እቲ ትማሊ 12 ሰነ ወጋሕታ ጀሚሩ ንምሸቱ ‘ውን ዝቐጸለ ኣብ ዶባት ኤርትራን ኢትዮጵያን ብፍላይ ኣብ ከባቢ ጸሮና ዝተኻየደ ብርቱዕ ውግእ ሎሚ 13 ሰነ ዝግ ኢሉ ኳ እንተሎ ብኽልቲኡ ወገን ከቢድ ምፍጣጥ ምህላዉ ምንጭታት ኣሰና ብኽልቲኡ ወገን ኣረጋጊጾም።

ምልካዊ ስርዓት ኢሳይያስ ምሉእ መዓልቲ ኣጽቂጡ ድሕሪ ምውዓል ኣማስይኡ ብኢትዮጵያ መጥቃዕቲ ከምዝተኻየደሉ ክልተ መስመር መግለጺ ብምውጻእ፣ ቀጻሊ መግለጺታት ከስዕብ ምዃኑ ድሕሪ ምምብጽዑ ዝሃቦ ተወሳኺ ሓበሬታ የልቦን።

መንግስቲ ኢትዮጵያ ብወገኑ ዛጊት ዝሃቦ ወግዓዊ መግለጺ የልቦን።

ኣገልግሎት ዜና ሮይተርስ ብወገን ኢትዮጵያ፣ ኣብ ከባቢ ዛላምበሳ ዝነበር ስሙ ክዕቀበሉ ዝሓተተ ብተለፎን ዘዘራረቦ ተቐማጣይ፣ ትማሊ ሰንበት ምሉእ መዓልቲ ክሳብ ለይቲ ድምጺ ከቢድ ብረት ከምዝሰምዐ፣ ክሳብ ሰዓት 9፣00 ንጉሆ ‘ውን ምሉእ ብምሉእ ደው ከምዘይበለ ምጥቃሱ ሓቢሩ። ወተሃደራት ዝጸዓና ወተሃደራዊ ተሽከርከርቲ ብብዝሒ ናብቲ ምትፍናን ዘለዎ ክፋል ናይቲ ዶብ ክጓዓዛ ከም ዝረኣየ ‘ውን ብተወሳኺ ኣመልኪቱ።