ካብ መዓስከራት ስደተኛታት ኢትዮጵያ ብደላሎ ተኣኻኺቦም፣ ብዘይሕጋውያን ኣሰጋገርቲ ናብ ሱዳን ዝጓዓዙ ዝነበሩ 76 ኤርትራውያን ስደተኛታት፣ ወጋሕታ ሰዓት ኣርባዕተ 25 ለካቲት ኣብ ከባቢ ሓምዳይት ብዘጋጠሞም ዘሰቅቕ ተደጋጋሚ ሓደጋታት መኪና ከም ከምዝሞቱ፣ ኣብ ሱዳን፣ ከተማ ገዳርፍ ዝርከቡ ኤርትራውያን ንሓለፍቲ ጸጥታ ናይቲ ከተማ ብምውካስ ሓቢሮም።

ብመሰረት ‘ቲ ካብ ጸጥታ ገዳርፍ ዝተረኽበ ሓበሬታ፣ እቶም ካብ መዓስከራት ስደተኛታት ኢትዮጵያ ዝተበገሱ 78 ኤርትራውያን  ኣሕዋትን ኣሓትን በታ FSR ዝብል ጽሑፍ ዝነበራ ናይ ጽዕነት መኪና እናተጓዕዙ ብዘጋጠሞም ሓደጋ ብኡንብኡ 51 ካብኣቶም ክሞቱ ከለዉ፣ እቶም ብከቢድን ቀሊልን ቆሲሎም ዝነበሩ 27 ውጻእ ምዓት ኤርትራውያን ድማ ብኻልእ መኪና ተሳፊሮም ናብ ሕክምና እናኸዱ እዮም ዳግማይ ብዘጋጠሞም ከቢድ ሓደጋ ምግምጣል ብዘይካ ክልተ ኩሎም እቶም ተሪፎም ዝነበሩ 25 ሞይቶም።

ነቲ ሓበሬታ ዝሃበ መኮነን ጸጥታ ገዳርፍ ሚስተር ኣልዳውድ ስዒድ መሓመድ “ኣብ መዋእል ህይወተይ ከምዚ ዝኣመሰለ ዘስካሕክሕ ሓደጋ ርእየን ሰሚዐን ኣይፈልጥን” ክብል ንኽብደት ናይቲ ኣብ ልዕሊ ‘ቶም መሳኪን ኤርትራውያን ብተኸታታሊ ዘጋጠመ ትራጀዲ ገሊጹዎ።

ብዘይካ ‘ዚ ምምሕዳር ጸጥታ ገዳርፍ ኣብዚ ሓደጋ ‘ዚ ኢድ ዘለዎም 7 ደላሎን መሰጋገርትን ኤርትራውያን ተለልዮም ከምዘለዉ ብምጥቃስ፣ ዮናታን ወደኣብ ዝተባህለ ቀንዲ መራሒ ናይቶም ደላሎን መሰጋገርትን ኣብ ትሕቲ ቁጽጽር ጸጥታ ሱዳን ውዒሉ ከምዘሎ ኣፍሊጡ።

ድምጺ ኣሰና ነቶም በዚ ተኸታታሊ ሓደጋ ህይወቶም ዝሰኣኑ ንጹሃት ኤርትራውያን መንግስተ ሰማያት የዋርሶም እናበለት፣ ንቤተሰቦም ጽንዓት ትምነየሎም።