እቲ መርማሪ ኮምሽን ውድብ ሕቡራት ሃገራት ኣብ ሰብኣዊ መሰላት  ናብ ኤርትራ ኣትዩ መርመራኡ ከየካይድ ብተደጋጋሚ ፍቓድ ዝኸልከለ ምልካዊ ስርዓት ኢሳይያስ ፣ እቲ ኮምሽን ንዘቕረቦ ነቲ ስርዓት ብገበናት ኣንጻር ሰብኣውነት ዝኸስስ ጸብጻብ ተገልቢጡ ሓደ ወገናዊ እዩ ኢሉ ክነጽጎ ምፍታኑ ትርጉም ከምዘይብሉ ኣብ መርበብ ሓበሬታ ኣሰና ርእይቶታቶም ዝህቡ ዘለዉ ኤርትራውያን ይገልጹ ኣለዉ።

እቲ ኣብ ልዕሊ ህዝቢ ኤርትራ ብዝፍጽሞ ዘሎ ደረት ኣልቦ ግፍዕታት ብደም ዝተጨማለቐ ካብ ማንም ንላዕሊ ግፍዐኛ ተግባሩ ዝፈልጥ ገበነኛ ስርዓት ብቐንዱ ጉዱ ኣጸቢቑ ከይቅላዕ፣ ብኻልኣይ ደረጃ ድማ ከምዚ ሕጂ ዝገብሮ ዘሎ መመኽኔታ ንክኾኖ መርማሪ ኮምሽን ናብ ኤርትራ ኣትዩ ምስ ህዝቢ ከይራኸብ ከም ዝኣገዶ ናይ ኣደባባይ ምስጢር እዩ። ስለዝኾነ፣ እዚ ብመንገዲ ‘ቲ ዋና ሓባሊኡ ሓላፊ ፖለቲካዊ ህግደፍ የማነ ማንኪ ዘቕረቦ ናይ ቀሚሽ ኣደይ ሓንኵሉኒ መመኽኔታ እንዶ የብሉን።

እቲ ስርዓት ብመንገዲ የማነ ምንኪ ኣብ ጀኔቫ ተረኺቡ፣ ነቲ መርማሪ ኮምሽን ካብ ኣማኢት ኤርትራውያን ግዳያት ዝኣከቦ ብጭብጢ ዝተሰነየ፣ ህዝቢ ኤርትራ ‘ውን ዕለት ዕለት ይነብረሉ ስለዘሎ ኣዳዕዲዑ ዝፈልጦ ምልካዊ ስርዓት ኢሳይያስ ገበናት ኣንጻር ሰብኣውነት ከምዝፈጸመ ዘረጋግጽ ነጥብታት፣ ሓደ ክልተ ኢሉ ክምልሸሉ ምፍታኑ ንገዛእ ርእሱ፣ እቶም ዝባኖም ዝቐልዑ ገበነኛታት ህግደፍ፣ እቲ ገበኖም ንኽሽፍኑ ዘካይዱዎ ሕንከት ኣልቦ ሽሕጣን፣ ካብቲ ገበን ክገብሩ ከለዉ ዘዘውትሩዎ ጭካኔ ዝፍለ ኣይኮነን።

ከምዚ ሎሚ ቕነ ብተደጋጋሚ ኣብ ድምጺ ኣሰና ካብ ማእከላይ ባሕሪ ካብ ሞት ዝደሓኑ ናይ ዓይኒ መሰኻኽር ብምዝራብ ዘረጋገጽናዮ፣ ኣብ ሓደ ሰሙን ጥራይ ኣማኢት ኤርትራውያን መንእሰያት ኣብ ባሕሪ ጥሒሎም ብጅምላ ተቐዚፎም ከለዉ፣ ዋሕዚ ስደት ዝሒሉ እዩ ምባሉ፣ እቲ ስርዓት ነቲ ፈለማ ካብ ሃገሮም ክወጹ ብምስግዳድ ዝፈጸሞ ገበን ካልእ ገበን እዩ ዝድርበሉ ዘሎ። ሕመረት ናይቶም ኣብ ዋሕዚ ስደት ዝርከቡ ኤርትራውያን ኣባላት ሃገራዊ ኣገልግሎት ምዃኖም ዘየማትእ ሓቂ ክንሱ፣ እቲ ስርዓት ክኽሕዶ ምፍታኑ ‘ውን ንህዝቢ ኤርትራ ብሓፈሻ ብፍላድ ድማ ነቶም ኣብ መላእ ዓለም ከም ደቂ ዛግራ ተበቲኖም ዘለዉ ግዳያት ግፍዕን ስቓይን ናይቲ ስርዓት ዝኾኑ ዓሰርተታት ኣሽሓት ኤርትራውያን መንእሰያት ጽውጽዋይ እዩ።

ጽውጽዋይ ህግደፍ ብዙሕ እዩ። ብሓጺሩ፣ እቲ ንመንእሰያት ብስም ሃገራዊ ኣገልግሎት ባሮት ምልኪ ኣብ ምግባር፣ ንህዝቢ መሰረታዊ ሰብኣዊ መሰሉ ብምግፋፍ ዓቕሉ ኣብ ምጽባብን ምብታንን፣ ኣብ ማእሰርቲ፣ ጭውያ፣ ግፍዒ፣ ቅትለት፣ ጾታዊ ዓመጽ ሽበራን፣ ኮታ ኣብ ኩሎም ‘ቶም ምስ ገበናት ኣንጻር ሰብኣውነት ዝስርዑ ገበናት ኣብ ምፍጻም ኣብዚ መዋእል ‘ዚ መዳርግቲ ዘይብሉ ጽዩፍ ገበነኛ ስርዓት፣ ሓላዪ ህዝብን ህጻናትን መሲሉ ክመጻደቕ ምርኣይ ዘሕንኽ እዩ።