ቅድሚ 10 መዓልታት ኣቢሉ ብምድጺ ኣሰና ተቓሊሑ ከምዝነበረ፣ ነቲ መራሕቲ ተዋህዶ ኦርቶዶክስ ብህግደፍ ኣብ ወጻኢ ጎስጓስ ክገበሩ ዝተዋህቦም ትእዛዝ፣ ኣብ ግዜ ጾም ኣርብዓ ጸሎት ደኣ ንገበር እምበር ንወጻኢ ኣይንገይሽን ብምባል ቅሬታኦም ኣስሚዖም ኳ እንተነበሩ ብመሰረት ‘ቲ ብቤትጽሕፈት ህግደፍ ተዋህቦም ተሪር ትእዛዝ ብ 19 ለካቲት ፍራንክፈርት ኣትዮም ከምዘለዉ ምንጭታት ካብ ኤርትራ ሓቢሮም።

ቀንዲ ዕላማ ናይቲ ክልተ ጳጳሳትን ክልተ ተሓጋገዝትን ዝርከቡዎ ልኡኽ፣ እቶም ብምልካዊ ስርዓት ኢሳይያስ ኣብ ናይ ገዛ ምሕዩር ዝርከቡ ፓትርያርክ ተዋህዶ ቤተክርስትያን ኣቡነ እንጠንዮስ ነጻ ክልቀቑ ብቀጻሊ ንዝስማዕ ዘሎ ጠለብን ጎስጓስን ንምድኻም፣ ከምኡ ‘ውን ነቲ ብሰንኪ ‘ዚ ኣብ መንጎ መራሕቲ ሃይማኖት ነንሕድሕዶምን ኣመንትን ተኸሲቱ ዘሎ ምክፍፋል ኣደቂስካ ኣብያተ ክርስትያናት ምእዙዛት ናይቲ መላኺ ስርዓት ከምዝኾና ንምግባር እዩ።

ይኹን እምበር እቲ ብሰንኪ ኢድ ምትእትታው ምልካዊ ስርዓት ኢሳይያስ ኣብ ጉዳይ ኦርቶዶክስ ተዋህዶ ኣብ መንጎ መራሕቲ ሃይማኖት ነንሕድሕዶምን ኣመንትን ኣትዩ ዘሎ ሕንፍሽፍሽ ኣዝዩ ዝተሓላለኸ ብምዃኑ እቲ ስርዓት ኣንቂዱዎ ዘሎ መደብ ክዕወት ከምዘይክእል እቶም ምንጭታት የረድኡ።

ካልእ ተወሳኺ ዛዕባ ናይቶም ልኡኻት ፋይናንሳዊ ጉዳይ ምዃኑ ‘ውን ተፈሊጡ ‘ሎ።

ኣብ ውሽጥን ወጻእን ብሞባእን ህያብን  ዝወሃብ አንዘብ ኣብ ክንዲ ኣብ ኣገልግሎት እተን ኣብያተ ክርስትያን ናብቲ ስርዓት ኣታዊ ይኸውን ብምህላዉ እተን ኣብያተ ክርስትያናት ብዋሕዲ ባጀት ይሳቐያ ኣብ ዘለዋሉ እዋን እዮም ሰበስልጣን ህግደፍ ነቶም መራሕቲ ሃይማኖት ንመገሻ ኣገዲዶሞም ዘለዉ።

እቲ ዑደት ብድሕሪ መጋረጃ ዝካየድ ኳ እንተኾነ፣ ኣብ መወዳእታ ምስ ኣመንቲ ምርኻቦም ከምዘይተርፍ እቲ ሓበሬታ ይእምት።