ብ ኣወልኼር ዓ/ሓፊዝ

ከተማ ሓለብ ሓንቲ ካብተን ጥንታውያን ከተማ ደቂ ሰብ`ያ። ደቂ ሰብ እናረኣዩ እናሰምዑ ከኣ ትዓኑ`ላ። ንረብሓ መን`ዩ ？ንረብሓ መን`ዩ ዝብል ዛዕባ ይጽናሓልና`ሞ፤  ድሕሪ`ዚ ንርእዮ ዘሎና ህልቀት፤ ዝውሕዝ ዘሎ ደም፤ ጽባሕ ኣብ መሰረት ናይ`ዚ ዑና` ዚ ዝህነጽ ኣእምሮን ኣተሕሳስባን ከመይ ክኸውን`ዩ ኢልና ንግምት ？! እቲ  ጭካነ ዓለምና ዝወልዶ ኣተሕሳስባ ድዩ ጽባሕ ንዓለምና ክቆሉ ወይሲ ጽባሕ`ውን እቲ  ሕጂ ብዝተፈላለየ መንገዲ ነእምሮና እናዘወረ ንትማሊ ጻዕዳ ዝበለና ሎሚ ጸሊም ኢሉ ዘእምነና ገባቲ ሓይሊ ከምዘለዎ ቀጺሉ እናጠበረ ኣይ ሕሙም ኣይጥዑይ ሂወት ከንብረና？

ጥምየት ሕማም ጽምኢ ዕርቃን ፍርሒ ስቃይ  መቅዘፍቲ …………. ኮታ ደቂ ሰባት ቅድሚ ሕጂ ዘሕለለፍዎን ዘየሕለፍዎን ኩሉ ዓይነት ኩፉእ ህዝቢ ሓለብ የሕልፎ`ሎ።

ሩስያ ኩሉ ክትፍትኖ እትደልዮ ዓይነት መሳርያ ኣብ ዝባን ሶርያውያን ፈቲናቶ`ያ። “ ነጻ ዓለም” ተባሂሉ ዝፍለጥ ምዕራብ ከኣ ኣብ ሶርያ ዕርቃኑ ወጺኡ`ዩ። ወዮ ሰራዊት ዘውፈረሉ ጎሽጓሽ “ደሞክራሲ ማእከላይ ምብራቅ’ ሎሚ ኣብ ማይ ዝኣተወት ኣንጭዋ ኮይኑ`ሎ። ኣይተቃደዎምን ！ ድክታቶርየ ኣበይ ኣለኻ ኮነ።

ኣሸባሪት ሩስያን ኣብ ጎዱፋ ዝዓስሉ ኣሸበርትን ደም ቆልዓ ሰበይቲ፤ደም ሽማግለታትን መንእስያትን ፊጊዕ ምስ በሎም ነቶም ቅድመ ዕለት ተወሊዶም ስጋብ ምልኣቶም ዝረጋገጽ ብሆስፒታል ዝእለዩ ናጽላ ከይተረፉ ሃሪሞም ！！！ እዚ ሽበራ እንተዘይኮይኑ ኣየናይ`ዩ ደኣ ሽበራ ！

በሉ ！ገበቲ ዓለም እቲ እናረኣየ ክርኢ ዘይደሊ የሳሊኹም፤ እንተ`ቲ ዝርእይ ግና ርእዩኩም ኣሎ፤ሶርያ ዝሓደገትልኩም የብላን ተቃሊዕኩም ኢኹም፤ ወጣጢትካ ዝሽፈን የለን።

ከምኡ ኸኣ  ኣንቱም “ እስላማዊ ሽበራ “ እናበልኩም  ከተጽምሙና ዝሓገኹም፤  ወዮም ሽበራ ሃይማኖት የብሉን ኢሎም  ብስንኪ ዋዕዋዋዕታኹም ሰማዒ ሲኢኖም ዝጸነሑ ሓቀኛታት ሎሚ ኣብ ሶርያ 3 ብባዶ ሲዒረሙኹም። ብኸመይ? እንተልኩም ………..   እቶም ኣብ ሓለብ ንቆልዓ ሰበይቲ ዘሸብሩ ዘለዉ  ኣስላም ኢና ዝብሉ ኣለውዎም  ክስታን ኢና ዝብሉ`ውን ኣለወዎም። ”ልዕባ 3 ወረቃ“ ይኣክል።

AAHafiz (209) 01/12/2016

”ልዕባ 3 ወረቃ“  3 ወረቀት ጠላዕ ገርካ ዝጽወት ዓይነት ቁማር`ዩ