እዚ ኣብ ስዊዘርላንድ ኣብ ምስጢራዊ ሕሳብ HSBC ባንክ ተቐሚጡ ዝጸንሐ ሕጂ ተቐሊዑ ዘሎ ኣስታት 700 ሚልዮን ዶላር ዝበጽሕ ገንዘብ፣ ውልቀመላኺ ኢሳይያስ ካብ ኤርትራ ዘህደሞ ናይ ህዝቢ ኤርትራ ጸጋ ምዃኑ ህዝቢ ክፈልጦ ከምዝግባእ፣ ሓላፊ ኣታዊ ውሽጢ ሃገር (Treasury) ኮይኑ ኣብ ኤርትራ ዘገልገለ ኣቶ ክብሮም ዳፍላ ምስ ድምጺ ኣሰና ኣብ ዝገበሮ ቃለመጠየቕ ኣገንዚቡ።

ኢሳይያስ ከምቲ ንኹሉ ፖለቲካውን ቁጠባውን ኣካላት ኤርትራ ገቢቱ ሒዙዎ ዘሎ፣ ንብልሽውና መታን ክጥዕሞ፣ ንስልጣን ናይቶም ገንዘባዊ ቁጽጽር ክገብሩ ዝግብኦም ፋይናንሳዊ ትካላት ከይተረፈ ኣብ ኢዱ ጨቢጡ ሒዙዎ ስለዘሎ፣ ኣታዊታት ዕደና ወርቂ ይኹን ብኻልእ ስዉር ምንቅስቓሳት ዝገሓጦ ሚልዮናት ዶላራት ብዘይሕጋዊ መንገዲ  ብሕታዊ ዋኒኑ ገይሩዎ ምህላዉ ኣረዲኡ። “እዚ ድሮ እንፈልጦ ዝነበርና፣ ዝርዝራቱ ጥራይ ኣጊሙና ዝነበረ ጉዳይ እዩ” ብምባል ከኣ፣ እቲ ካብ ናይ ስዊዝ ጨንፈር HSBC ባንክ ልሒኹ ዘሎ ሓበሬታ፣ ነዚ ኣብ ስርዓት ኢሳይያስ ዘሎ ብልሽውና ዘረጋግጽ ኣገዳሲ ጭብጢ ምዃኑ ኣብሪሁ።

ገንዘብ ናይ ሓደ ህዝቢ ብመንገዲ ሃገራዊ ባንክ ጥራይ ክተሓዝን ክቕመጥን ከምዘለዎ ዝጠቐሰ ኣቶ ክብሮም፣ ብዝተፈላለዩ ኣሽማትን ሜላታትን ተሸፊኑ ኣብ ናይ ወጻኢ ሕሳባት ክቕመጥ ዝኽእል ኳ እንተኾነ፣ ንዓና ከም ኤርትራያን ግን፣ እቲ ሜላ ኣሰራርቓኡን ኣተሓባብኡኡን ዘይኮነ፣ እቲ ገንዘብ ብቐንዱ ናይ ህዝቢ ኤርትራ ምዃኑ ከነተኵረሉ ከምዝግባእ ኣተሓሳሲቡ።

ንሰራቒ መሳርቕቲ ከምዘለዎ ብምጥቃስ ድማ፣ እቶም ኣብ ኤርትራ ብስም ወፍሪ ኢደበዛ ምዝመዛ ኮይኖሞ ዘለዉ ኩባንያታት ወጻኢ ይኹኑ ካብ ህዝቢ ዝሰረቖ ገንዘብ ኣብ ወጻኢ ብምስጢር ዘቐምጡሉ ኣህጉራውያን ባንክታት ካብቲ ገበን ከምዘየምልጡ ኣረዲኡ። ይኹን እምበር፣ ንሳቶም ጥቕሞም ጥራይ ስለዘገድሶም፣ ንሕና ከም ኤርትራውያን ረብሓ ህዝብና ንምሕላው ብዕቱብን ስሩዕን ኣገባብ ክንሰርሕ ኣዘኻኺሩ።

ኣብ መወዳእታ ኣቶ ክብሮም፣ እቲ ብድኽነት ተበሊዑ፣ ኣብ ዓለም ድሕሪት ተሰሪዑ ዘሎ ውጹዕ ህዝቢ ኤርትራ ብመራሕቱ ክዝመት ከሎ ሃየንታ ምዃኑ፣ ኩሉ ኤርትራዊ በቲ “ኤርትራ ካብ ብልሽውና ነጻ እያ” ዝብል፣ ፕሮፖጋንዳ ኢሳይያስን ሰዓብቱን ከይተደናገረ፣ እቲ ናይ ህዝቢ ገንዘብ ኣብ ግቡእ መዓላኡ ከምዝውዕል ንምግባር በብዓቕሙ ክንቀሳቐስ ተላብዩ።