንዮስ ተኣሲሩ። እቶም ኣይፋልን ዝበሉ ተብዓት መንፈሳውያን ተሰዊሮም። እቲ ናይ ብሓሶት ይቕድስ ኣሎ። ጸልማት ዘመን!! ግዙት ኣይገዝትካ!! ግዙት ብምድራዊ ስልጣን ኣፋራሪሑ ክግዝት እንከሎ፡ ሓሶት ኣግሪ ተኺላ፡ “ፓትርያርክ!! ፓትርያርክ!! ኣይትበሉ፡ ኣነ እየ ፓትርያርኩም!!!” እንዳበለት፡ ኣብ ቤተ-ክርስትያን ደው ኢላ ክትሰብኽን ክትቅድስን እንከላ፡ እቲ ማእለያ ዘይብሉ ሓሶታት ኢሳያስ ዘምጽኦ ሳዕቤን እዩ። ነንዊሕ ዓምታት ዝተደጋገመ ሓሶት ስለዝኾነ ድማ፡ ኣብ ውሽጢ ሃገርን ወጻእን ከም ሓቂ ተወሲዱ ክሳብ ሕጂ ይስርሓሉ ኣሎ። ሓሶት ንህጻናትና ተጠምቕ ኣላ። እቲ ሓሶት ዝመንቀሊኡ ፈላላይ ፖለቲካ ኢሳያስ፡ ኣብቲ ቤት-መቕደሳት ኣትዩ በታኒ ስርሑ ሰሪሑ። ንኣብነት፡ ንሃይማኖት ተዋህዶ ኣብ ክልተ ካብ ዝገምዖ ዓመታት ሓሊፉ። ኮይኑ ድማ፡ ንኢሳያስን ሓሶቱን ተማእዚዘን መራሒና ንዘልኣለም ይንበረልና ኢለን ዝቕድሳ ቤተ-ክርስያናት ኣለዋ። ኣብ ቤተ-መቅደሳት ኢድካን እግርኻን ከይተእቱ፡ ሞባእናን ንብረትናን ኣይትስረቐና፡ ኣንታ ረሲእ ውጻእልና ዝብላ ኸኣ በቲ ካልእ ወገን ይርከብአን። ሓደ ሃይማኖት ክነሱ በቲ ሓሳዊ ፖለቲካ ኢሳያስ ተፈላልዩ ጸጸሎቱ የካይድ ኣሎ።

ሓሶት ኢሳያስን ዕንወቱን፡ መሬት ኤርትራ ብድሕረይ ሳዕሪ ኣይትብቆላ እንዳበለ ዝዝራእን ዝፋረን ዝነበረን ዘሎን ጸሊም ባርኖስ ምድሪ ምዃኑ፡ ካብ ነዊሕ ግዜ ዝተዘርበሉ ሓቂ እዩ። እዚ ነቲ ሕልናኡ ክሳብ ክንደይ ተንኮለኛን ግዕዘይን ከም ምዃኑ ዝገልጽ ድኣ እምበር፡ ክገብሮ ዝኽእል ኣይኮነን። ምኽንያቱ ኢሳያስ ካብ ዝመውት ክንደይ ዓመታት ሓሊፉስ፡ ንኽቕበር ማርተሎ ኣብ ርእሲ መስማር ዳ ደሺ፡ ክወድቀሉ ዝጽበ ዘሎ ሳንዱቕ እዩ ኾይኑ። እንተኾነ ግና፡ ኢሳያስ ብደዉ ዝሞተ እዩ እንዳተባህለ   ዝፈጥሮ ዘሎ ኩነታት ከልዓዕለና ኣይከኣለን። ህልቂት ላምፓዱዛ እውን ከምኡ ከንቀሳቕሰና ኣይከኣለን። ሓለዋን ጸጥታን ደምሒት እውን ከምኡ። ስለዝኾነ ከኣ፡ ኤርትራውያን ብምንታይ ድኣ እዮም ዝልዓሉ? ዝብል ሕቶ ንብምልኡ ዓለም ኣገሪሙ ዘሎ እዩ።

ሓሶት! ሓሶት! ሓሶት! መሬት ኤርትራ ብሓሶት ኢሳያስ ተጎቢኣ። ሓሶት ብጀምቢል ዝብሃል፡ እቲ ሓሶት ካብ ሕልና ኣልቦ ዝኾነ ረሳሕ ኣኣምሮ ዝፍልፍል ጎሓፍ ኮይኑ፡ ሕልናና ክርእዮን ክድህስሶን ይኽእል ከም ዝኾነ ንምምልካት እዩ። እቶም እንዳረኣናዮ እንኽሕዶ እውን ምስቶም ኣምባሰደራት ሓሶት ዝኾኑ እዩ ዝጽንብረና። ምኽንያቱ፡ ንሳቶም ነቲ ካቦ ሓሶት ሓንቲ ከይበሉ ይሰምዕዎ ኣለዉ። ንሕና ከኣ ንዕኦም ሓንቲ ከይበልና ካብ ሰማዕናዮም እንታይ ድኣ እዩ እቲ ፍልልይና? እዚ ዘሎናዮ ኣተሃላልዋ ብምግንዛብ፡ ኣይገበሮን ድኣ እምበር፡ ኣምላኽ ኤርትራ ኣብ መሬትና ሓሶት ከም ጉሓፍ ዝእከብ ቁሳቁስ ገይሩ እንተዝፈጥሮስ፡ ከመይ ጽቡቕ ነይሩ እብል። ኣብዛ እዋን እዚኣ ንኽንልዓል ምናልባት ንሳ እያ ተድልየና ዘላ። ምኽንያቱ ካልእ ከላዓዕለና ዝኽእል ዘይተፈተነ ነገር የልቦን።

እወ!! እዚ ኹሉ ዓመታት ኢሳያስን ጉጅልኡን ንህዝብና ዝሓሰዉዎ ሓሶታት ከም ጎሓፍ እንተዝእከብ፡ መሬት ኤርትራ መርገጺ ኣይምተረኽባን። ኤርትራ በድኒ እስካሪኮ ኾይና ዝስትንፈስ ኣየር ኣይምሃለወን። ኣብ ጎሓፍን ምስ ጉሓፍን ክንበር ስለዝይከኣል፡ ህዝቢ ኤርትራ ነቲ ዘይተርፈና፡ ክንትስእ ምተገደድና። ነዚ ስርዓት እዚ ከነልግሶ መታን ክንብገስ፡ ኢሳያስ ከርእየና እንጽበዮ ዘሎና ኣተሃላልዋ፡ መሬት ሃገርና ከምዚ ዓይነት ምስ እትኸውን ጥራይ እዩ ዝመስል ዘሎ። እንተኾነ ግና፡ እዚ ናተይ ዓቕለጽበታዊ ፍርዲ እዩ። ምኽንያቱ ህዝባዊ ማዕበል ክልዓል፡ ክንርእዮ ክንርድኦን ዘይንኽእል ናይ ገዛእ ርእሱ ወሽጣዊ ሕግታት ከምዘለዎ፡ ኣብቶም ኣብ ኣካባቢና ዝተኻየዱ ማዕበላት ሪኢናዮ ኢና። ህዝቢ ኤርትራ ድማ ክልዓል እዩ።

ልክዕ እዩ፡ ሓሶት ኢሳያስ ግና ዓቕሚ ድኣ ሲኢኑ እምበር፡ እንታይ ዘይሓልም። ፈጺሙ ንኤርትራዊ ዜጋ ክሓልፈሉ ዘይደሊ በታኒ ፍጥረት እዩ። ካብኡ ንላዕሊ ዝኸፍአ ከኣ፡ ኤርትራውያን ኣብዛ ዓለም እዚኣ ከምዚ ኢሉ ከይሓለፈልና ክንነብርን፡ ኣብቲ ዝመጽእ ዓለም ድማ ካብኡ ዝገደደ ክኸፍኣና ዝመጣጠር ጽሉል ትምኒት እዩ። ኢሳያስ ኣንጻር ሬሳ ዝቃለስ ሬሳ እዩ። ኣብ ሃገርና ዘይተነግረ እምበር ዘይተገብረ የለን ከም ዝብልዎ፡ መን ይፈልጥ ምናልባት ነተን ዝቆጻጸረንን ዝቕድሳሉን ቤተ-ክርስትያናት፡ “ኤርትራውያን ኣብቲ ላዕለዋይ ሰማይ ኣይሕለፈሎም ኢልክን ጸልያ፡” እንዳበለ የጓጥጠላን ይኸውን። ንሳተን እውን ተኣዚዘን ከለዋ ኣይነግራን ይኾና። ወይ ከኣ እቲ ስያሳኡ ስለዘለማመደን ብትሕቲ መልሓሰን ይብልኦ ይህልዋ። ንኣብነት ንህልቂት ላምፓዱሳ ፍትሓት ኣይገበረሎም ዝብል ትእዛዝ ዘመሓላለፎ፡ ካብዚ ጽሉል ትምኒት እዚ ዝተበገሰ እዩ ዝብል ግምት ኣሎኒ። እዚ ነጥቢ እዚ ዝተጋነነ ኣኳ ይኹን እምበር፡ ከምኡ ኢሉ ከም ዝሓስብ  ኣምላኽ ጥራይ እዩ ዝፈልጦ። ሓደ ሓደ ግዜ ኣነ ብወገነይ፡ “እቲ ጽርጊያ ዝረኣዮ ሃልይዎ እዩ ኣምበር መዓስ ኣልዒሉ ይዛረብ ኮይኑ።” ብማለት ነቲ ክፉእ ጥራይ ዘሕስቦ ዘሎ፡ ከምቲ ኣብ ጽርግያ ዝዝረብ ተራ ዘረባ ርእሱ ከይዳ እያ እብል። ነቲ ኣዕናዊ ስርሑን ተንኮላቱን ዘይርስዕ ርእሲ ግና እንታይ እየ ክብሎ?

ስለዚ ካብቲ ዝበልክዎ ሰጋእ ብምባል፡ ነቲ ብ25 ጥቅምቲ ኣብ ከተማ ሮማ ንዝኽሪ ግዳያት ላምፓዱዛ ብመራሕቲ ሃይማኖት ዝተዋህበ ሓያልን ከቢድን መንፈሳዊ ምኽርታትን መልእኽትን ብምዝካር፡ ኣብቲ ስግር ማዕዶ ዝርከብ ቅዱስ ሓሳባት የእትወኒ። “እዝጊኣብሄር ዝሕግዞ፡ ነቲ ንነብሱ ክሕግዝ ዝፍትን እዩ እሞ፡” ካብ ብረታዊ ቃልሲ ኣትሒዙ፡ “ኤርትራዊ ዜጋ መቕበሪኻ ጎዳጒድ ትፍሕር ኣሎኻ። ተስእ ንመሰልካን ክብረትካን ተንቀሳቐስ!!” ክብለና ምስማዕ ኣቢናዮ፡ ክቐጽዓና ኢሉ ንኢሳያስ ካብ ሰማይ ዝደርበየልና ሬሳ ዲያብሎስ እዩ ኢለ ከኣ ይድምድም። ከምዚ ብምግባሩ ቁጥዓ ኣምላኽ “ብደውኩም መትኩም ኣለኹም። ወይ ቀበርቲ ኹኑ ወይ ከኣ ምዉታት።” ዝብል ናይ መጨረሽታ መልእኽቲ እዩ ዝልእከልና ዘሎ። ስለዚ ከምኡ ካብ ኮነ እምበኣር፡ ከምዛ ዘሎናያ ሓንቲ ከይገበርና ላንጋ ላንጋ እንተድኣ ተሪፍና፡ ሬሳ ኢሳያስ ከሕምቐና እንተዘይኮይኑ ከነሕምቖ ኣይኮናን። ነዚ ኣመልኪቱ እቲ መንፈሳዊ፡ “ሎሚ እዝጊኣብሔር ምሳኻ ነገር ኣለዎ!!” እዩ ክብል ዝወዓለ ኣብ ከተማ ሮማ። “እዚ መርገም እዚ ናይቶም ብርሃን ከይረኣዩ ንዓሰርተታት ዓመታት ተኣሲሮም ዘለዉ ዜጋታት እዩ። እዝጊኣብሔር ነገር ኣለዎ!!” እወ! ሱቕታና፡ ስቅያታ ኣምጺኡልና። ሱቕታና፡ መርገም እሱራትን ሽጉራትን ግፉዓትን ኣስዒቡልና። በዚ ምኽንያት እዚ ከኣ እዩ ኢሳያስ ዋላ ብሬሳኡ ሓያል ድያብሎስ ምድሪ ኮይኑ ዘሎ።

እንተኾነ ግና እቲ ዓርከይ ዝበሎ እውን ሓቅነት ኣለዎ። ኣብዚ ግዜ እዚ ኢሳያስ ኩሉ ሓሶት ተወዲእዎ ዝብሎን ዝገብሮን ጠፊእዎ፡ ልክዕ ከም ዘኽታም ቆልዓ ቀባሕባሕ እዩ ዝብል ዘሎ። ምሉእ ህዝቢ ፈንፊንዎ ዓቕሉ ጸቢብዎ ምስ ሰኸረ ቅበሩኒ ክብል ይስማዕ። እንተኾነ ግና ኤርትራውያን ዜጋታት ብሰንኪ ሕድ-ሕድ ዘይምትእምማንና ፋሕ ጭንግራሕ ኣትዩና ብሓባር ተሰማሚዕና ኣብ ቀብሪ ኢሳያስ ክንውዕል ዓቕሚ ስኢና ኣሎና። እቲ መርድእ በጺሕና ክነሱ፡ ንቐብሩ ግዜ ክህልወናን ከነርክበሉን ኣይከኣልናን። እቲ መርገም እሱራት ይቕጽል እዩ ዘሎ። ኣምላኽ ከኣ ሬሳኹም ክትቀብሩ ካብ ዘይከኣልኩም፡ ሕድ-ሕድኩም ክሳብ እትተኣማመኑን እትሰማምዑን ኣብኡ ይበለልኩም፡ ተምሃሩ! ተቐጽዑ! ስሓንዎ! ይብለና ኣሎ።

እንዳተፋነና ኸሎና “እቲ መርገም እሱራት ይኹን እቲ ወራር ሓሶት ኣይከቋርጽን እዩ።” በለኒ  እቲ ዓርከይ። ቀጺሉ ኸኣ፡ “ቀዳማይ ወራር ፈሺልዎ፡ ህበይ ክሻ ተሰኪሙ፡ ክጸሮ ዘይክእል መስቀል ኣብ ኢዱ ዓቲሩ፡ ዳዊት ተኾልኲሉ፡ ባዕሉ ይኹን ብናይ ሓሶት ሓዋርያቱ ካልኣይ ወራር ክፍትን ኣብ ምዕራባዊ ዓለም ክመጽእ ይዳናደን ኣሎ። ኩሉ ተወዲእዎ፡ ኣብ ቀዳማይ ወራር ብኽራርን ከበሮን ኣምሪሑ፡ ሕጂ ድማ ብመስቀልን ዳዊትን ክፍትን። እዚ ዲያብሎስ!!” በለ ብቑጥዓ። “ሸይጣንሲ መስቀል ምስ ረኣየ እዩ ዝሃድም ዝነበረ። እዚ ዲያብሎስ እዚ፡ መስቀል ጸይሩ ከም ዘሎ ኣይተፈለጦን። ስለዚ እንተድኣ መጺኡ፡ ጭርሖታት ኣየድልየኩም፡ ዳውን!! ዳውን! ምባል ኣይዓብሰልኩም። ብኹሉ መኣዝናት ዘርኢ ኣርባዕተ ዓበይቲ መስትያታት ጥራይ ኣብ ቅድሚኡ ገትርሉ። መስቀል ጸይሩ ከም ዘሎ ምስ ተፈለጦ፡ ክሽኡን መስቀሉን ደርብዩ ክነፍጽ እዩ። ሕጅስ ድማ፡ “እዚ ቁጥሚ!! ሓሳዊ!! መስቀል ጸይሩ ክሕሱ።…” እንዳበለ ክኸይድ ምስ ተበገሰ፡ “ምናልባት ኣብዛ ናይ መጨረሽታ ሰዓት እዚኣ፡ ኩላ ተመን ዝነበረት ርግቢት እንተ ተቐየረት ከ፡ እንታይ ክትብል ኢኻ? ንዓሊ ዓብዱ ዘይትርኢ።” በልክዎ። “ማንኪስ ከምኡ ክኸውን እዩ ኢልካ ኣይትሕሰብ። ጥራይ መስትያት ቀርብ።” በለኒ።

ወልደየሱስ ዓንደማርያም

ሳን ፍራንሲስኮ በይ-ኤርያ

11.18.13