እቲ ኣብ ፈለማ ናይዚ ወርሒ ሚያዝያ 2016 ኣብ ማእከል ኣስመራ፣ ኣብ ልዕሊ መንእሰያት ኤርትራ ዝተፈጸመ ጃምላዊ ቅትለት፣ ስለምንታይ ኣሽሓት ኤርትራውያን መንእሰያት ናብ ስደት የምርሑ ከምዘለዉ ዘዘኻኽር ጭቡጥ መርትዖ ምዃኑ ዋሽንግተን ፖስት ኣብ ዘስፈሮ ሰፊሕ ዓንቀጽ ኣብሪሁ።

እቲ ውሩይ ጋዜጣ፣ ሃገራዊ ኣገልግሎት ኣብ ዓለም ሓድሽ ኳ እንተዘይኮነ፣ ኣብ ኤርትራ ግን እቲ ግዱድ ዕስክርና ደረት ዘይብሉ ብምዃኑ፣ ካብ ሃገር ብሕጋዊ መንገዲ ምውጻእ ስለዘይከኣል፣ ከምኡ ‘ውን እቲ ካ 10 ዶላር ንወርሒ ዘይሓልፍ ክፍሊት ጠንቂ ዋሕዚ ስደት ኣሽሓት ኤርትራውያን ኮይኑ ምህላዉ ኣገንዚቡ።

እቶም ብ3 ሚያዝያ፣ ናብ ዝተመደበሎም ናይ ግዱድ ዕዮ ቦታ ብኣስመራ ዝሓልፉ ዝነበሩ ኣሽሓት መንእሰያት ሃገራዊ ኣገልግሎት ካብተን ተሰቒሎመን ዝነበሩ ናይ ጽዕነት መካይን  ዘሊሎም ከምልጡ በቲ ስርዓት ዝተቐትሉን ዝቖሰሉን ክሳብ 29 ዝበጽሑ መንእሰያት ድማ፣ እቲ ገጢሙዎም ዘሎ ኩንታት ክሳብ ክንደይ ዘይጽወር ኮይኑ ዓቕሎም ኣጽቢቡሎም ከምዘሎ ዝምስክር ተርእዮ ምዃኑ ኣረዲኡ።

ኤርትራ ካብ ኣህጉራዊ ማዕከናት ዜና ዕጽውቲ ብምዃና ዓለም ግቡእ መረዳእታ ኩነታት ህዝቢ ኤርትራ ኳ እንተዘይብላ፣ ጋዜጠኛታት ብዘይ ዶብ ኣብ ጉዳይ ናጽነት ፕረስ ድሕሪ ሰሜን ኮርያ ኮይና ጭራ መላእ ሃገራት ዓለም ምስርዑ ሃለዋት ናይታ ሃገር ካብቲ ሰብ ክጽበዮ ዝኽእል ንላዕሊ ኣዝዩ ዝኸፍአ ከምዝኾነ ከምዘመልክት ‘ውን ዋሺንግተን ፖስት ይገልጽ።