እቲ ኣብ ውሽጥን ወጻእን ብዝርከብ ህዝቢ ኤርትራ ተፈንፊኑ ኣብ ተስፋ ምቝራጽን ዓቕሊ ጽበትን ወዲቑ ዘሎ ምልካዊ ስርዓት ኢሳይያስ፣ ኣብ ውሽጢ ኤርትራ ራዕድን ሽበራን ፈጢሩ ንህዝቢ ብሓይልን ፍርሕን ክሕዞ ክፍትን ከሎ፣ ኣብ ወጻኢ ድማ ጠንቂ ተነጽሎኡ ኣብ ህዝቢ ኤርትራን ማሕበረሰብ ዓለምን ኢሉ ንዝኣምነሎም ተቓለስስቲ ዝጻብኡ ሃሱሳት ኣዋፊሩ ውዲታዊ ሽርሕታት ብምክያድ ዕድመ ስልጣኑ ንምልቃብ ከንቱ ዓቕሊ-ጽበታዊ ምንቅስቓስ ኣብ ምግባር ኣተኵሩ ይንቀሳቐስ ከምዘሎ ምንጭታት ሓቢሮም።

እቶም ንዓመጽ ምልካዊ ስርዓት ኢሳይያስ ብምቅዋም ኣብ ጎድኒ ህዝቦም ደው ንዝበሉ ገዳይም ተቓለስትን ተጣበቕትን ብምጽባእ፣ እቲ ስርዓት ካብ ማንም ግዜ ንላዕሊ ገጢሙዎ ንዘሎ ህዝባዊ ተነጽሎን ፍሽለትን ንምግታእ ተዋፊሮም ዘለዉ ሃሱሳት፣ ነቲ ስርዓት ዝገደፊዎ ተመሲሎም ኢዶም ክህቡ ኮነ ኢሎም ብመሓውር ስለያ ናይቲ ስርዓት ዝተላእኩ ‘ሞ ተደናገጽቲ ለውጢ ተመሲሎም ናይ ዑቕባ ወረቐት ኣብ ምርካብ በቶም ደለይቲ ፍትሒ ከይተረፈ ምትሕግጋዝ ዝተገብረሎም ብደረጃ ሓለፍትን ተራን ኣብ ኤውሮጳን ኣመሪካን ተዋፊሮም ከምዝርከቡ ሓበሬታ ተረኺቡ።

እዞም ናይ ዑቕባ ወረቐት ምስ ረኸቡ፣ እቲ ምልካዊ ስርዓት ዝሃቦም ሃሱሳዊ ተልእኾ ብስዉር ኣብ ምፍጻም ዝርከቡ ናይ ስለያ ድሕረባይታ ዘለዎም መብዛሕትኦም ተጋደልቲ ህዝባዊ ግንባር ዝነበሩ ክኾኑ ከለዉ፣ ነቲ ኣብ ወጻኢ ዘካይዱዎ ሽርሕታት ኣብ ምስላጥ ዝተሓባበሩ፣ ውልቃዊ ድኻማቶም ዘጽንዑዎም፣ መጋበርያ ክኾኑ ዝኽእሉ ሓደ ሓደ ብገበናት ዝተለኽፉ ስራሕ ኣልቦ መንእስያት ቤተሰቦም ንኽበጽሑ ከምዝኸዱ ኣምሲሎም ናብ ኤርትራ ብምልኣኽ ስለያዊ ስልጠና ከምዝወስዱ ይገብሩ ምህላዎም ‘ውን እቲ ሓበሬታ ኣረዲኡ።

ናይቶም ዑቕበኛታት ተመሲሎም ተዋፊሮም ዘለዉ ሰለስቲ ኮነ፣ ንሳቶም ዝምልምሉዎም ዘለዉ ሃሱሳት ጭብጥታት ናብ ጸጥታዊ ትካላት ናይተን ዝነብሩለን ዘለዉ ሃገራት ተመሓላሊፉ ከምዘሎ ‘ውን ተፈሊጡ።

ምስዚ ኣብ ዝተኣሳሰር ሓበሬታ፣ ኣብ ሃገራዊ ድሕነት ምልካዊ ስርዓት ኢሳይያስ ንነዊሕ ዝሰርሐ ብሪገዴር ጀነራል ኣብርሃ ካሳ ኣብ ዝሓለፈ እዋን ኣብ ስዑዲ ዓረብ ኣብ ዘካየዶ ምብጻሕ፣ ኣብ ስዑዲ ዓረብ፣ ብፍላይ ድማ ኣብ ጀዳን ርያድን ኣንጻር እቲ ምልካዊ ስርዓት ተሪር ናይ ተቓውሞ መርገጺ ናይ ዘለዎም ዓሰርተታት ኣስማት ገዳይም ተቓለስቲ ኣብ ጀዳን ርያድን ብስም ቆንስላዊ ጉዳያት ኣብ ስለያዊ ስርሓት ተዋፊሮም ንዝርከቡ ሓለፍቲ ሰለይቲ ድሕሪ ምርካቡ፣ ምእንቲ ፍትሕን ለውጥን ንዘካይዱዎ ምንቅስቓስ ንምድኻም ሃሱሳዊ ተጻብኦታት ክወስዱሎም መምርሒ ከምዝሃቦም ካብ ውሽጢ ኤምባሲ ስርዓት ኢሳይያስ ኣብ ስዑዲ ዓረብ ዝተረኽበ ጭቡጥ ሓበሬታ ኣረዲኡ።

ብመሰረት እቲ ሓበሬታ፣ ነዚ መምርሒ ‘ዚ ተቐቢሎም ከም ኣወሃሃድቲ ናይቲ ስለያዊ ስርሓት ኣብ ጀዳ ኣብ ቤትጽሕፈት ቆንስል ‘ቲ ስርዓት ተመዲቦም ዝሰርሑ ዘለዉ ሰለይቲ፣ ኮለኔል ኣማን ኢብራሂም፣ ከምኡ ‘ውን ሓደ ኣደም ባላማት ዝተባህለ ካብኡ ንታሕቲ መዓርግ ዘለዎ ሰላዪ እዩ።

ምልካዊ ስርዓት ኢሳይያስ ነቲ ኣብ ስዑዲ ዓረብ ዘሎ ድሑር ስርዓተ ምሕደራ ዝጠንቁ ናይ ሕግን ስርዓትን ሃጓፍ ብምምዝማዝ፣ ብናይ ዲፕሎማሲ ፓስፖርትን ናይ ኩንትራት ቪዛን ኣቐዲሙ ናብቲ ሃገር ዘእተዎም ደቂ ተባዕትዮን ደቂ ኣንስትዮን ኣብ ትሕቲ እዞም ዝተጠቕሱ ሓለፍቲ ኮይኖም፣ ነቶም ከም ኣብ ካልእ ሃገራት ሕጋዊ ደገፋት ዘይብሎም ጽኑዓት ተቓለስቲ ኣብ ምክትታልን ምጽባእን ይጥቀመሎም ከምዘሎ ድማ እቲ ሓበሬታ የረድእ።

እቲ ብስስዐ ስልጣን ዝዓበደ ውልቀመላኺ ኢሳይያስን መጋበርያታቱን፣ ካብ ተቓወምቶም ንዝወርዶም ጸቕጢ ንምእላይ፣ ኩሉ ዓይነት ውዲታት እንተላይ ምስማምን ኣብ መንጎ ስድራቤታት ኣቲኻ ሓዳር ምዝራግን ብቐደሙ ዝሰርሑሉ ዝነበሩ ተንኮላት ሕጂ ‘ውን ኣብዚ ናይ ዕራርቦ ስርዓቶም እዋን ይቕጽሉዎ ከምዘለዉ ‘ውን ክፍለጥ ተኻኢሉ።

እቶም ኣብ ማእከላይ ምብራቕ ብፍላይ ኣብ ስዑዲ ዓረብ፣ ከምኡ ‘ውን ኣብ ኤውሮጳን ኣመሪካን ኣውስትራልያን ዝርከቡ፣ ተቓለስትን ደለይቲ ለውጥን፣ ምልካዊ ስርዓት ኢሳይያስ ተስፋ ቖሪጹ ኣብዚ ደረጃ እዚ ምውዳቑ፣ መርኣያን ውጽኢትን ናይቲ እከይ ተግባራቱ ብምቅላዕ ኣብ ህዝቢ ኤርትራን ማሕበረሰብ ዓለምን ዘስዓቡሉ መምለሲ ዘይብሉ ተነጽሎ ምዃኑ ብምግንዛብ፣ ንዓቕሊ ጽበታዊ ውዲታቱ ብትዅረት እናተኸታተሉ ቃልሶም ብዝለዓለ ደረጃ ክቕጽሉዎን፣ ዓወታቶም ብምዕቃብ ውድቀቱ ከቀላጥፉን ይግባእ።