ካብ ስዊዘርላንድ ዝለሓኹ ሰነዳት HSBC  ባንክ ከምዘመልክቱዎ፣ ኤርትራ፣ ዝበዝሐ መጠን ዶላር ካብ ዘለወን ሃገራት ተባሂላ ኣብ መበል 53 ተሰሪዓ። ኣብቲ ሰነድ ብስም ኤርትራውያን ዓማዊል ተመዝጊቡ ዝጸንሐ ገንዘብ ድምር ኣስታት $699.6 ሚልዮን ዶላር እዩ።

እቲ ሰነድ 39 ናይ ባንክ ሕሳብ ዘለዎም 32 ኤርትራውያን ዓማዊል ከምዘለዉ ክጠቅስ ከሎ፣ እቲ ዝበዝሐ ምስ ሓደ ኤርትራዊ ዓሚል ተተሓሒዙ ተመዝጊቡ ዘሎ መጠን ገንዘብ $695.2 ሚልዮን ዶላር ምዃኑ የገንዘብ።

ገለ ካብቶም ናይ ኤርትራውያን ሕሳብ ባንክታት ካብ ፈለማ 1980ታት፣ ማለት ቅድሚ ናጽነት ኤርትራ ኣትሒዞም ዝተኸፍቱ ምዃኖም ይንገር።

ብመሰረት ሓበሬታ ባንክ ዓለም፣ ኣብ 2007፣ ሓፈሻዊ ዘቤታዊ እቶት ኤርትራ ብብጽሒት ንሓደ ዜጋ ንዓመት (GDP per capita) ክትመን ከሎ $253 እዩ ነይሩ። በዚ መንጽር፣ ብዓቕሚ ሓደ ኤርትራዊ ክርአ ኸሎ፣ እዚ ብስም ሓደ ዛጊት መንነቱ ዘይተፈልጠ ኤርትራዊ ዓሚል ተቐሚጡ ዘሎ $695.2 ሚልዮን ዶላር ኣዝዩ ዓቢ እዩ።

ኣብቲ ተርታ፣ ኢትዮጵያ ኣብ መበል 153 ተሰሪዓ ትርከብ። ናይ HSBC  ባንክ ዓማዊል ምስ ዝኾኑ ኢትዮጵያውያን ተኣሳሲሩ ኣብቲ ሕሳባት ባንክ ዝጸንሐ መጠን ገንዘብ ብድምር $10 ሚልዮን ዶላር ክኸውን ከሎ፣ ብስም ሓደ ኢትዮጵያዊ ዓሚል ተተሓሒዙ ኣብቲ ባንክ ተመዝጊቡ ዘሎ መጠን ገንዘብ $ 2 ሚልዮን ዶላር እዩ።

ዝርዝራዊ ትሕዝቶ ናይቲ ሰነድ ንምድህሳስ ኣብዚ ጠውቑ፣ Swiss leaked Files

Source: www.icij.org