ካብ ሰሜን ኣመሪካ፡ ሕቡራት መንግስታት ኣመሪካን ካናዳን፡ ገሊኦም ኣሽሓት ማይላት፡ ንልዕሊ 5 ሰዓታት ተጓዒዞም ናብ ዋሽንግተን ዲሲ ብምጕዓዝ፡ ኣብቲ ከም ኣካል ዝኽሪ ናጽነት ኤርትራ ዝተወደበ ሰላማዊ ዝልፊ ዝተሳተፉ፡ ኣስታት ክልተ ሽሕ ኤርትራውያን፡ ሓልዮት ህዝብን ሃገርን ዘንጸባርቕ፡ ሃገራዊ መንፈስ ዘለዓዕል ውዕዉዕ ሰላማዊ ሰልፊ ኣካይዶም።

እቶም ብብዝሒ መንእሰያት፡ ደቀንስትዮን ውፉያት ተቓለስትን ዝርከቡዎም፡ ሓልዮት ህዝቦም ድቃስ ዝኸልኦም ኤርትራውያን፡ ካብቲ ንጉሆ ሰዓት ዓሰርተ ዝተኣኻኸቡሉ ማእከላይ ቦታ ተበጊሶም፡ ምልካዊ ስርዓት ህግደፍ ካብ ስልጣን ክለቅቕ፡ ኣብ ልዕሊ ውጹዕ ህዝቢ ኤርትራ ዝወርድ ዘሎ ደረት ኣልቦ ዓመጽ ብህጹጽ ከብቅዕ፡ ከምኡ ‘ውን ኣብ ውሽጥን ወጻእን ዘሎ ህዝቢ ኤርትራ ነዚ ዲሞክራስያዊ ለውጢ ዕላማ ንምዕዋት ክለዓል ዝጽውዕ ጭርሖታት እናቃልሑ፡ ብምዕሩግን መሳጥን ሰልፊ እናመረሹ ናብቲ ኣብ ውሽንግተን ዲሲ ዝርከብ ኤምባሲ ምልካዊ ስርዓት ህግደፍ፡ ኣብ ዋይት ሃውስ፡ ከምኡ ውን ስቴት ዲፓርትመንት ብምምራሕ፡ ኣብ ክንዲ ውጹዕ ህዝቢ ኤርትራ ናይ ሓርነትን ፍትሕን ድምጺ ኣስሚዖም።

ብፍላይ ኣብቲ ኣብ ፊት ኤምባሲ ስርዓት ህግደፍ ዝተኻየደ ሰልፊ፡ ኣስታት 150 ዝኾኑ ወይጦታት ህግደፍ፡ ነቲ ስለ ውጹዕ ህዝቢ ኤርትራ ዘቃልሑዎ ዝነበሩ ድምጺ ውጹዓት ብመጕልሒ ድምጺ ብዝፍኖ ደርፍታት ክውሕጡዎ ኳ እንተፈተኑ፡ እቲ ናይ ኣስታት ክልተ ሽሕ ኤርትራውያን ናይ ሕልናን ተወፋይነትን ድምጺ ሓርነት፡ ንዋጭዋጭታኦም ዓብሊሉ ብሕፈረት ነንሕድሕዶም ከምጠማመጡን ከምዘቅባሕብሑን ገይሩዎም።

ኣብ መንጎ እቶም ወይጦታት ህግደፍን፡ ደለይቲ ፍትሕን ናይ 10 ሜትሮ ፍልልይ ኳ እንተነበሮም፡ ኣብ ሕልናኦም ዝነበረ ፍልልይ ናይ ሰማይን ምድርን እዩ። እቶም ናይ ውልቀመላኺ ኢሳይያስ ስእሊ ጸይሮም ዝነበሩ ወይጦታት ህግደፍ፡ ነቶም ናይ ግዳያት ሲናይ ቃንዛ ዘንጸባርቕ ምስልን ጥርሖን ጸይሮም ዝነበሩ ደለይቲ ፍትሒ ቀኒዖም ክጥምቱዎም ድፍረት ኣይነበሮምን።

በዚ ድማ፡ እቶም ብኣፍራስን መካይንን ብዝተዓጀቡ ፖሊስ ኣመሪካ ዝሕለዉ ዝነበሩ ቆልዓ ሰበይቲ ዝበዝሑዎም ደገፍቲ ህግደፍ እቲ ውዕዉዕ መንፈስ ደለይቲ ፍትሕን ለውጥን ጭንቀት ስለዘስዓበሎም፡ ናብቲ ህግደፍ ዘላመዶም ዕዋላዊ ጠባያት ኣትዮም፡ ነቲ ርኡይ ውድቀት ናይ ስርዓቶም መሊሱ ናብ ዘረጋግጽ ለጠቕ ዝበለ ደረጃ ክወርዱ ተራእዮም።

ኣብቲ ኣብ ዋይት ሃውስን ስቴት ዲፓርትመንትን ዝተኻየደ ተመሳሳሊ ሰልፊ፡ ስለፈኛታት፡ መንግስቲ ኣመሪካ ነቲ ንህዝቢ ኤርትራ ኣብ ራዕድን ሽበራን ኣውዲቑ ንኹሉ ሰብኣዉ መሰላቱ ዓምጺጹ ዝገዝኦ ዘሎ ምልካዊ ስርዓት ክዅንኖን ኣብ ጎኒ ውጹዕ ህዝቢ ኤርትራ ደውል ከብልን ብተደጋጋሚ ጸዊዖም።

እቲ ካብ ንጉሆ ክሳብ ምሸት ዝተኻየደ ፍሉይ ድምቀት ዝነበሮ ሰላማዊ ሰልፊ በቲ ኣውራ ጎደናታት ዋሺንግተን ዲሲ ክሓልፍ ከሎ፡ ኣቓልቦን ተገዳስነትን ብዙሓት ኣመሪካውያን ስሒቡ።

እዚ ሎሚ ክካየድ ዝወዓለ ሰላማዊ ሰልፊ ሓደ ኣካል ናይቲ ብደረጃ ሰሜን ኣመሪካን ካናዳን ብደለይቲ ፍትሒ ክካየድ ዝተወጠነ መደብ ኮይኑ ሎሚ ምሸትን ጽባሕ ምሉእ መዓልትን፡ ብሓባራዊ ዘተታት ሰሚናራትን ምዝንጋእን ክቕጽል እዩ።

ኣብቲ ዝካየድ ዘሎ ጽምብል ኣብ ገጽ ኩሎም ተሳተፍቲ፡ “እንቋዕ ‘ባ ካብዚ ጉዳይ ሓርነት ኣይበኾርኩ” ዝብል ናይ ዓወት መንፈስ የንጸባርቕ ኣሎ።