እቶም ኣብዚ ቐረባ መዓልታት 55 ዝዕድሚኣ ሽወደናዊት ኣደን ወዲ 28 ወዳን ብምቕታል ተጠርጢሮም ተታሒዞም ዘለዉ ክልተ ኤርትራውያን፣ ዋላ ገበነኛታት ኮይኖም እንተተረኺቦም፣ ብምኽንያት ‘ቲ ኣብ ኤርትራ ዘሎ ኢሰብኣዊ ኣተሓሕዛ ናይቲ ስርዓት ናብ ኤርትራ ከምዘይስጎጉ መንግስቲ ሽወደን ከምዘፍለጠ፣ breitbart.com ብሬትባርት ዝተባህለ መርበብ ዜና ሓቢሩ።

እቲ መርበብ ሓበሬታ፣ ወሃቢ ቓል ቦርድ ስደተኛታት ሽወደን “ነዚ ኣብ ኤርትራ ዘሎ ሓደገኛ ኩነታት ኣብ ግምት ብምእታው፣ ነዞም ጥርጡራት ዋላ ማእሰርቶም ምስ ወድኡ ናብ ሃገሮም ምስጓጕ፣ ኣንጻር ሰብኣዊ መሰሎም ስለዝኾነ ዘይፍጸም ስጉምቲ እዩ” ከምዝበለ ‘ውን ጠቒሱ።

እቲ ኣብ ልዕሊ ‘ቶም ንጹሃት ሽወደናውያን ብሃውሪ ዝተፈጸመ ቅትለት ፖለቲካዊ ይኹን ግብረሽበራዊ ምትእስሳር ከምዘይነበሮ ዝጠቐሱ ጋዜጣታት ሽወደን፣ ስነኣእምሮኣዊ ጸገም ዘስዓቦ ዘሕዝን ፍጻሜ ምዃኑ ግምታቶም ይገልጹ።

ሓደ ካብቶም ክልተ ጥርጡራት ኤርትራውያን ብኻራ ተሃሪሙ ዝተታሕዘ ክኸውን ከሎ፣ ጠበቕኡ፣ በጋጣሚ ኣብቲ ቦታ ዝጸንሐ፣ ኣብቲ ገበን ኢድ ዘይብሉ ንጹህ ሰብ ምዃኑ የገንዝብ።

እዚ ኣብ ልዕሊ ንጹሃት ዜጋታት ሽወደን ተፈጸመ ሃንደበታዊ ቅትለት፣ ብሓቂ በዞም ኤርትራውያን ከምዝተፈጸመ እንተተረጋጊጹ ብመጠኑ ፍሽለት ኣብ ስደት ናይ እንርከብ ማሕበረሰብ ኤርትራውያን ዘንጸባርቕ እዩ።

ኮነ ኢልካ ዝተፈጸመ ገበን እንተድኣ ኮይኑ፣ እቶም ኣብ ቅድሚ ‘ቲ ዘስካሕክሕ ግፍዕን ውርደትን ራሻይዳን በደዊንን ሕሉፍ ልኡምነት ዘርኣና ኤርትራውያን፣ በንጻሩ ነቶም ጸገምና ተገንዚቦም ዑቕባ ዝሃቡና ሕብረተሰባት ዘይኢዶም ምፍዳይና፣ ኤርትራውያን ክሳብ ክንደይ ካብቲ ዘዕበየና ብሃይማኖትን ስነምግባርን ዝተሃንጸ ባህርያት ሕብረተሰብና ነላግስ ምህላውና ዝእምት ክኸውን ከሎ፣ ብስነኣእምሮኣዊ ጸገም ናይቶም ዜጋታትና ዝተፈጸመ እንተኾይኑ ‘ውን፣ ኣብ ስደት እንርከብ ኤርትራውያን፣ ነቶም ከቢድ ሽግራት ሰጊሮም ዝመጽኡ ዘለዉ መንእሰያት ብቐጥታ ይኹን ብተዘዋዋሪ ስነኣእምሮኣዊ ደገፍ ክረኽቡ ኣድላዪ ምትሕብባር ንገብር ከምዘየለና ዘንጸባርቕ እዩ።

ብመሰረት ጸብጻባት ማዕከናት ዜና ሽወደን፣ ኣብዘን ዝሓለፋ ሸውዓተ ኣዋርሕ 2015 ጥራይ 4,257 ኤርትራያን ስደተኛታት ኣብ ሽወደን ዑቕባ ከምዝሓተቱ ይፍለጥ። እዚ ብዝሒ ‘ዚ ድሕሪ ናይታ ብውግእ ሕድሕድ ተሓሚሳ ዘላ ሶርያ ብኻልኣይ ደረጃ ዝስራዕ እዩ።