ብጴጥሮስ ተኽሉ፡ (ሓላዪ)

ዘይግዶም ናይ ህዝቦም

ተሪር እኩይ ልቦም

ሓዊ እንዳሳወሩ

ህዝቢ ዘባርሩ፣

    መንዮም ንሶም ንፍለጦ’ቲ ጉዶም

    ህዝቢ ዘናኽሱ ሓዊ ኣጓጊዶም

    ምስ እኩይ ተግባሮም ካብ ምትሕብባር

    ምቕላዕ ምድሕርሓር ኢዩ ሰናይ ተግባር፡

እታ ልምዕቲ ኣውሊዕ መጽለሊት ኩልና

ቆጽላ ይረግፍ ኣሎ ስኣን ዋና

ጨናፍራ ብየማን ብጸጋም ክስልዑ

ይልከሙ ኣለዉ ዘይተዓደሉ ቆልዑ፣

    ሃገርካዶ ከም እቶን ተቃጽለካ

    መንከ ሓሲብዎ፧ እዚ ይመጽእ ኢልካ

    ኮነኸ! ካብኮነ፣ ካብ ዓንገረር ዘረባ

    ሃየ! ተጠርነፋ ውድባት ኣብ ሓደ ውደባ፡

በዚ ኣገባቡ ዝጠፍኦ ገባቲ ስርዓት

ብጥዓመጽ ህዝቦም ዝስምዖም ኩርዓት

“ሕራይ ኮኑ!” ዝብሉ’ለዉ ህዝባዊ መንድዓት

ይኣክል! ንበሎም ካብ ደቒቐ-ስዓት፡

    ብመከራ ህዝቢ፣ ዝሕጎስ ጸላኢ

    ንንጹሃት ዝውንጅል ጸለሎ ቀባኢ

    ምዓስ ቅቡል ኮይኑ ሓው ንሓው ከናቑት

    እንታ’ዩ ረብሓኻ፧ ተመራመር ብዕምቆት፡

ወረስቲ ዓደቦ፣ ካብ እቶን ዝመለቑ

ድምጺ ውጹዓትዮም ብህዝቦም ዝሕለቑ

ሓዊን ሃልሃልታን ኮይኖም ንጸላእቶም ይሎቕምጹ

ንእቶን ሓጓዶ ኣጥፊኦም ክብሉና ድሓን ምጹ፡

    ዓወት ዘይተርፍዩ ስዒርና ምድሕርሓር

    ሕጂ ሓባር ንስራሕ ልምምድ ንደሓር

    ከይጸመደ ኣንጎደ ኣብ ኩሉ ከይነጻሕና

    ንዓይ፡ ኣነ፡ ንግደፍ ህዝቢኮ’ዩ ዋና፣

ንስስዐ ዝስዕር ባይታ ነሰስን

ቦታ የብሉን ጸግዐጸግዒ ዘዋስን

ናይ ኩሉ ብሃገርን ህዝቢን ዝግደስ ውራይ

ንዕድመ ጸዋዒት ህዝቢ መልሱ ይኹን ሕራይ፡

    ፍርሃት እግዚኣቢሔር ዘለዎ፣ ዘኽብር እምነት

    ከም መሳርሒ ሰላም’በር ዘይብሉ ኣነነት

    ምስ ህዝቡ፡ ንህዝቡ፡ ብዘይቅድመኩነት

    ኣርኣያ ኮይኑ ይበገስ ህዝባዊ ኣብነት።

25/02/2012