ኣብ ቀዳማይ ሰሙን ናይዛ ሓዳስ ዓመት 2017 ክልተ ኤርትራውያን ዲፕሎማሰኛታት ንምልካዊ ስርዓት ኢሳይያስ ራሕሪሖም ኣብ ሕቡራት መንግስታት ኣመሪካ ዑቕባ ከም ዝሓተቱ ምንጭታት ኣሰና ሓቢሮም።

እቲ ቀዳማይ ኣብ ኤምባሲ ኤርትራ ኣብ ጅቡቲ፣ charge d’affairs ዝነበረ ኣቶ ዑመር ሰርማዕ ክኸውን ከሎ፣ ዝሓለፈ ሰሉስ እዩ ኣብ ኣመሪካ ዑቕባ ሓቲቱ።

ንሱ፣ ኣብ መንጎ ኤርትራን ጅቡትን ኣብ 2008 ዓመተ ምህረት ኣብ ዶባት ወተሃደራዊ ግጭት ኣብ ዘጋጠመሉ፣ ኣምባሳደር ስርዓት ህግደፍ ኣብ ጅቡቲ ዝነበረ ኣቶ መሓመድ ስዒድ ማንታይ ብመንግስቲ ጅቡቲ persona none grata ተባሂሉ ድሕሪ ምስጓጉ ኣብታ ሃገር ዝጸንሐ እንኮ ወኪል ስርዓት ህግደፍ እዩ።

እቲ ካልኣይ ንስርዓት ህግደፍ ራሕሪሑ ኣብ ኣመሪካ ዑቕባ ዝሓተተ ወኪል፣ ኣቶ ኣሎ ኣስገዶም፣ ኣብ ኣዲስ ኣበባ ኤምባሲ ኢርትራ ኣብ ሕብረት ኣፍሪቃ ብዓል መዚ ቁጠባዊ ምትሕግጋዝ ክምኡ ‘ውን ሓላፊ ፋይናንስን ምምሕዳርን ዝነበረ ኮይኑ ኣብ ዝሓለፈ ሰሙን እዩ ብዱባይ ኣቢሉ ናብ  ኣመሪካ ኣትዩ።

ክልቲኦም ዲፕሎማሰኛታት ብዘይ ዝኾነ መግለጺ ናብ ኣስመራ ተጸዊዖም ከምዝነበሩ እቶም ምንጭታት ሓቢሮም።

ብመሰረት ‘ቲ ሓበሬታ፣ ኣቶ ዑመር ነቲ ስርዓት ድሕሪ ምግዳፉ ኣብ ጅቡቲ ተሪፎም ዘለዉ ሰራሕተኛታት ኤምባሲ ኣውቲስታን ዋርድያን ብምዃኖም፣ ኣብዚ እዋን ‘ዚ ኤምባሲ ስርዓት ህግደፍ ኣብ ጅቡቲ ዳርጋ ተዓጽዩ ክብሃል ይከኣል። ኤምባሲ ኤርትራ ኣብ ሕብረት ኣፍሪቃ ‘ውን፣ ኣብ ውሽጢ ክልተ ዓመታት ክልተ ዲፕሎማት ከሲሩ፣ ነቲ ቀንዲ ኣምባሳደርን ዋና መጋበርያ ናይቲ ስርዓት ኮይኑ ብኣባላት ሚኒስትሪ ጉዳያት ወጻኢ ኤርትራ ከይተረፈ ብዓይኒ ጥርጠራ ዝርአን ዝንጸልን ቀዳማይ ጸሓፊ ቢንያም በርሀን ጥራይ ሒዙ ተሪፉ ‘ሎ።