እቶም ብምልካዊ ስርዓት ኢሳይያስ ብዘይ ሕጋዊ መንገዲ መንፈሳዊ መዓርጎም ተቐንጦጦም ን 11 ዓመታት ተሓይሮም ዝጸንሑ 3ይ ፓትርያርክ ኦርቶዶክስ ተዋህዶ ኣቦና እንጠንዮስ ተለቒቖም ከምዘለዉ ምንጭታት ካብ ኣስመራ ሓቢሮም።

እቲ ንምፍትሖም ብዝምልከት ‘መግለጺ ቅዱስ ሲኖዶስ’ ኣብ ትሕቲ ዝብል ኣርእስቲ ዝተጻሕፈ፣ ዓሰርተ ወከልቲ ዝፈረሙሉ ዝበጽሓና ሓጺር ሰነድ ቃል ንቓሉ ከምዚ ይብል።

“በብምዕራፉ ንነዊሕ እዋን ብመንገዲ ስምረት ገዳማትን ጉባኤ ሊቃውንትን ኦርቶዶክስ ተዋህዶ ቤተክርስትያን ኤርትራ ክጸዓረሉ ዝጸንሐ ጉዳይ 3ይ ፓትርያርክ ኣቡነ እንጠንዮስ፣ ተወከልቲ ስምረት ገዳማትን ጉባኤ ሊቃውንትን ኣብ ዝተረኽቡሉ ጉባኤ ቅዱስ ሲኖዶስ ብዕርቀ ሰላም ከምዝተፈጸመ ንህዝበ ክርስትያንን ኩሎም ፈተውቲ ቤተክርስትያንን ብሓጎስ ነበስር”።

ብመሰረት’ቲ ረኺብናዮ ዘለና ሓበሬታ፣ ኣቡነ እንጠንዮስ ብቤተሰቦምን ፈተውቶምን ክብጽሑ ቀንዮም ኣለዉ። ምስ ኮነ ብጭብጢ ዝረጋገጽ ኳ እንተኾነ፣ ጽባሕ ሰንበት 16 ሓምለ ኣብ ኣስመራ ቤተክርስትያን እንዳማርያም ብወግዒ ክረኣዩ ምዃኖም ‘ውን ተፈሊጡ ‘ሎ።

ኣቦና እንጠንዮስ ንምትእትታው ፖለቲካ ኣብ ሃይማኖት ብምቅዋም ን 11 ዓመታት ተሓይሮም ኣብ ትሕቲ ሓለዋ ክሳቐዩ ጸኒሖም ክንሶም ከምዚ ኣብቲ መግለጺ ዝተጠቕሰ ንማእሰርቶም ጉዳይ ኢሎም ክሽፍኑዎ ኳ እንተፈተኑ፣ ምፍትሖም ብዘይዓመጽን ምፍርራሕን ብነጻ ድሌቶም ከምቲ ጽሑፍ ዝብሎ ዘሎ ብዕርቂ ተፈጺሙ እንተደኣኮይኑ ብሓቂ ዘሐጉስ ብስራት እዩ።

ይኹን እምበር ምፍታሕ 3ይ ፓትርያርክ ኣቡነ እንጠንዮስ መጀመርያ እምበር መወዳእታ ናይቲ ጉዳይ ኣይኮነን። እቲ ዕርቅን ሰላምን ምሉእ ክኸውን እንተደኣ ኮይኑ፣ እቲ ምስ ማእሰርቲ ኣቦና ኣቡነ እንጠንዮስ ተኣሳሲሩ ኣብ ውሽጢ ብሕልፊ ድማ ኣብ ወጻኢ ኣብ ዝርከቡ መራሕቲ ሃይማኖትን ኣብያተ ክርስትናን ዝተኸስተ ምፍንጫልን ምክፍፋልን ከብቅዕ ምእንቲ፣ እቲ ጠንቂ ግርጭትን ምብትታንን ኣመንቲ ኦርቶዶክስ ተዋህዶ ኮይኑ ዝጸንሐ ንሃይማኖት ምሳርሒ ፖለቲካ ንምግባሩ ዝዓለመ ኢድ ምትእትታውን ውዲትን ስርዓት ህግደፍ ኣብ ጉዳይ ኣብያተ ክርስትያናት ከብቅዕ ኣለዎ።

ከምቲ ክብ ኢልና ዝጠቐስናዮ እቲ ዕርቂ ብነጻ ድሌት፣ ብፍቕርን ስምምዕን ዝተፈጸመ እንተደኣኮይኑ፣ እቶም ዕርቂ ኣብ ምርግጋጽ ዝጸዓሩ ኣቦታት ብህዝቢ ክምስገኑ፣ ንሳቶም ብወገኖም ከኣ ነቲ ብምርጋፍ ምቑሕ ኣቡነ እንጠንዮስ ጀሚሮሞ ንዘለዉ ዕርቂ፣ ብሕልፊ ኣብ ውጻኢ ነተን ኣብ ብምፍልይን ምግምማዕን ተሓሚሰን ንዘለዋ ኣብያተ ክርስትያን ብምስማር ነቲ ዕርቂ ምሉእ ክገብሩዎ ጻዕሮም ክቕጽሉ ይግባእ።

በዚ ኣጋጣሚ ን 3ይ ፓትርያርክ ኦርቶዶክስ ቤተክርስትያን ኣቡነ እንጠንዮስ እንቋዕ ብደሓን ወጻእኩም እናበልና፣ ንቤተሰቦም፣ ኣመንቲ ኦርቶዶክስ ተዋህዶን ህዝቢ ብሓፈሻን እንቋዕ ኣሐጎሰኩም ንብል።