ፕረሲደንት ኢሳይያስ ኣፈወርቂ፡ ነቲ `ኣካይዳና ገምጋም የድልዮ ኣሎ፡ ምትእትታው ህግደፍ ኣብ ዕማማት ሚንስትሪታት ገደብ ይገበረሉ፡ ንብረት ህዝብን ሃገርን ብፍላይ ኣታዊታት ወርቂ ዕደና ቢሻ ወግዓዊ ጸብጻብ ክግበረሉ ኣለዎ` ብምባል ኣብ ኣኼባ ካቢነ ሚኒስተራት ኣትሪሩ ተቓውሞኡ ብምግላጽ፡ ኣብ ትሕቲ ውልቀምልካዊ ምሕደራኡ ምምብርካኽ ዝኣበየ ፡ ሚኒስተር ፋይናንስ ነበር ብርሃነ ኣብረሀ፡ ከምቲ ቅድሚ ሕጂ ኣብ ልዕሊ ብዙሓት ንጹሃት ኤርትራውያን ዝፈጸሞ፡ ብሰላሕታ ክቕንጽሎ መደብ ኣውጽኡ ይጸናተዎ ኣሎ።

እቲ ቅድሚ ሒደት ኣዋርሕ ንበዓልቲ ቤቱ ገዲም ተጋዳሊት ኣልማዝ ሃብተማርያም፡ ብዘይ ምኽንያትን መርትዖን ኣብ ቤትማእሰርቲ ብምድጓን ንሚኒስተር ነበር ብርሃነ ኣብርሀ ኣጸምዩ ናይ ውዲት ውጥኑ ከጠዓዕም ዝጀመረ ኢሳይያስ፡ ምስ ሓካይሙ ከይራኸብ፡ ካብ ወጻኢ መድሃኒት ከይረክብ ብምእጋድ ነቲ እኩይ ውዲቱ ይቕጽሎ `ሎ።

በዚ ድማ እቲ ምእንቲ ሃገርን ህዝብን ጽኑዕ መትከላዊ ተቓውሞ ስለዘርኣየ ካብ ስልጣኑ ብፕረዚደንት ዝተኣለየ ሚኒስተር ነበር ብርሃነ ኣብርሃ፡ ህይወቱ ኣብ ሓደጋ ኣትዩ ኣብ ከቢድ ብድሆ ይርከብ ኣሎ።

ኣብዚ ንሚኒስተር ፋይንናስ ነበር ብርሃነ ኣብርሀ ንምጥፋእ ተታሒዙ ዘሎ መደብ መጋበርያ ኢሳይያስ ኮይኖም ዝተሓባበሩ ዘለዉ፡ ብሪጋደር ጀነራል ስምኦን ገብረድንግልን ብሪጋደር ጀነራል ሃይለ ምሕጹንን እዮም። ምዕባለታት ናይዚ ኩነታት ብቐረባ እናተኸታተልና ተወሳኺ ሓበሬታ ከነቕርበልኩም ኢና።

እዚ ንሚኒስተር ፋይናንስ ነበር ብርሃነ ኣብረሀ ገጢሙዎ ዘሎ ብድሆ፥ መቐጸልታ ንኻልኦት ጽኑዓት ገዳይም ተጋደልቲ ንምጥፋእ ዉልቀ መላኺ ዝተጠቕመሉ ሜላ ሙዃኑ ይፍለጥ።

ንቢትወደድ ኣብርሃን ካልኦት ገዳይም ተጋደልቲ ህዝባዊ ግንባርን፡ ሃገር ከዲዖም ዝብል ናይ ሓሶት ጠቐነ ወሲኹ፥ በብሓደ ከምዘሕቀቖምን የሕቅቖም ከምዘሎን ዝፍለጥ እዩ።

እዚ ተጻዋርነት ዘይብሉ ምልካዊስ ስርዓት ፡ ብዘይካ`ዚኣቶም `ሃገር ኣንፈታ ስሒታ ኣላ` ኢሎም ቅሬታኦምን ንዘስምዑን ዝተቓወሙን ብዙሓት ኣስማቶም ዘይተወርየ ንጹሃት ተጋደልትን መንእሰያትን ኣብ ዉሽጢ ሃገር የሕቂቑዎም ከምዘሎ `ውን ይፍለጥ።

ሚኒስተር ፋይናንስ ነበር ብርሃነ ኣብረሀ  ኣብ መጀመርያ ሰብዓታት ኣብ ኣሜሪካ፥ ኢልኖይ: ብኢኮኖሚክስን ኢንጂነሪንን ብማስተርስ ማዕርግ ድሕሪ ምምራቕ፥ ናብ ገድሊ ተጸንቢሩ፥ ኣብ ዝተፈላለዩ ህዝባዊ ጉዳያት ከም ተጋዳላይን ሓላፍን ዘገልግለ፡ ብምቕሉል ባህርያቱን፡ ተሪር መርገጺኡን፡ ፍቕሪ ህዝቡን ሃገራዊ ስምዒቱን ዝፍለጥ ኣቦ ኣርባዕተ ቆልዑ እዩ።

Subscribe ASSENNA YouTube to get Radio Assenna shows on time: